Matthew 19

19 ¹Jishuna tui hi hāngkupchanghailaga, Galileewui eina thuilaga Jordan kānkāda khalei Judea aramli vāhaowa. ²Mi kachungkha china ali shurzata, kala ana apam chili athumli raimisera.

³Phariseebing china ali chāng tamda rālaga rangahāna, "Mipā akhana khipā vangnakha apreiva̱li kapāng hi ainna mayāla?"

⁴Ana ngahānkai, "Haokaphokli athumli sāmi kahai ithumwui Avāna athumli mayarnao eina sha̱nao sāmi da nathumna mapāmalā, ⁵kala hānga, 'Chiwui vang eina mi akhana awui avāva̱ eina ava̱va̱li horhailaga apreiva̱li shurchingra, kala khani china phasā akha ngasāra'? ⁶Chieina ani khani maningluimana, kha phasā akhana; chiwui vang eina ithumwui Avāna ngarummi kahai chili mi khipānakha masākhaiaranu."

⁷Athumna ali hānga, "Chithākha khisāda mipā akhana kapāngwui lairik miluilaga ali pānghaipai da Mosesna ningmikhala?"

⁸Ana athumli hānga, "Nathumwui wuklung khamararwui vang Mosesna nathumli preiva̱ ngarāli pānghaipai da mayai, kha haokaphokwui eina chithā maningmana. ⁹Ina nathumli kahāngna, kachikathāna phokaphāwui vang maningla apreiva̱li pānghailaga khangatei akhali ngakumhaiakha ana phokaphana."

¹⁰Sākhangatha̱bingna ali hānga, "Gahara eina preiva̱wui ngachaili chikathā jiakha, ngakum makasāna phāmei."

¹¹Ana athumli hānga, "Mi saikorana tui hi mangakhuisangshapmana, chi mikahaibingna maningla khuisangshapa. ¹²Athumwui ava̱va̱wui naopamwui eina chithāda pharākahai ahongabing lei; mi kateibingna chithāda sākahai ahongabing lei; kala ithumwui Avā wungramwui vang khalatta chithāda sākahai ahongabing lei. Hi khuisangshapa a china khuisangranu."

Jishuna Naoshinaobingli Khuikasang

¹³Chieina ana athumtungli apāng thāda seihā sāmi khavai naoshinaobing chi awuili khuirai, kha sākhangatha̱bingna khuivaibing chili kahara.

¹⁴Kha Jishuna hānga, "Naoshinaobingli mahaphaialu, iwui ngalemli rāngasaklu; kaja ithumwui Avā wungram chi athum kathāwuina."

¹⁵Kala ana athumtungli apāng thāhailaga apam chiwui eina thuihaowa.

Ana Makhalei Thing Akha

¹⁶Chitharan mi akhana ali rānganaida hānga, "Ojā, katang makhavai kharing samphang khavai ina khi kaphā sārakhala?"

¹⁷Ana ali hānga, "Khisāda kaphā chiwui pongli ili ngahānkhala? Kaphā chi akha maningla maleimana. Kharingli kazang ngaiakha, ningkhami mayonlu."

¹⁸"Kachipābing?" da ana ngahāna. Jishuna hānga, "Mashaothatpaimana, maphophāpaimana, maleepaimana, minama shākhi mamipaimana, ¹⁹nava̱ navāli khayāshilu, kala nakhalatta leikashi thada nawui khongnainaoli leishiphalungra."

²⁰Yaronnaopa china ali hānga, "Saikora hi ina mayonrā kahaina. Ina arui khi khavāt leikhala?"

²¹Jishuna ali hānga, "Na kashungmei ngasā khavai ningchāngakha, ungulu, nawui khalalei saikora yorhailaga kachāmabingli milu; kala kazingramli nawui lan leira. Chieina rālaga ithi shurlu."

²²Yaronnaopa china chi kashā eina, khanangzan hanunghaowa, kaja a shānglaka.

²³Jishuna awui sākhangatha̱bingli hānga, "Kachangkhat eina ina nathumli kahāngna, kashānga mina ithumwui Avā wungramli zangki kayākha sakra. ²⁴Ina nathumli latluida hāngna, kashānga mina ithumwui Avā wungramli zangki kajile utna kapimkhurli ngara̱kashok paimei."

²⁵Sākhangatha̱bingna chi kashā eina, matakhaknahaida, "Chithākha khipā kahui samphangrakhala?" da ngahānna.

²⁶Jishuna athumli yangda hānga, "Hi mibingwui vang masākapaina, kha ithumwui Avāwui vanga saikora sāpaisera."

²⁷Chieina Peterna ali hānga, "Yanglu, ithumna saikora horhailaga nali shurthuwa. Chithākha ithumna khi samphangrakhala?"

²⁸Jishuna athumli hānga, "Kachangkhat eina ina nathumli kahāngna, pharā khangasak kahai atamli, miwui Naomayarana awui tekhamatei wungpamkhongli pam tharan, ili shurthuwa nathumla wungpamkhong tharāda khanili pamda, Israelwui shang tharāda khanili bichar sāra.

²⁹Shimlui nilala, achinā ngarā nilala, azarva̱ngarā nilala, avā nilala, ava̱ nilala, naongarā nilala, lui nilala imingwui vang horhaida kahai mi kachiva̱na shākha shida mataida samphangra, kala katang makhavai kharing chi mathunkhuira. ³⁰Kha khare kachungkhana naora, kala khanao kachungkhana rira."