Shadi nimite amar Pitri laga itcha
Jisu bia ke amikhan laga Pitri pora shuru te tarkhan ke kineka bonaise eitu te thapon kore, chella khan bhagai di thaka bacha khan ke swagat kore, aru ekjon bhal, dhoni jowan ke sob bikiri koribole koi. Tai dukh kori kene jai. Manuh nimite jun napara ase, amikhan laga Pitri nimite para ase.
19 1Jitia Jisu eitu kotha khan koi khotom korise, Tar Galilee pora ulai jai kene Jordan paar te thaka Judea desh te ahhise. 2Dangor manuh bhir Tar piche ahhise, aru Tar pora taikhan ke ta te bhal korise.
3Pharisee khan Tar ke porikhya koribole ahhi kene hudise, “Ekjon manuh pora ji kiba karne nijor maiki ke chari dibo, eitu niyom te thik ase?”
4Tar jawab di koise, “Tumikhan pora pura nai naki, amar Pitri, kun pora shuru te taikhan ke bonaise, taikhan ke mota aru maiki bonaise,” 5“aru koise, ‘Eitu karne ekjon manuh pora nijor pitri aru ama ke chari kene nijor maiki logot te thakibo, aru duijon ek gau-mangso hobo’?” 6“Eitu karne taikhan aru duijon nohoi kintu ek gau-mangso ase; eitu karne, amar Pitri pora ji eke logot milaise, eitu ke kun bhi alag nakoribi.”
7Taikhan Tar ke koise, “Tetiya Moses pora kile hukum dise ekjon manuh pora chari diya chithi di kene tai ke pathai dibole?”
8Tar taikhan ke koise, “Tumikhan laga mon tan thaka karne Moses pora tumikhan ke nijor maiki khan ke chari dibole dise, kintu shuru pora eneka thaka nai. 9Moi tumikhan ke koi ase: kun pora nijor maiki ke chari kene—bebichar paap chari kene—dusra ekjon ke shadi kore, tai bebichar kore.”
10Chella khan Tar ke koise, “Jodi mota aru maiki majot te eneka ase, tene hole shadi nakora he bhal ase.”
11Tar taikhan ke koise, “Sob manuh pora eitu kotha grohon koribo napare—kun ke diya ase khali taikhan he. 12Kunba napungshok khan ama laga pet pora eneka jonom hoise; kunba napungshok khan dusra manuh pora eneka bonaise; aru kunba napungshok khan ase kun pora amar Pitri laga rajyo nimite nijor ke eneka banaise. Kun pora eitu grohon koribo pare, tai grohon koribi.”
Jisu pora chutu bacha khan ke grohon korise
13Tetiya chutu bacha khan ke Tar logot te anise Tar pora taikhan uporte hath rakhi kene prarthana koribole, kintu chella khan pora taikhan ke ani diya manuh khan ke gali dise.
14Kintu Jisu koise, “Chutu bacha khan ke Moi logot te ahhibole dibi—taikhan ke narukhabi, kilemane amar Pitri laga rajyo tu eitu nisena manuh khan laga ase.”
15Aru Tar taikhan uporte hath rakhi kene ta pora age bari jaise.
Tar logot te komti thaka ekta jinis
16Thik tetiya ekjon manuh Tar usorte ahhi kene hudise, “Guruji, ananta jivon pabole moi ki bhal kaam koribo lage?”
17Tar tai ke koise, “Ki bhal ase, eitu kile Moi ke hudi ase? Khali ekjon he bhal ase. Jodi tumi jivon te ghusi bole mon ase, tene hole hukum khan mani kene thakibi.”
18“Kuntu khan?” tai hudise. Jisu koise, “Khun nakoribi, bebichar nakoribi, chur nakoribi, misa gawahi nadibi, 19nijor pitri aru ama ke sonman koribi, aru nijor ke morom kora nisena nijor usor manuh ke morom koribi.”
20Jawan manuh Tar ke koise, “Eitu sob moi mani kene ahhise. Etiya bhi moi ke ki komti ase?”
21Jisu tai ke koise, “Jodi tumi pura hobole mon ase, tene hole jabi, nijor jinis khan bikri kori kene gorib khan ke dibi—tumi laga dhun sorgo te thakibo—titia ahhi kene Moi laga piche ahhibi.”
22Jitia jawan manuh eitu hunise, tai mon dukh koi kene jai jaise, kilemane tar logot te bisi dhun thakise.
23Jisu pora Tar chella khan ke koise, “Hosa kotha, Moi tumikhan ke koi ase: dhuni manuh ekjon amar Pitri laga rajyo te ghusi bole bisi tan ase. 24Moi tumikhan ke aru koi ase: dhuni manuh amar Pitri laga rajyo te ghusa pora, uth ekta suiya laga chenda te ghusa he aru sosa ase.”
25Jitia chella khan eitu hunise, taikhan bisi asurit hoi kene hudise, “Tetiya kun ke rokhya koribo pare?”
26Jisu taikhan ke sai kene koise, “Eitu manuh khan nimite nohoi, kintu amar Pitri logot te sob kiba hobo pare.”
27Tetiya Peter Tar ke koise, “Sabi, amikhan sob chari kene Apuni laga piche ahhise. Tetiya amikhan ki pabo?”
28Jisu taikhan ke koise, “Hosa kotha: notun kori diya homoi te, jitia Manuh laga Putro tu Tar mahima laga singhason te bohibo, Moi laga piche aha tumikhan bhi baroh ta singhason te bohi kene Israel laga baroh ta jati ke bisar koribo.
29“Kun pora Moi laga nam nimite ghor, bhai khan, bhoini khan, pitri, ama, bacha khan, nahole kheti chari dise, tai eksoh guna bisi pabo aru ananta jivon pabo. 30Kintu bisi kun age te ase taikhan piche hobo, aru bisi kun piche te ase taikhan age hobo.”