മത്തായി 19 FHB Father's Heart Bible™

19 ¹യേശു ഈ വാക്കുകൾ പറഞ്ഞുതീർന്നപ്പോൾ, അവിടുന്ന് ഗലീലവിട്ട് യോർദാനക്കരെയുള്ള യെഹൂദ്യപ്രദേശത്തേക്കു പോയി. ²വലിയ ജനക്കൂട്ടം അവിടുത്തെ അനുഗമിച്ചു; അവിടുന്ന് അവരെ അവിടെവച്ചു സൗഖ്യമാക്കി.

³പരീശന്മാർ അവിടുത്തെ പരീക്ഷിക്കുവാൻ വന്ന് ഇങ്ങനെ ചോദിച്ചു: “ഏതു കാരണത്താലും ഒരു പുരുഷൻ തന്റെ ഭാര്യയെ ഉപേക്ഷിക്കുന്നത് നിയമാനുസൃതമാണോ?”

⁴അവിടുന്ന് മറുപടി പറഞ്ഞു: “ആരംഭത്തിൽ അവരെ സൃഷ്ടിച്ച നമ്മുടെ പിതാവ് അവരെ ആണും പെണ്ണുമായി സൃഷ്ടിച്ചു എന്നും, ⁵‘അതുകൊണ്ട് ഒരു പുരുഷൻ തന്റെ പിതാവിനെയും മാതാവിനെയും വിട്ട് ഭാര്യയോടു പറ്റിച്ചേരും; ഇരുവരും ഒരു ശരീരമായിത്തീരും’ എന്ന് അരുളിച്ചെയ്തു എന്നും നിങ്ങൾ വായിച്ചിട്ടില്ലയോ? ⁶അതിനാൽ അവർ ഇനി രണ്ടല്ല, ഒരു ശരീരമത്രേ; അതുകൊണ്ട്, നമ്മുടെ പിതാവ് യോജിപ്പിച്ചതിനെ ആരും വേർപെടുത്താതിരിക്കട്ടെ.”

⁷അവർ അവിടുത്തോടു ചോദിച്ചു: “എന്നാൽ ഒരു പുരുഷൻ ഉപേക്ഷണപത്രം കൊടുത്ത് ഭാര്യയെ അയച്ചുകളയണമെന്ന് മോശ കൽപിച്ചത് എന്തുകൊണ്ട്?”

⁸അവിടുന്ന് അവരോടു പറഞ്ഞു: “നിങ്ങളുടെ ഹൃദയകാഠിന്യം നിമിത്തമാണ് നിങ്ങളുടെ ഭാര്യമാരെ ഉപേക്ഷിക്കുവാൻ മോശ അനുവദിച്ചത്; എന്നാൽ ആരംഭം മുതൽ അങ്ങനെ ആയിരുന്നില്ല. ⁹ഞാൻ നിങ്ങളോടു പറയുന്നു: ലൈംഗികപാപം ഒഴികെ മറ്റൊരു കാരണത്താൽ തന്റെ ഭാര്യയെ ഉപേക്ഷിച്ച് വേറൊരുവളെ വിവാഹം കഴിക്കുന്നവൻ വ്യഭിചാരം ചെയ്യുന്നു.”

¹⁰ശിഷ്യന്മാർ അവിടുത്തോടു പറഞ്ഞു: “ഭർത്താവിന്റെയും ഭാര്യയുടെയും ഇടയിലെ സ്ഥിതി ഇതാണെങ്കിൽ, വിവാഹം കഴിക്കാതിരിക്കുന്നതാണ് നല്ലത്.”

¹¹അവിടുന്ന് അവരോടു പറഞ്ഞു: “ഈ വചനം എല്ലാവർക്കും സ്വീകരിക്കുവാൻ കഴിയുകയില്ല; ആർക്കു നൽകപ്പെട്ടിരിക്കുന്നുവോ അവർക്കുമാത്രമേ കഴിയൂ. ¹²അമ്മയുടെ ഗർഭത്തിൽനിന്ന് അങ്ങനെ ജനിച്ച ഷണ്ഡന്മാരുണ്ട്; മറ്റുള്ളവർ അങ്ങനെ ആക്കിത്തീർത്ത ഷണ്ഡന്മാരുണ്ട്; നമ്മുടെ പിതാവിന്റെ രാജ്യത്തെപ്രതി തങ്ങളെത്തന്നെ അങ്ങനെ ആക്കിയ ഷണ്ഡന്മാരുമുണ്ട്. സ്വീകരിക്കുവാൻ കഴിയുന്നവൻ ഇത് സ്വീകരിക്കട്ടെ.”

യേശു കുഞ്ഞുങ്ങളെ സ്വീകരിക്കുന്നു

¹³അപ്പോൾ അവിടുന്ന് കൈകൾവച്ച് പ്രാർഥിക്കേണ്ടതിന് ചില കുഞ്ഞുങ്ങളെ അവിടുത്തെ അടുക്കൽ കൊണ്ടുവന്നു; എന്നാൽ അവരെ കൊണ്ടുവന്നവരെ ശിഷ്യന്മാർ ശാസിച്ചു.

¹⁴എന്നാൽ യേശു പറഞ്ഞു: “കുഞ്ഞുങ്ങളെ എന്റെ അടുക്കൽ വരുവാൻ അനുവദിക്കുവിൻ; അവരെ തടയരുത്; എന്തെന്നാൽ നമ്മുടെ പിതാവിന്റെ രാജ്യം ഇവരെപ്പോലെയുള്ളവരുടേതാകുന്നു.”

