மத்தேயு 19

19 ¹இயேசு இந்த வார்த்தைகளைச் சொல்லி முடித்தபின், அவர் கலிலேயாவைவிட்டு, யோர்தானுக்கு அக்கரையிலுள்ள யூதேயாவின் எல்லைப்பகுதிக்குச் சென்றார். ²திரளான ஜனங்கள் அவரைப் பின்பற்றிச் சென்றார்கள்; அவர் அங்கே அவர்களைச் சொஸ்தமாக்கினார்.

³அப்பொழுது பரிசேயர் அவரைச் சோதிக்கும்படி அவரிடம் வந்து, “ஒரு மனிதன் எந்தக் காரணத்திற்காகிலும் தன் மனைவியைத் தள்ளிவிடுவது நியாயமா?” என்று கேட்டார்கள்.

⁴அதற்கு அவர், “ஆதியிலே அவர்களை உண்டாக்கின எங்கள் பிதா, ஆணும் பெண்ணுமாக அவர்களை உண்டாக்கினார் என்பதையும், ⁵‘இதினிமித்தம் ஒரு மனிதன் தன் தகப்பனையும் தாயையும் விட்டு, தன் மனைவியோடு இணைந்திருப்பான்; அவ்விருவரும் ஒரே மாம்சமாயிருப்பார்கள்’ என்று சொல்லப்பட்டதையும் நீங்கள் வாசிக்கவில்லையா? ⁶அப்படியிருக்க, அவர்கள் இருவராயிராமல் ஒரே மாம்சமாயிருக்கிறார்கள்; ஆகையால், எங்கள் பிதா இணைத்ததை ஒருவனும் பிரிக்காதிருக்கக்கடவன்” என்றார்.

⁷அதற்கு அவர்கள், “அப்படியானால், தள்ளுதற்சீட்டைக் கொடுத்து அவளைத் தள்ளிவிடும்படி மோசே ஏன் கட்டளையிட்டான்?” என்று அவரிடம் கேட்டார்கள்.

⁸அதற்கு அவர், “உங்கள் இருதயகடினத்தினிமித்தமே உங்கள் மனைவிகளைத் தள்ளிவிட மோசே உங்களுக்கு இடங்கொடுத்தான்; ஆதிமுதலாய் அப்படியிருந்ததில்லை. ⁹நான் உங்களுக்குச் சொல்லுகிறேன்: வேசித்தனத்தினிமித்தமேயன்றி, தன் மனைவியைத் தள்ளிவிட்டு வேறொருத்தியை விவாகம்பண்ணுகிறவன் விபசாரம்பண்ணுகிறான்” என்றார்.

¹⁰அவருடைய சீஷர்கள் அவரை நோக்கி, “புருஷனுக்கும் மனைவிக்கும் இடையிலுள்ள காரியம் இப்படியிருந்தால், விவாகம்பண்ணாதிருப்பதே நலம்” என்றார்கள்.

¹¹அதற்கு அவர், “இந்த வார்த்தையை எல்லாராலும் ஏற்றுக்கொள்ள முடியாது; இது எவர்களுக்குக் கொடுக்கப்பட்டிருக்கிறதோ அவர்களால் மட்டுமே முடியும். ¹²தாயின் கர்ப்பத்திலிருந்தே அப்படிப் பிறந்த அண்ணகர் உண்டு; மற்றவர்களால் அப்படியாக்கப்பட்ட அண்ணகர் உண்டு; எங்கள் பிதாவின் ராஜ்யத்தினிமித்தம் தங்களைத்தாமே அப்படியாக்கிக்கொண்ட அண்ணகரும் உண்டு. இதை ஏற்றுக்கொள்ளக்கூடியவன் ஏற்றுக்கொள்ளக்கடவன்” என்றார்.

இயேசு சிறுபிள்ளைகளை வரவேற்கிறார்

¹³அப்பொழுது, அவர் தம் கைகளை வைத்து ஜெபம்பண்ணும்படி சிறுபிள்ளைகள் அவரிடத்தில் கொண்டுவரப்பட்டார்கள்; சீஷர்களோ அவர்களைக் கொண்டுவந்தவர்களை அதட்டினார்கள்.

¹⁴ஆனால் இயேசு, “சிறுபிள்ளைகள் என்னிடத்தில் வர இடங்கொடுங்கள்; அவர்களைத் தடைபண்ணாதேயுங்கள்; ஏனெனில் எங்கள் பிதாவின் ராஜ்யம் இவர்களைப்போன்றவர்களுடையது” என்றார்.

¹⁵பின்பு அவர் தம் கைகளை அவர்கள்மேல் வைத்து, அவ்விடம்விட்டுப் புறப்பட்டுப்போனார்.

