Aiyebindap Kwanda ne Kwong'yoonen
Kipirgei chii agobo kagoochinetap Kwandanyo: piik che kiguure let eng' koeech asiista konyoor melekto ne po peetuut komugul, ak koing'unyng'unyji tuiyet ne tai. Kosoomei kamet ng'echerok aeng'; kogoochi Jeso kelasiitap nyalilda ak kole oneetnatet ko uu otwoknatet. Koonyek aeng' che soomei, ye kileenji kosilem, kowaach kosiir ak kikas icheek.
20 1“Amu kaegu laitornatetap Kwandanyo ko uu landa ne ki ng'eet karon miising' komanda kole koguur piik che kiboisyei mbareennyi ne po zabibu. 2Kochamyechi ak piik melekto ne po peetuut komugul, ak ki iyook icheek koba mbareennyi. 3Ki manda ye kita sait somok eng' mornet, ak kogeer alak kotonon kolilaan eng' chaama. 4Ki leenji icheek, ‘Obe agine mbareet; agoonok anyun ne nyolu.’ Ak ki pa. 5Ki manda kogeny ye kita peet kween, ak kora ye kita koskoleny, ak ki yai ko uu nooto. 6Ye kita koeech asiista, komanda ak konyoor alak kotonon yooto. Koteebe icheek, ‘Amu nee si otononse yu kolilaan peet komugul?’”
7“Kiwolji icheek, ‘Amu ma kiguure acheek chii age tugul.’ Koleenji, ‘Obe agine mbareet.’
8“Ye kiit oolooldo, koleenji landa otwogindennyi ne kitononjin piik, ‘Guur piik che kiboisyei, ak igoochi icheek melektanywa, kobooch che let agoi che tai.’ 9Ye kibwa chuuto ki kiguure ye kita koeech asiista, konyooru age tugul melekto ne po peetuut komugul. 10Ye kibwa che tai, koleen konyooru che siirei, ago konyooru age tugul melekto ne po peetuut komugul agine. 11Ye kingo taach, ki ing'unyng'ung'ji landa, 12kole, ‘Chuuto che let ko ki poisyei sait agenge kityo, ago kiyaa icheek koyaegei ak acheek, che kinam nyigiisindap peet ak kang'wanit asiista.’
13“Kowolji age eng' icheek, ‘Chorwani, ma ayachin kiy ne ya. Tos ma kichamyechigei ak anee melekto ne po peetuut komugul?’ 14Nam ne ing'ung' ak iwe. Amache agoochi chiini ne let ko uu ye agoonin inyee. 15Tos ma amuuchi ayai ne amache ak tuguukyuk? Anan ii ng'etkong' amu ayaei aiyebindo? 16Ko uu nooto, koek anyun che let che tai, ak che tai koek che let.”
Mwaei Jeso Agobo Koruseet
17Ye kiwendi Jeso parak Jerusalem, ki imut taban taman ak aeng', ak koleenji icheek eng' ooreet,
18“Ogeer, keebe parak Jerusalem, ak kegoochi Weeriitap chii tisiik che eecheen ak siriik, che tuun korwookyi komee, 19ak kong'wekyi Pororyosyek si kochot ineendet, ak koreet, ak koriip koruseet—ak tuun tonon eng' peetuut ne po somok.”
Oindo ne Iman Ko Poisyet
20Yeityo kobwonji kamennywa weeriigap Zebedi kobooto weeriikyik, kong'uruuge si koteebe kiy age ineendet.
21Koteebe ineendet, “Imache nee?” Kole, “Mwa kotebee weeriikyuk tuwai, age eng' eung'ung' ne tai, ak age eng' eung'ung' ne kaataam, eng' laitornateng'ung'.”
22Ago kowol Jeso, “Ma ongen ne osomei. Omuuchi oee kurupto ne amach aee?” “Kimuuchi,” kole icheek.
23Kole, “Tuun oee kurupto ne nyuun, ago kotebee eng' eunnyu ne tai ak ne kaataam, ma kiy ne amuuchi agoochi—ko po chuuto ki kochopchi Abba.”
24Ye kingo kas niito che taman, konereech agobo weeriik aeng' che tupcho.
25Ki kiguure Jeso icheek, ak koleenji, “Ongen ile laitorinigap Pororyosyek ko laitorani icheek, ak piikwak che kiimeen ko tinyei kimnateet koboi icheek. 26Ma ko uu nooto eng' okweek. Ago ne machei koek ne oo among okweek, ingoek kiboityong'wong', 27ak ne machei koek ne tai among okweek, ingoek otwogindeng'wong', 28ko uu Weeriitap chii ne ki ma nyo si kitoret ineendet, ago si kotoret, ak kogoito saboondanyi koek kagerutyet ne po piik che chaang'.”
Konyoor Piik Aeng' che Koryotiin Konyeek
29Ye kimanda icheek eng' Jeriko, kisup ineendet piik che chaang'. 30Piik aeng' che koryotiin che kitebee eng' tabandap ooreet, ye kingo kas kole kobunei Jeso, kowaach, koleenji, “Kiptaiyat, irirwech, Weeriitap Daudi!” a a v30 ‘Weeriitap Daudi’ ko kainet ne ki kingen komyee eng' Yahudik, ne po laitoryat ne ki kiyomisyi ne tuun konyo eng' kaboortanetap Daudi ne po laitorik. 31Ki ing'unyng'ung'ji icheek piik si kosisye, ago kowaach kotesak, koleenji, “Irirwech, Kiptaiyat, Weeriitap Daudi!”
32Ki tonon Jeso, ak ki kiguure icheek, ak kole, “Omache ayaiywok nee?”
33Kiwolji ineendet, koleenji, “Kiptaiyat, ingong'aang'ji konyeennyo.”
34Ki rirook Jeso icheek, ak ki name konyekwak, ak koma tyanit kosoob konyekwak, ak koosup ineendet.