ማቴዎስ 20 FHB Father's Heart Bible™

20 ¹“መንግስቲ ኣቦና ፥ ንኣታኽልቲ ወይኑ ሰራሕተኛታት ክቚፅር ኣንጊሁ ዝወፀ ሓደ በዓል ግራት ትመስል። ²ነቶም ሰራሕተኛታት ናይ ሓደ መዓልቲ ዓስቢ ኽኸፍሎም ተሰማምዐ፤ ናብ ኣታኽልቲ ወይኑ ድማ ለኣኾም። ³ኣስታት ሰለስተ ሰዓት ኣቢሉ ወፂኡ ፥ ካልኦት ኣብ ዕዳጋ ስራሕ ኣብዘይብሎም ደው ኢሎም ረኣዮም። ⁴ንሳቶም ድማ “ንስኻትኩምውን ናብ ኣታኽልቲ ወይኒ ኺዱ ፤ ዝግባእ ከዓ ክኸፍለኩም እየ” በሎም። ንሳቶምውን ከዱ። ⁵ከምኡ ኸዓ ፍርቂ መዓልቲ ኣቢሉ፥ ትሽዓተ ሰዓት ኣቢሉ ከዓ ደጊሙ ወፂኡ፥ ከምኡ ገበረ። ⁶ኣስታት ዓሰርተ ሓደ ሰዓት ኣቢሉ ወፂኡ ፥ ካልኦት ኣብኡ ደው ኢሎም ረኸበ። “ስለ ምንታይ ምሉእ መዓልቲ ስራሕ ኣብዘይብልኩም ኣብዙይ ደው ኢልኩም?” ድማ በሎም።”

⁷ንሳቶም ድማ “ዝቘፀረና ሰብ ስለ ዘይነበረ እዩ” በልዎ። ንሱ ኸዓ “ንስኻትኩምውን ናብ ኣታኽልቲ ወይኒ ኺዱ” በሎም።

⁸ምሸት ምስ ኮነ፥ እቲ በዓል ኣታኽልቲ ወይኒ ነቲ ሓለቓ ሰራሕተኛታት “ነቶም ሰራሕተኛታት ፀዊዕኻ፥ ካብ ናይ መወዳእታ ጀሚርካ ክሳዕ ናይ ቀዳማይ ዓስቦም ክፈሎም” በሎ። ⁹እቶም ኣስታት ዓሰርተ ሓደ ሰዓት ዝተቘፀሩ ምስ መፁ ድማ ፥ ነፍሲ ወከፎም ናይ ሓደ መዓልቲ ዓስቢ ተቐበሉ። ¹⁰እቶም ቀዳሞት ምስ መፁ ፥ ዝበዝሕ ዝረኽቡ መሰሎም ፤ ንሳቶም ግና ነፍሲ ወከፎም ናይ ሓደ መዓልቲ ዓስቢ ረኸቡ። ¹¹ምስ ተቐበሉ ድማ ኣብ ልዕሊ እቲ በዓል ግራት ኣጕረምረሙ ፥ ¹²እናበሉ ኸዓ “እዚኣቶም ናይ መወዳእታ ሓንቲ ሰዓት ጥራሕ እዮም ዝሰርሑ ፤ ንስኻ ግና ፥ ንሕና ኽብደት እታ መዓልትን ረስኒ ሃሩርን ዝፃወርና ፥ ምሳና ማዕረ ገበርካዮም።”

¹³ንሱ ኸዓ ንሓደ ኻባታቶም ኢሉ መለሰሉ፥ “ዓርከይ፥ ኣነ ኣይበደልኩኻን። ናይ ሓደ መዓልቲ ዓስቢ ምሳይዶ ኣይተሰማማዕካን? ¹⁴ናትካ ወሲድካ ኺድ። ነዝ ናይ መወዳእታ ሰራሕተኛ ፥ ከምቲ ናትካ ኽህቦ እደሊ ኣለኹ። ¹⁵በቲ ናተይ፥ ዝደለኽዎዶ ኽገብር ኣይፍቀደለይን እዩ? ወይ ኣነ ለጋስ ስለ ዝኾንኩ፥ ትቐንእ ኣለኻ? ¹⁶ስለዙይ እቶም ናይ መወዳእታ ቀዳሞት ፥ እቶም ቀዳሞት ድማ ናይ መወዳእታ ክኾኑ እዮም።”

ኢየሱስ ብዛዕባ መስቀል ኣቐዲሙ ይንግር

¹⁷ኢየሱስ ናብ ኢየሩሳሌም ክድይብ እንተሎ ፥ ነቶም ዓሰርተ ኽልተ ንበይኖም ወሲዱ ፥ ኣብ መንገዲ ኸምዙይ በሎም፦

¹⁸“እንሆ ፥ ናብ ኢየሩሳሌም ንድይብ ኣለና ፤ ወዲ ሰብ ድማ ናብ ሊቃነ ካህናትን መምህራን ሕግን ኣሕሊፉ ክውሃብ እዩ ፤ ንሳቶም ከዓ ናብ ሞት ክፈርድዎ እዮም ፥ ¹⁹ንኣህዛብ ድማ ከላግፁሉን ክገርፍዎን ክሰቕልዎን ኣሕሊፎም ክህብዎ እዮም ፤ ኣብ ሳልሳይ መዓልቲ ኸዓ ክትንስእ እዩ።”

