ማቴዎስ 19 FHB Father's Heart Bible™

19 ¹ኢየሱስ እዝ ቃላት እዙይ ምስ ወድአ፥ ካብ ገሊላ ወፂኡ ናብቲ ኣብ ማዕዶ ዮርዳኖስ ዘሎ ሃገር ይሁዳ መፀ። ²ብዙሕ ህዝቢ ድማ ተኸተልዎ፤ ኣብኡ ኸዓ ኣሕወዮም።

³ፈሪሳውያን ድማ ክፍትንዎ መፁ እሞ “ሰብኣይ ብዝኾነ ምኽንያት ንሰበይቱ ክፈትሕ ይፍቀደሉዶ?” ኢሎም ጠየቕዎ።

⁴ንሱ ኸዓ “ኣቦና እቲ ብመጀመርታ ዝፈጠሮም፥ ተባዕታይን ኣንስተይትን ጌሩ ኸም ዝፈጠሮም ኣየንበብኩምን ዲኹም? ⁵‘ስለዙይ ሰብኣይ ኣቦኡን እኖኡን ሓዲጉ ምስ ሰበይቱ ይፅጋዕ፤ ክልቲኣቶም ድማ ሓደ ስጋ ይኾኑ’ ዝበለ ኣየንበብኩምን ዲኹም?” ኢሉ መለሰሎም። ⁶“ስለዙይ ድሕሪ ደጊም ሓደ ስጋ እዮም እምበር ክልተ ኣይኮኑን፤ እምበኣር ነቲ ኣቦና ዘጋጠሞ ሰብ ኣይፈልዮ።”

⁷ንሳቶም ድማ “እንተ ኾይኑስ ሙሴ ስለምንታይ ‘ናይ መፍትሒኣ ፅሑፍ ሂቡ ይስደዳ’ ኢሉ ኣዘዘ?” በልዎ።

⁸ንሱ ኸዓ “ሙሴ ጭካነ ልብኹም ስለ ዝነበረ ኢዩ ንኣንስትኹም ክትፈትሑ ዝፈቐደልኩም እምበር፥ ካብ መጀመርታ ግና ከምኡ ኣይነበረን። ⁹ኣነ ኸዓ፥ ብዘይ ምኽንያት ዝሙት ንሰበይቱ ፈቲሑ ኻልእ ዘእቱ ዅሉ ይዝሙ እዩ፥ እብለኩም ኣለኹ” በሎም።

¹⁰ደቀ መዛሙርቱ ድማ “ፍልልይ ሰብኣይን ሰበይትን ከምዙይ እንተ ኾይኑስ፥ ዘይምምርዓው ይሓይሽ” በልዎ።

¹¹ንሱ ኸዓ “ነዝ ቃል እዙይ ነቶም ዝተውሃቦም እንተ ዘይኮይኑ፥ ኵሉ ኽቕበሎ ኣይክእልን እዩ። ¹²ካብ ከብዲ እኖኦም ጀሚሮም ስልቡ ዝተወለዱ ስልብ ኣለዉ፤ ብሰብ ዝተሰለቡ ስልብ ኣለዉ፤ ምእንቲ መንግስቲ ኣቦና ኢሎም ባዕልቶም ዝተሰለቡ ስልብውን ኣለዉ። እቲ ኽቕበሎ ዝኽእል ይቀበሎ” በሎም።

ኢየሱስ ንንኣሽቱ ህፃውንቲ ተቐበሎም

¹³ሽዑ ኢዱ ኣንቢሩ ምእንቲ ክፅልየሎም፥ ንኣሽቱ ህፃውንቲ ናብኡ ኣምፅእዎም፤ ደቀ መዛሙርቱ ግና ነቶም ዘምፅእዎም ገሰፅዎም።

¹⁴ኢየሱስ ግና “መንግስቲ ኣቦና ናይ ከምዚኣቶም እያ እሞ፥ ንኣሽቱ ህፃውንቲ ናባይ ይምፅኡ ሕደግዎም እምበር ኣይትኽልክልዎም” በሎም።

