Mathayo 19

19 ¹Yesu alipomaliza maneno haya, aliondoka Galilaya na kwenda katika mkoa wa Uyahudi, ng'ambo ya Yordani. ²Makutano makubwa yakamfuata, naye akawaponya huko.

³Mafarisayo wakamjia ili kumjaribu, wakiuliza, "Je, ni halali mtu kumwacha mke wake kwa sababu yoyote?"

⁴Akajibu, "Je, hamkusoma kwamba Baba yetu, aliyewaumba tangu mwanzo, aliwaumba mwanamume na mwanamke, ⁵na akasema, 'Kwa hiyo mwanamume atamwacha baba yake na mama yake, naye ataambatana na mke wake, na hao wawili watakuwa mwili mmoja'? ⁶Hivyo si wawili tena, bali mwili mmoja; kwa hiyo, alichokiunganisha Baba yetu, mtu asikitenganishe."

⁷Wakamwambia, "Basi kwa nini Musa aliagiza mtu ampe hati ya talaka na kumwacha?"

⁸Akawaambia, "Musa aliwaruhusu kuwaacha wake zenu kwa sababu ya ugumu wa mioyo yenu, lakini tangu mwanzo haikuwa hivyo. ⁹Nawaambia: mtu yeyote amwachaye mke wake—isipokuwa kwa sababu ya zinaa—na kuoa mwingine, anazini."

¹⁰Wanafunzi wakamwambia, "Kama ndivyo ilivyo kati ya mume na mke, ni afadhali kutooa."

¹¹Akawaambia, "Si kila mtu awezaye kulipokea neno hili—ila wale waliopewa. ¹²Kuna matowashi waliozaliwa hivyo tangu tumbo la mama yao; kuna matowashi waliofanywa hivyo na watu; na kuna matowashi waliojifanya hivyo kwa ajili ya ufalme wa Baba yetu. Awezaye kulipokea hili, na alipokee."

Yesu Awakaribisha Watoto Wadogo

¹³Ndipo watoto wadogo wakaletwa kwake ili aweke mikono yake juu yao na kuomba, lakini wanafunzi wakawakemea wale waliowaleta.

¹⁴Lakini Yesu akasema, "Waacheni watoto wadogo waje kwangu—msiwazuie, kwa maana ufalme wa Baba yetu ni wa walio kama hawa."

¹⁵Naye akaweka mikono yake juu yao, kisha akaondoka hapo.

Kitu Kimoja Alichopungukiwa

¹⁶Papo hapo mtu mmoja akamwendea na kuuliza, "Mwalimu, nifanye jambo gani jema ili nipate uzima wa milele?"

¹⁷Akamwambia, "Kwa nini unaniuliza habari ya lililo jema? Aliye mwema ni mmoja tu. Kama ukitaka kuingia katika uzima, zishike amri."

¹⁸"Zipi?" akauliza. Yesu akasema, "Usiue, usizini, usiibe, usishuhudie uongo, ¹⁹waheshimu baba yako na mama yako, na umpende jirani yako kama nafsi yako."

²⁰Yule kijana akamwambia, "Haya yote nimeyashika. Bado napungukiwa na nini?"

²¹Yesu akamwambia, "Kama ukitaka kuwa mkamilifu, nenda, uuze mali yako na uwape maskini—nawe utakuwa na hazina mbinguni—kisha njoo, unifuate."

²²Yule kijana aliposikia hayo, akaenda zake kwa huzuni, kwa sababu alikuwa na mali nyingi.

²³Yesu akawaambia wanafunzi wake, "Amin, nawaambia: tajiri kwa shida ataingia katika ufalme wa Baba yetu. ²⁴Tena nawaambia: ni rahisi zaidi ngamia kupenya tundu la sindano kuliko tajiri kuingia katika ufalme wa Baba yetu."

²⁵Wanafunzi waliposikia hayo, walishangaa sana wakauliza, "Basi ni nani awezaye kuokoka?"

²⁶Yesu akawatazama, akasema, "Kwa wanadamu jambo hili haliwezekani, lakini kwa Baba yetu kila kitu chawezekana."

²⁷Ndipo Petro akamwambia, "Tazama, sisi tumeacha vyote na kukufuata. Basi sisi tutapata nini?"

²⁸Yesu akawaambia, "Amin: katika ule uzao mpya, Mwana wa Adamu atakapoketi katika kiti chake cha enzi cha utukufu, ninyi mlionifuata pia mtaketi katika viti kumi na viwili vya enzi, mkiyahukumu makabila kumi na mawili ya Israeli.

²⁹"Na kila mtu aliyeacha nyumba au ndugu au dada au baba au mama au watoto au mashamba kwa ajili ya jina langu, atapokea mara mia zaidi, na kuurithi uzima wa milele. ³⁰Lakini wengi walio wa kwanza watakuwa wa mwisho, na wengi walio wa mwisho watakuwa wa kwanza."