ናይ ሓቂ ዕቤት ምግልጋል እዩ

²⁰ሽዑ ኣደ ደቂ ዘብዴዎስ ምስ ደቃ ናብኡ መፂኣ፥ ተምበርኪኻ ገለ ነገር ለመነት።

²¹ንሱ ኸዓ “እንታይ ትደልዪ ኣለኺ?” በላ። ንሳ ድማ “እዚኣቶም ክልተ ደቀይ፥ ኣብ መንግስትኻ፥ ሓደ ብየማን ኢድካ፥ ሓደ ኸዓ ብፀጋም ኢድካ ኽቕመጡ ኣዝዝ” በለቶ።

²²ኢየሱስ ግና ኢሉ መለሰ ፥ “እትልምንዎ ዘለኹም ኣይትፈልጡን ኢኹም። ነታ ኣነ ኽሰትያ ዝቐረብኩ ፅዋ ክትሰትይዋዶ ትኽእሉ ኢኹም?” በሎም። ንሳቶም ድማ “ንኽእል ኢና” በልዎ።

²³ንሱ ኸዓ “ፅዋዐይ ክትሰትዩ ኢኹም፤ ብየማን ኢደይን ብፀጋም ኢደይን ምቕማጥ ግና፥ ነቶም ኣቦይ ዘዳለዎሎም ደኣ እምበር፥ ኣነ ዝህቦ ኣይኮነን” በሎም።

²⁴እቶም ዓሰርተ ኸዓ እዙይ ምስ ሰምዑ፥ በቶም ክልተ ኣሕዋት ተቘጥዑ።

²⁵ኢየሱስ ድማ ፀዊዑ ኸምዙይ በሎም፦ “መራሕቲ ኣህዛብ ኣብ ልዕሊኦም ከም ዝገዝኡ ፥ ዓበይቶም ድማ ኣብ ልዕሊኦም ስልጣን ከም ዝሕዙ ፥ ትፈልጡ ኢኹም። ²⁶ኣባኻትኩም ግና ከምኡ ኣይኹን። እቲ ኣባኻትኩም ዓብዪ ክኸውን ዝደሊ ደኣ፥ ኣገልጋልኹም ይኹን እምበር፤ ²⁷እቲ ኣባኻትኩም ቀዳማይ ክኸውን ዝደሊ ድማ ፥ ባርያኹም ይኹን ፤ ²⁸ከምቲ ወዲ ሰብ፥ ክግልገል ዘይኮነስ፥ ከገልግል፥ ህይወቱ ኸዓ ቤዛ ብዙሓት ክህብ ዝመፀ እዩ።”

ክልተ ዕዉራት ምርኣይ ይረኽቡ

²⁹ካብ ኢያሪኮ ኽወፁ እንተለዉ፥ ብዙሕ ህዝቢ ተኸተልዎ። ³⁰ኣብ ጥቓ መንገዲ ተቐሚጦም ዝነበሩ ክልተ ዕዉራት ፥ ኢየሱስ ይሓልፍ ከም ዘሎ ሰሚዖም ፥ “ኦ ጐይታ ፥ ወዲ ዳዊት ፥ ምሓረና!” ኢሎም ኣእወዩ። ^a a v30 “ወዲ ዳዊት” ዝብል ፥ ካብ ንጉሳዊ ሓረግ ዳዊት ንዝመፅእ ፥ ተስፋ ዝተውሃቦ ንጉስ ዘመልክት ፥ ኣብ መንጎ ኣይሁድ ኣፀቢቑ ዝፍለጥ ማዕርግ ነበረ። ³¹እቶም ህዝቢ ድማ ስቕ ክብሉ ገሰፅዎም ፤ ንሳቶም ግና “ኦ ጐይታ ፥ ወዲ ዳዊት ፥ ምሓረና!” እናበሉ ዝያዳ ኣእወዩ።

³²ኢየሱስ ድማ ደው ኢሉ ፀውዖም ፥ “እንታይ ክገብረልኩም ትደልዩ?” በሎም።

³³ንሳቶም ድማ “ኦ ጐይታ ፥ ኣዒንትና ኽኽፈታልና” በልዎ።

³⁴ኢየሱስ ድማ ራሂሩሁ ፥ ኣዒንቶም ተንከየ ፤ ሽዑ ንሽዑ ኸዓ ምርኣይ ረኺቦም ተኸተልዎ።