Matiu 19

19 ¹Nígbà tí Jesu parí ọ̀rọ̀ wọ̀nyí, ó kúrò ní Galili, ó sì lọ sí agbègbè Judea, ní ìkọjá Jordani. ²Ọ̀pọ̀ ìjọ ènìyàn tẹ̀lé e, ó sì wò wọ́n sàn níbẹ̀.

³Àwọn Farisi tọ̀ ọ́ wá láti dán an wò, wọ́n béèrè pé, “Ṣé ó tọ́ fún ọkùnrin láti kọ aya rẹ̀ sílẹ̀ nítorí ìdí yòówù kí ó jẹ́?”

⁴Ó dáhùn pé, “Ẹ kò ha ka á bí pé Baba wa, ẹni tí ó dá wọn ní ìbẹ̀rẹ̀, ó dá wọn ní akọ àti abo, ⁵ó sì wí pé, ‘Nítorí náà ọkùnrin yóò fi baba àti ìyá rẹ̀ sílẹ̀, yóò sì fà mọ́ aya rẹ̀, àwọn méjèèjì yóò sì di ara kan’? ⁶Nítorí náà, wọn kì í ṣe méjì mọ́ bí kò ṣe ara kan; nítorí náà, kí ẹnikẹ́ni má ṣe ya ohun tí Baba wa ti so pọ̀.”

⁷Wọ́n wí fún un pé, “Èéṣe nígbà náà tí Mose fi pàṣẹ pé kí ọkùnrin fún un ní ìwé ìkọ̀sílẹ̀ kí ó sì lé e lọ?”

⁸Ó sọ fún wọn pé, “Mose fàyè gbà yín láti kọ àwọn aya yín sílẹ̀ nítorí líle ọkàn yín, ṣùgbọ́n kì í ṣe bẹ́ẹ̀ ni ní ìbẹ̀rẹ̀. ⁹Mo wí fún yín pé, ẹnikẹ́ni tí ó bá kọ aya rẹ̀ sílẹ̀—àyàfi nítorí ẹ̀ṣẹ̀ àgbèrè—tí ó sì fẹ́ ẹlòmíràn, ó ṣe panṣágà.”

¹⁰Àwọn ọmọ-ẹ̀yìn rẹ̀ wí fún un pé, “Bí ọ̀ràn bá rí bẹ́ẹ̀ láàrín ọkọ àti aya, ó sàn kí a má ṣe gbéyàwó.”

¹¹Ó wí fún wọn pé, “Kì í ṣe gbogbo ènìyàn ni ó lè gba ọ̀rọ̀ yìí—bí kò ṣe àwọn tí a fi fún nìkan. ¹²Àwọn ìwẹ̀fà wà tí a bí bẹ́ẹ̀ láti inú ìyá wọn; àwọn ìwẹ̀fà wà tí àwọn ẹlòmíràn sọ di bẹ́ẹ̀; àwọn ìwẹ̀fà sì wà tí wọ́n sọ ara wọn di bẹ́ẹ̀ nítorí ìjọba Baba wa. Ẹni tí ó bá lè gbà á, kí ó gbà á.”

Jesu Gba Àwọn Ọmọ Kéékèèké

¹³Nígbà náà, a mú àwọn ọmọ kéékèèké tọ̀ ọ́ wá kí ó lè gbé ọwọ́ lé wọn kí ó sì gbàdúrà, ṣùgbọ́n àwọn ọmọ-ẹ̀yìn bá àwọn tí wọ́n mú wọn wá wí.

¹⁴Ṣùgbọ́n Jesu wí pé, “Ẹ jẹ́ kí àwọn ọmọ kéékèèké wá sọ́dọ̀ mi—ẹ má ṣe dí wọn lọ́wọ́, nítorí ìjọba Baba wa jẹ́ ti irú àwọn wọ̀nyí.”

¹⁵Ó sì gbé ọwọ́ rẹ̀ lé wọn, ó sì kúrò níbẹ̀ lọ.