அவனுக்குக் குறைவாயிருந்த ஒரே காரியம்

¹⁶அப்பொழுது ஒருவன் அவரிடம் வந்து, “போதகரே, நித்தியஜீவனை அடையும்படி நான் எந்த நன்மையைச் செய்யவேண்டும்?” என்று கேட்டான்.

¹⁷அதற்கு அவர், “நன்மையானதைக்குறித்து ஏன் என்னிடம் கேட்கிறாய்? நல்லவர் ஒருவரே. நீ ஜீவனில் பிரவேசிக்க விரும்பினால், கற்பனைகளைக் கைக்கொள்” என்றார்.

¹⁸“எவைகளை?” என்று அவன் கேட்டான். இயேசு சொன்னார்: “கொலை செய்யாதிருப்பாயாக, விபசாரம் செய்யாதிருப்பாயாக, களவு செய்யாதிருப்பாயாக, பொய்ச்சாட்சி சொல்லாதிருப்பாயாக, ¹⁹உன் தகப்பனையும் தாயையும் கனம்பண்ணுவாயாக, உன்னில் நீ அன்புகூருவதுபோல உன் அயலானிலும் அன்புகூருவாயாக” என்றார்.

²⁰அந்த வாலிபன் அவரை நோக்கி, “இவைகளையெல்லாம் என் சிறுவயதுமுதல் கைக்கொண்டிருக்கிறேன்; இன்னும் எனக்கு என்ன குறைவாயிருக்கிறது?” என்றான்.

²¹இயேசு அவனை நோக்கி, “நீ பூரணனாயிருக்க விரும்பினால், போய், உனக்கு உண்டானவைகளை விற்று, தரித்திரருக்குக் கொடு; அப்பொழுது பரலோகத்தில் உனக்குப் பொக்கிஷம் உண்டாயிருக்கும்; பின்பு வந்து என்னைப் பின்பற்று” என்றார்.

²²அந்த வாலிபன் இந்த வார்த்தையைக் கேட்டபோது, தனக்கு அதிக ஆஸ்தி இருந்தபடியால், துக்கத்தோடே போய்விட்டான்.

²³அப்பொழுது இயேசு தம் சீஷர்களை நோக்கி, “ஐசுவரியவான் எங்கள் பிதாவின் ராஜ்யத்தில் பிரவேசிப்பது வெகு அரிது என்று மெய்யாகவே உங்களுக்குச் சொல்லுகிறேன். ²⁴மறுபடியும் உங்களுக்குச் சொல்லுகிறேன்: ஐசுவரியவான் எங்கள் பிதாவின் ராஜ்யத்தில் பிரவேசிப்பதைப்பார்க்கிலும், ஒட்டகம் ஊசியின் காதிலே நுழைவது எளிது” என்றார்.

²⁵அவருடைய சீஷர்கள் இதைக் கேட்டபோது, மிகவும் ஆச்சரியப்பட்டு, “அப்படியானால் யார் இரட்சிக்கப்படக்கூடும்?” என்று கேட்டார்கள்.

²⁶இயேசு அவர்களைப் பார்த்து, “இது மனிதரால் முடியாத காரியம்; ஆனால் எங்கள் பிதாவினால் எல்லாம் முடியும்” என்றார்.

²⁷அப்பொழுது பேதுரு அவரை நோக்கி, “இதோ, நாங்கள் எல்லாவற்றையும் விட்டு உம்மைப் பின்பற்றினோமே; அப்படியானால் எங்களுக்கு என்ன கிடைக்கும்?” என்றான்.

²⁸அதற்கு இயேசு அவர்களை நோக்கி, “மெய்யாகவே உங்களுக்குச் சொல்லுகிறேன்: மறுஜென்மகாலத்திலே மனுஷகுமாரன் தம்முடைய மகிமையுள்ள சிங்காசனத்தில் வீற்றிருக்கும்போது, என்னைப் பின்பற்றின நீங்களும் பன்னிரண்டு சிங்காசனங்களில் உட்கார்ந்து, இஸ்ரவேலின் பன்னிரண்டு கோத்திரங்களையும் நியாயந்தீர்ப்பீர்கள்.

²⁹என் நாமத்தினிமித்தம் வீடுகளையாவது, சகோதரரையாவது, சகோதரிகளையாவது, தகப்பனையாவது, தாயையாவது, பிள்ளைகளையாவது, நிலங்களையாவது விட்டவன் எவனும் நூறத்தனை பெற்று, நித்தியஜீவனையும் சுதந்தரித்துக்கொள்வான். ³⁰ஆனாலும் முந்தினவர்கள் அநேகர் பிந்தினவர்களாயிருப்பார்கள்; பிந்தினவர்கள் அநேகர் முந்தினவர்களாயிருப்பார்கள்” என்றார்.