Mi eng' bukuit

Matayo 19 FHB Father's Heart Bible™

Kiistoi 15% eng' kiy ne iale korook →
Bukuit

Chobetap Kwandanyo agobo Tunisyet

Kotononchi Jeso tunet eng' ole ki yai Kwandanyo icheek eng' taunet, kitaachi lagok che ki kergong' kasubik, ak koleenji murenindet ne karaaran ne tinyei kimnateet koale tuguukyik tugul. Kowo koriirei. Kiy ne ma muuchi eng' piik ko muuchiksei eng' Kwandanyo.

Sura 19.

Ye kingo kagobata Jeso ng'aleechu, koistoegei Galilaya, ak kowo komoswegap Judea, che mi pitoniin po Jordan. Ki subu ineendet tuiyosyek che chaang', ak kosap icheek eng' olooto.

Ki pwa Pharisaik kotyem ineendet, koteebe, koleen, “Tos kanyool chii koonei osotyonnyi agobo ng'olyoo age tugul?”

Kowol koleenji, “Tos ma osomani ole ki toi Kwandanyo icheek eng' taunet, koyai icheek muren ak kwony, ak komwa kole, ‘Nooto anyun koisto chii kwandanyi ak kamennyi, ak konamgei ak osotyonnyi, ak koegu aeng' korotiik agenge’? Nooto anyun ko ma kimi aeng' agoi, ago korotiik agenge; nooto anyun, amat kosep chii ne kagoyookta Kwandanyo.”

Koleenji ineendet, “Lyon anyun ne ki ng'at Musa kole ingogoochi chii sireet ne po peesyet ak koon osotyonnyi?”

Koleenji icheek, “Ki cham Musa oonei osotyosyekwok amu ki keen mugulelwekwok, ago ma ki uu nooto eng' taunet. Ale amwaiwok, age tugul ne bagaakta osotyonnyi, kobatee agobo sokseet, ak kotun age, ko kabaigei.”

Koleenji kasubik, “Ngot ko uu nooto ng'olyootap chii ak osotyonnyi, ko karaaran ma kotun chii.”

Koleenji icheek, “Ma imuuchi chii age tugul kotaach ng'olyoondoni, ago icheek kityo che ki kigoochin. Mi piik che ki sichei ko ma machei kotun kobun moogegap kameetwogik; ak mi piik che ki iyai piik alak ko ma machei kotun; ak mi piik che kagoyachigei icheegei ko ma machei kotun amu laitornatetap Kwandanyo. Ingotaach chiichooto ne imuuchi kotaach.”

Taachei Jeso Lagok che Mengechen

Kiito kityo lagok che mengeechen ole mi ineendet, si konde euneguk kong' ak kosaa, ago ki kergong' kasubik piik che ki ipchin icheek.

Ago komwa Jeso kole, “Chamak konyo ole amiit lagok che mengeechen, amat oter icheek, amu po piik che uu chu laitornatetap Kwandanyo.”

Ak konde euneguk kong', ak kong'etee olooto koba.

Kiy Agenge ne Ki Rarta

Kiriikta kityo chii ole mi ineendet, ak koteebe, koleen, “Kaneetindet, nee ne myee ne anyol ayai si anyoor saboondap koigeny?”

Koleenji, “Lyon si iteba anee agobo ne myee? Agenge kityo ne myee. Ngo imache ichut saboondo, iriip ng'atuutik.”

Koleenji, “Che ano?” Kowolji Jeso koleenji, “Amerumisye, amogesesen, amochoorse, amebaoryanji eng' lembech, inyit kwandang'ung' ak kamenng'ung', ak icham chiitap kokweng'ung' ko uu inyee.”

Koleenji murenonooto ne lakwaanat, “Chuuto tugul kagariip. Nee ne tagarareiwo?”

Koleenji Jeso, “Ngo imache iegu ne kaitugul, ui, ial tuguuguk ak igoochi piich che poorto—tun itinye konorwet eng' kipsengwet—yeityo inyo, isubwo.”

Ye kingo kogas niito murenonooto, koba koteechingei, amu ki tinyei mogornateet ne oo.

Koleenji Jeso kasubikyik, “Iman, amwaiwok ale: kiim miising' koyan mogoryot kochut laitornatetap Kwandanyo. Amwaiwok kogeny ale: nyumnyumit kochut tambeesyet koneetap sindaanit, kosir mogoryot kochut laitornatetap Kwandanyo.”

Ye kingo kogas niito kasubik, ki kwong'yo miising', ak koteebe, koleen, “Ng'oo anyun ne imuuchi kosar?”

Ki ger Jeso icheek kole, “Ma kiim niito eng' piik, ago imugaksei tuguuk tugul eng' Kwandanyo.”

Koleenji anyun Petero, “Ogeer, kagiisto tuguuk tugul ak kagisubin. Nee anyun ne kitun?”

Koleenji Jeso icheek, “Iman: eng' lelutyet, ye tun kotebee Weeriitap chii ng'echereetap kalasunennyi, otebee agobo okweek che kisubi anee ng'echerok taman ak aeng', orwookyini ortinwek taman ak aeng' che po Israel.

Age tugul ne kagoisto kooriik anan tupchosyek anan sanganik anan kwanda anan kamet anan lagok anan mbareenik amu kainennyu, ko konyooru kwogetap pogol, ak kochaam saboondap koigeny. Ago chaang' che po tai che tun koek che po let, ak chaang' che po let che tun koek che po tai.”