¹⁵ኢዱ ድማ ኣንበረሎም፤ ካብኡ ኸዓ ኸደ።

እታ ዝጐደለቶ ሓንቲ ነገር

¹⁶እንሆ ድማ ሓደ ሰብ ናብኡ ቀሪቡ “መምህር፥ ናይ ዘለኣለም ህይወት ምእንቲ ኽረክብ፥ እንታይ ፅቡቕ ክገብር ኣለኒ?” ኢሉ ጠየቖ።

¹⁷ንሱ ኸዓ “ብዛዕባ ፅቡቕ ስለምንታይ ትሓተኒ? ፅቡቕ፥ በይኑ ሓደ እዩ። ናብ ህይወት ክትኣቱ እንተ ደሊኻ ግና፥ ትእዛዛት ሓሉ” በሎ።

¹⁸“ኣየኖት?” ኢሉ ጠየቖ። ኢየሱስ ድማ “ኣይትቕተል፥ ኣይትዘሙ፥ ኣይትስረቕ፥ ብሓሰት ኣይትመስክር፥ ¹⁹ነቦኻን እኖኻን ኣኽብር፥ ንብፃይካውን ከም ነፍስኻ ኣፍቅር” በሎ።

²⁰እቲ ጐበዝ ድማ “እዝ ኵሉ ሓልየ እየ፤ ገና እንታይ ይጐድለኒ?” በሎ።

²¹ኢየሱስ ድማ “ፍፁም ክትከውን እንተ ደሊኻ፥ ኪድ እሞ ጥሪትካ ሺጥካ ንድኻታት ሃብ፤ ኣብ ሰማይ ከዓ ሃብቲ ክትረክብ ኢኻ፤ ድሕሪኡ መፂእኻ ተኸተለኒ” በሎ።

²²እቲ ጐበዝ እዙይ ምስ ሰምዐ ግና፥ ብዙሕ ጥሪት ነበሮ እሞ፥ እናጐሃየ ኸደ።

²³ኢየሱስ ድማ ንደቀ መዛሙርቱ “ብሓቂ እብለኩም ኣለኹ፥ ሃብታም ሰብ ናብ መንግስቲ ኣቦና ክኣቱ ኣፀጋሚ እዩ። ²⁴ከም ብሓድሽ ድማ እብለኩም ኣለኹ፥ ካብ ሃብታም ሰብ ናብ መንግስቲ ኣቦና ምእታው፥ ግመል ብዓይኒ መርፍእ ክትሓልፍ ይቐልል” በሎም።

²⁵ደቀ መዛሙርቱ እዙይ ምስ ሰምዑ፥ እምብዛ ተገሪሞም “እምበኣር መን እዩ ክድሕን ዝኽእል?” ኢሎም ጠየቑ።

²⁶ኢየሱስ ድማ ጠሚቱ “እዙይ ንሰብ ዘይከኣል እዩ፤ ንኣቦና ግና ኵሉ ይከኣል እዩ” በሎም።

²⁷ሽዑ ጴጥሮስ መሊሱ “እንሆ፥ ንሕና ኵሉ ሓዲግና ተኸተልናካ፤ እምበኣር እንታይ ክንረክብ ኢና?” በሎ።

²⁸ኢየሱስ ድማ “ብሓቂ እብለኩም ኣለኹ፥ በቲ ሓድሽ ትውልዲ፥ ወዲ ሰብ ኣብ ዙፋን ክብሩ ምስ ተቐመጠ፥ ንስኻትኩም እቶም ዝተኸተልኩምኒ ድማ ኣብ ዓሰርተ ክልተ ዙፋናት ተቐሚጥኩም፥ ነተን ዓሰርተ ክልተ ነገድ እስራኤል ክትፈርድዎም ኢኹም።

²⁹“ኵሉ ምእንቲ ስመይ ኢሉ ኣባይቲ ወይ ኣሕዋት ወይ ኣሓት ወይ ኣቦ ወይ እኖ ወይ ውሉድ ወይ ግራውቲ ዝሓደገ፥ ሚእቲ ኢድ ክረክብ እዩ፤ ናይ ዘለኣለም ህይወት እውን ክወርስ እዩ። ³⁰ብዙሓት ቀዳሞት ግና ዳሕሮት ክኾኑ እዮም፤ ብዙሓት ዳሕሮትውን ቀዳሞት ክኾኑ እዮም።”