Ohun Kan Ṣoṣo tí Ó Kù fún Un

¹⁶Nígbà náà gan-an ni ọkùnrin kan tọ̀ ọ́ wá, ó sì béèrè pé, “Olùkọ́, kín ni rere tí mo gbọ́dọ̀ ṣe kí n lè ní ìyè àìnípẹ̀kun?”

¹⁷Ó wí fún un pé, “Èéṣe tí ìwọ fi béèrè lọ́wọ́ mi nípa ohun tí ó dára? Ẹnìkan ṣoṣo ni ó dára. Bí ìwọ bá fẹ́ wọ ìyè, pa àwọn òfin mọ́.”

¹⁸Ó béèrè pé, “Èwo ni?” Jesu wí pé, “Má ṣe pànìyàn, má ṣe panṣágà, má ṣe jalè, má ṣe jẹ́rìí èké, ¹⁹bọ̀wọ̀ fún baba àti ìyá rẹ, kí o sì fẹ́ ọmọnìkejì rẹ bí ara rẹ.”

²⁰Ọ̀dọ́mọkùnrin náà wí fún un pé, “Gbogbo ìwọ̀nyí ni mo ti pamọ́. Kín ni ó ṣì kù fún mi?”

²¹Jesu sọ fún un pé, “Bí ìwọ bá fẹ́ jẹ́ pípé, lọ, ta ohun ìní rẹ, kí o sì fi fún àwọn tálákà—ìwọ yóò ní ìṣúra ní ọ̀run—nígbà náà kí o wá, kí o sì tẹ̀lé mi.”

²²Nígbà tí ọ̀dọ́mọkùnrin náà gbọ́ èyí, ó fi ìbànújẹ́ lọ kúrò, nítorí ó ní ọrọ̀ púpọ̀.

²³Jesu wí fún àwọn ọmọ-ẹ̀yìn rẹ̀ pé, “Lóòótọ́ ni mo wí fún yín pé, ọlọ́rọ̀ yóò ní ìṣòro láti wọ ìjọba Baba wa. ²⁴Mo tún wí fún yín pé, ó rọrùn fún ìbákasẹ láti gba ojú abẹ́rẹ́ ju fún ọlọ́rọ̀ láti wọ ìjọba Baba wa.”

²⁵Nígbà tí àwọn ọmọ-ẹ̀yìn gbọ́ èyí, ẹnu yà wọ́n gidigidi, wọ́n sì béèrè pé, “Ta ni nígbà náà ni a lè gbàlà?”

²⁶Jesu wo wọ́n, ó sì wí pé, “Èyí kò ṣeé ṣe fún ènìyàn, ṣùgbọ́n ohun gbogbo ṣeé ṣe lọ́dọ̀ Baba wa.”

²⁷Nígbà náà, Peteru wí fún un pé, “Wò ó, àwa ti fi ohun gbogbo sílẹ̀, a sì tẹ̀lé ọ. Kín ni nígbà náà ni àwa yóò ní?”

²⁸Jesu sọ fún wọn pé, “Lóòótọ́: ní ìsọdọ̀tun, nígbà tí Ọmọ Ènìyàn yóò jókòó lórí ìtẹ́ ògo rẹ̀, ẹ̀yin tí ẹ tẹ̀lé mi yóò sì jókòó lórí ìtẹ́ méjìlá, láti máa ṣe ìdájọ́ ẹ̀yà Israẹli méjìlá.

²⁹“Olúkúlùkù ẹni tí ó bá ti fi ilé tàbí arákùnrin tàbí arábìnrin tàbí baba tàbí ìyá tàbí ọmọ tàbí oko sílẹ̀ nítorí orúkọ mi yóò gba ìlọ́po ọgọ́rùn-ún, yóò sì jogún ìyè àìnípẹ̀kun. ³⁰Ṣùgbọ́n ọ̀pọ̀ àwọn tí wọ́n jẹ́ ẹni àkọ́kọ́ yóò di ẹni ìkẹyìn, ọ̀pọ̀ àwọn tí wọ́n jẹ́ ẹni ìkẹyìn yóò sì di ẹni àkọ́kọ́.”