¹⁵അവിടുന്ന് അവരുടെമേൽ കൈകൾവച്ചശേഷം അവിടെനിന്ന് യാത്രയായി.

അവനു കുറവായിരുന്ന ഒരു കാര്യം

¹⁶അപ്പോൾത്തന്നെ ഒരു മനുഷ്യൻ അവിടുത്തെ അടുക്കൽ വന്ന് ചോദിച്ചു: “ഗുരോ, അനശ്വരജീവൻ പ്രാപിക്കുവാൻ ഞാൻ എന്തു നന്മ ചെയ്യണം?”

¹⁷അവിടുന്ന് അവനോടു പറഞ്ഞു: “നന്മയെക്കുറിച്ച് നീ എന്നോടു ചോദിക്കുന്നതെന്തിന്? ഒരുവൻമാത്രമേ നല്ലവനായുള്ളൂ. ജീവനിൽ പ്രവേശിക്കുവാൻ ആഗ്രഹിക്കുന്നെങ്കിൽ, കൽപനകൾ പാലിക്കുക.”

¹⁸“ഏവ?” എന്ന് അവൻ ചോദിച്ചു. യേശു പറഞ്ഞു: “കൊല ചെയ്യരുത്, വ്യഭിചാരം ചെയ്യരുത്, മോഷ്ടിക്കരുത്, കള്ളസാക്ഷ്യം പറയരുത്, ¹⁹നിന്റെ പിതാവിനെയും മാതാവിനെയും ബഹുമാനിക്കുക, നിന്റെ അയൽക്കാരനെ നിന്നെപ്പോലെതന്നെ സ്നേഹിക്കുക.”

²⁰ആ യുവാവ് അവിടുത്തോടു പറഞ്ഞു: “ഇവയെല്ലാം ഞാൻ പാലിച്ചിട്ടുണ്ട്. ഇനിയും എനിക്ക് എന്തു കുറവുണ്ട്?”

²¹യേശു അവനോടു പറഞ്ഞു: “പൂർണനാകുവാൻ ആഗ്രഹിക്കുന്നെങ്കിൽ, പോയി നിന്റെ വസ്തുവകകൾ വിറ്റ് ദരിദ്രർക്കു കൊടുക്കുക; അപ്പോൾ സ്വർഗത്തിൽ നിനക്കു നിക്ഷേപം ഉണ്ടാകും; പിന്നെ വന്ന് എന്നെ അനുഗമിക്കുക.”

²²ഇതു കേട്ടപ്പോൾ, വളരെ സമ്പത്ത് ഉണ്ടായിരുന്നതിനാൽ ആ യുവാവ് ദുഃഖിച്ചുകൊണ്ട് പോയി.

²³യേശു തന്റെ ശിഷ്യന്മാരോടു പറഞ്ഞു: “സത്യമായി ഞാൻ നിങ്ങളോടു പറയുന്നു: ഒരു ധനവാൻ നമ്മുടെ പിതാവിന്റെ രാജ്യത്തിൽ പ്രവേശിക്കുക പ്രയാസം. ²⁴ഞാൻ വീണ്ടും നിങ്ങളോടു പറയുന്നു: ഒരു ധനവാൻ നമ്മുടെ പിതാവിന്റെ രാജ്യത്തിൽ പ്രവേശിക്കുന്നതിനെക്കാൾ എളുപ്പം ഒട്ടകം സൂചിയുടെ കുഴയിലൂടെ കടക്കുന്നതാണ്.”

²⁵ഇതു കേട്ടപ്പോൾ ശിഷ്യന്മാർ ഏറ്റവും വിസ്മയിച്ച് ചോദിച്ചു: “എന്നാൽ ആർക്കു രക്ഷിക്കപ്പെടുവാൻ കഴിയും?”

²⁶യേശു അവരെ നോക്കി പറഞ്ഞു: “ഇത് മനുഷ്യർക്ക് അസാധ്യമാകുന്നു; എന്നാൽ നമ്മുടെ പിതാവിന് സകലവും സാധ്യമാകുന്നു.”

²⁷അപ്പോൾ പത്രോസ് അവിടുത്തോടു പറഞ്ഞു: “ഇതാ, ഞങ്ങൾ സകലവും ഉപേക്ഷിച്ച് അങ്ങയെ അനുഗമിച്ചിരിക്കുന്നു. എന്നാൽ ഞങ്ങൾക്ക് എന്തു ലഭിക്കും?”

²⁸യേശു അവരോടു പറഞ്ഞു: “സത്യമായി: പുനഃസൃഷ്ടിയിൽ, മനുഷ്യപുത്രൻ തന്റെ മഹത്ത്വസിംഹാസനത്തിൽ ഇരിക്കുമ്പോൾ, എന്നെ അനുഗമിച്ച നിങ്ങളും പന്ത്രണ്ട് സിംഹാസനങ്ങളിൽ ഇരുന്ന് ഇസ്രായേലിന്റെ പന്ത്രണ്ട് ഗോത്രങ്ങളെ ന്യായം വിധിക്കും.

²⁹“എന്റെ നാമത്തെപ്രതി വീടുകളോ സഹോദരന്മാരോ സഹോദരിമാരോ പിതാവോ മാതാവോ മക്കളോ നിലങ്ങളോ ഉപേക്ഷിച്ച ഏവനും നൂറുമടങ്ങ് അധികം ലഭിക്കുകയും അനശ്വരജീവൻ അവകാശമാക്കുകയും ചെയ്യും. ³⁰എന്നാൽ ഒന്നാമന്മാരായ പലരും ഒടുവിലത്തവരാകും; ഒടുവിലത്തവരായ പലരും ഒന്നാമന്മാരാകും.”