馬太福音 19

19 ¹耶穌講完呢啲話,就離開加利利,嚟到約旦河對面猶太嘅境界。 ²有一大群人跟住佢,佢就喺嗰度醫好佢哋。

³有幾個法利賽人嚟試探佢,問:「一個人無論咩緣故都可以休妻,呢樣合唔合律法呢?」

⁴佢回答講:「你哋冇讀過咩?我哋嘅父喺起初造人嘅時候,係造男造女, ⁵又話:『因為咁,人要離開父母,同妻子連合,兩個人成為一體』? ⁶咁樣睇嚟,佢哋唔再係兩個人,而係一體嘞。所以,我哋嘅父所配合嘅,人就唔好分開。」

⁷佢哋對佢講:「咁點解摩西又吩咐人畀一張休書就可以休妻呢?」

⁸佢話畀佢哋聽:「係因為你哋嘅心硬,摩西先至准你哋休妻;但係起初唔係咁樣㗎。 ⁹我話畀你哋知:凡休妻嘅——除咗因為淫亂——再娶第個,就係犯姦淫喇。」

¹⁰門徒對佢講:「如果丈夫同妻子之間係咁樣,咁不如唔好結婚啦。」

¹¹佢對佢哋講:「唔係人人都領受得到呢句話,只有蒙賜嘅人先至得。 ¹²有啲人係一出母胎就係太監;有啲人係畀人閹咗變成太監;又有啲人係為咗我哋父嘅國,自己甘願做太監。呢啲話,邊個領受得到,就領受啦。」

耶穌歡迎小朋友

¹³嗰陣時有人帶啲小朋友嚟見佢,想佢按手喺佢哋身上同埋為佢哋祈禱,門徒就責備嗰啲帶小朋友嚟嘅人。

¹⁴但係耶穌就話:「畀啲小朋友到我呢度嚟,唔好阻止佢哋,因為我哋父嘅國正正係屬於好似佢哋咁樣嘅人。」

¹⁵於是佢就按手喺佢哋身上,然後就離開嗰度。

佢仲欠嘅嗰一樣嘢

¹⁶就喺呢個時候,有個人埋嚟問佢:「老師,我要做啲咩善事,先至可以得到永生呢?」

¹⁷佢對佢講:「你點解問我咩嘢係善呢?只有一位係善嘅。你如果想進入生命,就要遵守誡命。」

¹⁸嗰個人問:「係邊啲誡命呢?」耶穌講:「唔好殺人,唔好姦淫,唔好偷竊,唔好作假見證, ¹⁹要孝敬父母,又要愛你嘅鄰舍好似愛自己一樣。」

²⁰嗰個後生仔對佢講:「呢啲我全部都遵守咗喇,我仲欠啲咩呢?」

²¹耶穌話畀佢聽:「你如果想做到完全,就去,變賣你所有嘅家產,分畀窮人——咁你喺天上就會有財寶——然之後就嚟跟從我。」

²²嗰個後生仔一聽見呢句話,就憂憂愁愁咁走咗喇,因為佢好有錢。

²³耶穌對佢啲門徒講:「我老實話畀你哋知:有錢人好難進入我哋父嘅國。 ²⁴我再話畀你哋知:駱駝穿過針眼,都仲易過有錢人進入我哋父嘅國呢。」

²⁵門徒聽見咗,就非常之驚訝,問:「咁邊個先可以得救呢?」

²⁶耶穌望住佢哋講:「呢件事喺人嚟講係做唔到嘅,但係喺我哋嘅父嚟講,凡事都做得到。」

²⁷嗰陣時彼得對佢講:「你睇,我哋已經撇低一切嚟跟從你喇,咁我哋將來會有啲咩呢?」

²⁸耶穌話畀佢哋聽:「我老實講:到咗萬物更新嘅時候,人子坐喺佢榮耀嘅寶座上,你哋呢啲跟從我嘅人,都會坐喺十二個寶座上,審判以色列十二個支派。

²⁹「凡為咗我嘅名撇低房屋、或者弟兄、或者姊妹、或者父親、或者母親、或者兒女、或者田地嘅人,都會得到一百倍,又會承受永生。 ³⁰但係好多喺前嘅,將來會喺後;好多喺後嘅,將來會喺前。」