Mei Kou Bahwan lang ani Pa om Baning
Jisu na kai karungnu om lang bi, tan bina ani Pa na bani ding kapaisa le kamaisa ding dam thang ngaaknu lang han ong rwe, potroi rwanna twei swak ongnu naosen rwan ding lou thang rwe, khatle kasanu lungsanu reizuni khat khou, Baom pot bingza yonluga piro diga rinne. Maan ga sung riangrega se swak rwe. Mi nun lang to ngam maknu bing ga, ani Pa lang ga to ngamnuwe.
19 1Jisu na hei chong bing rin loinu kaan bi, Maan Galilee bathan satluga Jordan raan la amnu Judea taram khou se ngaake. 2Mi khang liannuna Bating lumsu rwe, atiga Maanna habei ga bani ding pi sa thang rwe.
3Pharisee rwanna Bating tam lang hungluga Bakhou ngaiye, “Mi khatna balang khatcha lang bina bamei ding kanoinuwa zabo?”
4Maanna katake, “Tan bina bani dam thangnu ani Pa na, bani ding kapaisa le kamaisa ding dam thang ngaake dinu, nanina kor make ngaakpo, 5khatle Maanna rinne, ‘Atibriakpina mi khatna bapa banu bathan satluga bamei le ong bachamlune, khatle kani ga sa khatcha tolune’? 6Atibriakpina bani kani makka atiyeda sa khatcha gaye; atibriakpina ani Pa na kai karung thang damnu ga mi khatchanale to kapaang lat mak ting ngo.”
7Banina Bakhou rinne, “Atibriakpina pa-aam briakpina Moses na, mi khatna mei kanoi chonghiak piluga bamei ding kanoi sat ding ngo, diga zathang ngaakpo?”
8Maanna bani khou rinne, “Nani sung indeh briakpina Moses na nani mei rwan ding kanoi lang za thang ngaake, atiyeda tan bina ga hadanga ong make ngaake. 9Eina nani khou rinnuwe, tudannu pakhatna, lungkoi lungmaannu lang bina makka, bamei ding kanoi satluga pakhat ting kou latnu maan ga lungkoi lungmaannu chwan tonuwe.”
10Potroi rwanna Bakhou rinne, “Basan le bamei lak pi hadanga ong dabe, mei kou maknu na sa inkuwe.”
11Maanna bani khou rinne, “Mi bingna heiba chong ding lou chui make, atiyeda haga pi thang damnu nun ga lou chuinuwe. 12Banu bon sung bina hadanga ponnu mei kou theilan maknu kapaisa bing amme; mi kateina hadanga to thang damnu mei kou theilan maknu kapaisa bing amme; khatle ani Pa om krwang talei lang bina baraanto hadanga to thang damnu mei kou theilan maknu kapaisa bing le amme. Heiba lou chuinu maan ga louro.”
Jisu na Naosen Ritnu ding Loukhut Thangnu
13Haba kaan bi, balu chung bi Bakut banaan thangluga kalum lang, naosen rwan ding Bakhou kalwang hung rwe, atiyeda potroi rwanna bani ding kalwang hungnu nun ding cheksin rwe.
14Atiyeda Jisu na rinne, “Naosen rwan ding Akhou hung ding ngo, bani ding bang mako, balangbe ani Pa om krwang talei ga hei dannu nun omme.”
15Atiga Maanna balu chung bi Bakut banaan thangluga, habei gana se ngaake.
Maan Lang Kabaatnu Pot Khatcha
16Atiga, manpa khatna Bakhou hungluga ngaiye, “Bachuthangnupa, eina pa-aam kasanu toluga ringzoknu kum lousunu ngambo?”
17Maanna bakhou rinne, “Kasanu lang bina pa-aam briakpina Akhou ngaibo? Pakhat chana kasanuwe. Nangna ringnu bi khut langnu bathai dabe, zathang bing nga zeiyo.”
18“Ingaana bing gabo?” diga maanna ngaiye. Jisu na rinne, “Mi athat mako, lungkoi lungmaannu chwan to mako, baru sa mako, kakoinu sake pi mako, 19nanu napa ding takung tazeiyo, khatle nakim raan la amnu mi ding naraanto danga kriang ngo.”
20Katangpa gana Bakhou rinne, “Hei bing nga eina zei dam rwe. Atun le eina pa-aam baat maangbo?”
21Jisu na bakhou rinne, “Nangna lingsek tonu bathai dabe, seluga, naom lan bing zwan satluga lungsianu nun ding piyo, atiga nang tambaan la lan amlune, atiga hungluga Ating lumsuro.”
22Katangpa gana hei chong ngaisunu kaan bi, maan lan tam takka am briakpina, maan sung riangrega thou drwe.
23Jisu na Bapotroi rwan khou rinne, “Batak sekka Eina nani khou rinnuwe, lungsanu mi khatna ani Pa om krwang talei khutnu gehu make. 24Leng Eina nani khou rinnuwe, ani Pa om krwang talei lungsanu mi khatna khutnu bina, ut khatna kaphin kana bi lon brwannu ga bai inkuwe.”
25Potroi rwanna hei ngaisunu kaan bi, bani taswang khak lang loh lo ngaake, atiga ngaiye, “Atibriakpina tu ga kan thangnu ngamgabo?”
26Jisu na bani ding phaangluga rinne, “Hei ga misa lang hung tang make, atiyeda ani Pa khou ga pot bingza hung tang zanuwe.”
27Haba kaan bi Peter na Bakhou rinne, “Phaang ngo, anina pot bingza bathan satluga Nang lumsu rwe. Atibriakpina anina pa-aam lousu dingbo?”
28Jisu na bani khou rinne, “Batak sekka Eina nani khou rinnuwe, pi kathan thangnu kaan bi, Misa Sa Kapaisa Bating lwat liannu takung riak pi badung ongnu kaan bi, Ating lumsu damnu nani le takung riak somga kani chung bi badung ongluga Israel chaat somga kani ding chong kasem lang nge.
29Tudannu Ameng lang bina, in bing mak tabe bau banao rwan mak tabe bapa banu mak tabe basa rwan mak tabe bataram bathan satnu maan ga, raza khak inkuga lousulune, khatle ringzoknu kum le lousulune. 30Atiyeda kama ongnu mi taswang khakna loinu tolune, khatle loinu mi taswang khakna kama tolune.”