Matthew 20

20 ¹"Kaja ithumwui Avā wungram hiya, awui drakhā yāmguiwui vang ot kasā mibing masā khavai ngathor vai shimva̱ akha kathāna. ²Ana ot kasābing chili thangkha akhawui ngalangman mira da mayāngarokta, awui drakhā yāmguili chihovāhaowa. ³Ngathor pung kakathumawui atamli ana vaida, leihngapha̱li ngachāng makakā nganinga khangatei mibing chi thei. ⁴Ana athumli hānga, 'Nathumla drakhā yāmguili vālu; mashun kaji chi ina nathumli mira.' Chieina athum vai. ⁵Pung katharuka katā tharan kala pung kachiko atam tharan latluida vaida, ana tākam eina sāluishita. ⁶Pung phangā atam tharan ana vaida, apamli nganinga khangatei mibing thei. Ana ngahāna, 'Khi sāda nathumna thangkha katonga ngachāng makakā hili nganingkhala?'"

⁷"Athumna hānga, 'Khikhalajila khipānakha ithumli masāmana.' Ana hānga, 'Nathumla drakhā yāmguili vālu.'

⁸"Ngazin eina drakhā yāmguiwui akhavāna awui rao kahātabingwui kathāna chili hānga, 'Ot kasābing chili shoklu, kala khanaobing eina thuida kharebing eina tangda athumwui ngalangman milu.' ⁹Kala pung phangā atamli masā mibing kharā tharan athum ava̱va̱na thangkha akhawui ngalangman samphanga. ¹⁰Kharebing kharā tharan, athumna chungmeida samphangra da phaninga, kha athum ava̱va̱nala thangkha akhawui ngalangman samphanga. ¹¹Kala chi samphangda athumna shimva̱ chili kharopta, ¹²hānga, 'Khanaobing hina pung akha mangla ot sai, kha thangkhawui otphun kala kasā leirang phunga ithumla nana athumli ngaraichā sāhaira.'

¹³"Ana athumwui akhali ngahānkai, 'Itao, ina nali khayon masāmana. Nana thangkha akhawui ngalangman chi ili mayā ngarok maningmala?' ¹⁴Nawui kaji chi khuida vālu. Ina hi khanao ot kasāli nala ngaraichā mira da ngasakngai. ¹⁵Iwui kaji chi ina masākhangai eina masāshaprarmala? Maningakha ina sailāmlak sā vang eina nana yuishikhala? ¹⁶Chithāda khanaobing khare sāra, kala kharebing khanao sāra."

Jishuna Krushwui Pongli Sāngngarānda Hānga

¹⁷Jishuna Jerusalemli shangukida zatlakha, ana tharāda khani chili hokhuilaga apongli athumli hānga,

¹⁸"Yanglu, ithum Jerusalem shangkida zatli, kala miwui Naomayarali pāngmon akhokabing eina ain kathembingwui pāngli horsangmida, athumna shaothat khavai khayon mira, ¹⁹kala ali Gentilebingwui pāngli horsangmira, kala athumna ali mana̱shida, ngaphitda krushli shaothatra. Kala kakathuma thangli ana ringshokluira."

Kachangkha Khareikap chi Otram Ngatha̱mina

²⁰Chiwui thili Zebedeewui naomayarabingwui ava̱na awui naomayara ngarā eina ngasoda Jishuwui mangāli rākhuktizangda awui eina khikha poi.

²¹Jishuna ali ngahāna, "Na khi sākhangaikhala?" Ana hānga, "Iwui naomayara khani hi nawui wungramli akha nawui yashongli, akha nawui uishongli pamngasakra da hānglu."

²²Kha Jishuna ngahānkai, "Nathumna kapo chi khikhala da nathum matheimana. Ina mangkhavai tengkot chi nathum mangshaprala?" "Ithum shapra," da athumna hānga.

²³Ana hānga, "Iwui tengkot chi nathumna mangra mahai, kha iwui yāshong kala uishongli pamngasak chi khami khavai hi iwui maningmana; chi iwui Avāna ngaranping kahai athumwui vangna."

²⁴Athum tharā china chi kashā tharan, achināngarā khani chili malungvāthaowa.

²⁵Jishuna athumli hokhuida hānga, "Gentilebingwui mungrānbing eina athum tungli munga, kala khangaramabing eina athum tungli pangshap singa kaji nathumna thei. ²⁶Nathumwui ngachaili chithākha maleimana. Kha, nathumwui ngachaili reimeikap sakhangaipa china nathumwui rao sāra, ²⁷kala nathumwui ngachaili khare sakhangaipa china nathumwui raonao sāra, ²⁸miwui Naomayara eina tangda ali otram ngatha̱mi ngasak khavai kharā maningsi, kha otram ngatha̱mi khavai kala kachungkha vangna ngatangman sāda amanglā chigat khavai kharā sai da thada."

Mik Khangapeo Mi Khani Mik Samphanga

²⁹Kala athumna Jerichowui eina zatuki tharan, mi kachungkha akhana awui thi shurrai. ³⁰Shongfapheili pamkasa mik khangapeo mi khani chi, Jishu rārāda lei kaji shālaga, "Proho, Davidwui Naomayara, inili khalumashanmilu!" da panglāk eina vaowa. ^a a v30 "Davidwui Naomayara" mingpho hi, Davidwui awunga khurwui eina rāra da khamayā kahai awungawui vang, Jihudibingna theichinghai mingpho akhana. ³¹Mi kachungkhana anili kasainakha pamlu da khararra; kha ani khanina pangmeida vaoda, "Proho, Davidwui Naomayara, inili khalumashanmilu!" da hānga.

³²Chieina Jishuna nganingda, anili hokhuida hānga, "Naniwui vang ili khi sāmi ngasakngaikhala?"

³³Anina ali hānga, "Proho, iniwui mik theingasakmilu."

³⁴Kala Jishuna anili lumashanhaida aniwui mikli sāza̱ya, kala ngalāngda aniwui mik theiluishita, kala ali shurthuwa.