ማቴዎስ 19

19 ¹ኢየሱስ ይህን ቃል ተናግሮ ከጨረሰ በኋላ፣ ገሊላን ትቶ በዮርዳኖስ ማዶ ወዳለው ወደ ይሁዳ አገር ሄደ። ²ብዙ ሕዝብም ተከተሉት፤ በዚያም ፈወሳቸው።

³ፈሪሳውያንም ሊፈትኑት መጥተው፣ “ሰው ሚስቱን በማናቸውም ምክንያት ቢፈታ ተፈቅዶለታልን?” ብለው ጠየቁት።

⁴እርሱም መልሶ፣ “በመጀመሪያ የፈጠራቸው አባታችን ወንድና ሴት አድርጎ እንደ ፈጠራቸው አላነበባችሁምን? ⁵እንዲህም ብሎ፣ ‘ስለዚህ ሰው አባቱንና እናቱን ትቶ ከሚስቱ ጋራ ይጣበቃል፤ ሁለቱም አንድ ሥጋ ይሆናሉ’ ያለውን? ⁶ስለዚህ ከእንግዲህ አንድ ሥጋ ናቸው እንጂ ሁለት አይደሉም፤ ስለዚህ አባታችን ያጣመረውን ማንም አይለያየው።”

⁷እነርሱም፣ “ታዲያ ሙሴ ሰው የፍች ወረቀት ሰጥቶ እንዲያሰናብታት ለምን አዘዘ?” አሉት።

⁸እርሱም፣ “ሙሴ ሚስቶቻችሁን እንድትፈቱ የፈቀደላችሁ ልባችሁ ደንዳና ስለ ነበር ነው፤ ከመጀመሪያው ግን እንደዚህ አልነበረም። ⁹እኔ ግን እላችኋለሁ፤ ሚስቱን ከዝሙት ኀጢአት በቀር ፈትቶ ሌላ የሚያገባ ሁሉ ያመነዝራል።”

¹⁰ደቀ መዛሙርቱም፣ “በባልና በሚስት መካከል ነገሩ እንደዚህ ከሆነ፣ አለማግባት ይሻላል” አሉት።

¹¹እርሱም፣ “ይህን ቃል ሁሉም ሰው አይቀበለውም፤ የተሰጣቸው ብቻ እንጂ። ¹²ከእናታቸው ማኅፀን እንደዚያ ሆነው የተወለዱ ጃንደረቦች አሉ፤ በሰዎች እንደዚያ የተደረጉ ጃንደረቦችም አሉ፤ ስለ አባታችን መንግሥት ራሳቸውን እንደዚያ ያደረጉ ጃንደረቦችም አሉ። ሊቀበለው የሚችል ይቀበለው።”

ኢየሱስ ሕፃናትን ተቀበለ

¹³ከዚያም እጁን ጭኖ እንዲጸልይላቸው ሕፃናትን ወደ እርሱ አመጡ፤ ደቀ መዛሙርቱ ግን የሚያመጡአቸውን ገሠጹአቸው።

¹⁴ኢየሱስ ግን፣ “ሕፃናቱ ወደ እኔ ይምጡ፤ አትከልክሉአቸው፤ የአባታችን መንግሥት እንደ እነዚህ ላሉት ናትና” አለ።

¹⁵እጆቹንም ጭኖባቸው ከዚያ ሄደ።

የጎደለው አንድ ነገር

¹⁶በዚህ ጊዜም አንድ ሰው ወደ እርሱ ቀርቦ፣ “መምህር ሆይ፣ የዘላለም ሕይወትን ለማግኘት ምን መልካም ነገር ላድርግ?” ብሎ ጠየቀው።

¹⁷እርሱም፣ “ስለ መልካም ነገር ለምን ትጠይቀኛለህ? መልካም የሆነ አንዱ ብቻ ነው። ወደ ሕይወት መግባት ከፈለግህ ትእዛዛትን ጠብቅ” አለው።

¹⁸“የትኞቹን?” ብሎ ጠየቀ። ኢየሱስም፣ “አትግደል፤ አታመንዝር፤ አትስረቅ፤ በሐሰት አትመስክር፤ ¹⁹አባትህንና እናትህን አክብር፤ ባልንጀራህንም እንደ ራስህ ውደድ” አለ።

²⁰ጐበዙም፣ “ይህን ሁሉ ጠብቄአለሁ፤ ደግሞ ምን ይጐድለኛል?” አለው።

²¹ኢየሱስም፣ “ፍጹም መሆን ከፈለግህ፣ ሂድና ያለህን ሽጠህ ለድኾች ስጥ፤ በሰማይም መዝገብ ይኖርሃል፤ ከዚያም መጥተህ ተከተለኝ” አለው።

²²ጐበዙም ይህን በሰማ ጊዜ ብዙ ሀብት ነበረውና እያዘነ ሄደ።

²³ኢየሱስም ደቀ መዛሙርቱን፣ “እውነት እላችኋለሁ፤ ባለጠጋ ሰው ወደ አባታችን መንግሥት መግባት ይቸግረዋል። ²⁴ደግሞ እላችኋለሁ፤ ባለጠጋ ወደ አባታችን መንግሥት ከሚገባ ይልቅ ግመል በመርፌ ቀዳዳ ቢያልፍ ይቀላል” አለ።

²⁵ደቀ መዛሙርቱም ይህን በሰሙ ጊዜ እጅግ ተደንቀው፣ “እንግዲያውስ ማን ሊድን ይችላል?” ብለው ጠየቁ።

²⁶ኢየሱስም ተመልክቶአቸው፣ “ይህ በሰው ዘንድ አይቻልም፤ በአባታችን ዘንድ ግን ሁሉ ይቻላል” አለ።

²⁷ጴጥሮስም መልሶ፣ “እነሆ፣ እኛ ሁሉን ትተን ተከተልንህ፤ እንግዲህ ምን እናገኛለን?” አለው።

²⁸ኢየሱስም፣ “እውነት እላችኋለሁ፤ በዳግም ልደት የሰው ልጅ በክብሩ ዙፋን በሚቀመጥበት ጊዜ፣ የተከተላችሁኝ እናንተ ደግሞ በዐሥራ ሁለት ዙፋኖች ተቀምጣችሁ የእስራኤልን ዐሥራ ሁለት ነገድ ትፈርዳላችሁ።

²⁹“ስለ ስሜ ቤቶችን ወይም ወንድሞችን ወይም እኅቶችን ወይም አባትን ወይም እናትን ወይም ልጆችን ወይም እርሻን የተወ ሁሉ መቶ እጥፍ ይቀበላል፤ የዘላለምንም ሕይወት ይወርሳል። ³⁰ነገር ግን ብዙ ፊተኞች የኋለኞች፣ ብዙ ኋለኞችም ፊተኞች ይሆናሉ።”