Matthew 18

18 ¹Chitharan sākhangatha̱bingna Jishuwui ngalemli rāngahāna, "Chithākha, ithumwui Avā wungramli khipā reimeikapkhala?"

²Nao kateo akhali awui ngalemli hoda, ana nao chi athumwui ngachaili haida,

³kala hānga, "Ina nathumli kachangkhat kahāngna: nathum mangalanla nao kateobing thāda masaakha, nathum khipākha ithumwui Avā wungramli mazanglakmara. ⁴Chiwui vang eina, nao kateo hi thāda khalatta kateowa a china ithumwui Avā wungramli reimeikap. ⁵Kala iwui ming eina hikathā nao kateo akhali zang khangasaka a china ili zang ngasaka."

Kateobingli Phei Ngaphok Ngasakki

⁶"Kha ili shitkasanga kateobing hiwui eina akhali phei ngaphok ngasaka a chi, akahungli lungriham kariti akha hokthāngmihailaga ngayiwui kathukali horsang kahaina awui vang phāmei."

⁷"Phei ngaphok ngasakki otbingwui vang okathuiwui vang kalākashi! Chibing rāphalungra, kha chi khuirā a chiwui vang kalākashi. ⁸Nawui pāng lah nawui pheina nali phei ngaphok ngasakakha, katatlaga latshokhaolu. Pāng khani lah phei khani kālaga katang makhavai meilungli horsangki kajile, pāng katek lah phei katek eina kharingli kazang phāmei." ⁹Namikna nali phei ngaphok ngasakakha, phokshoklaga latshokhaolu. Mik khani kālaga kazeiramwui meilungli horsangki kajile, mik akha eina kharingli kazang phāmei.

Avāna Shimān Kahai Yaonao Akhali Phākhui

¹⁰"Nathumna yangchaolu, kateobing hiwui eina akhali maningkachaialu. Ina nathumli kahāngna, athumwui kazingraobingna kazingramli atam kachida iwui Avāwui mai thei." ^a a v10 Achālakha kagapibingli hili verse 11 maleimana; thili kagapibingna hi shichinhai: "Kaja miwui Naomayarana shimān kahaibingli huimi khavai kharāna."

¹²"Nathumna kathada shānkhui? Mi akhana yao shākha leiakha, kala akha ma̱thuiakha, ana kaphungli hangchikoda chiko chi ngachakyānghaida, ma̱thui kahai akha chili phākhui khavai mazatmalā? ¹³Ana chi samphangakha, ina nathumli kachangkhat kahāngna, ma̱thui makahai hangchikoda chiko chiwui vangla, chi akhawui vang ana mathānmeira. ¹⁴Chithāda, kateobing hiwui eina akhala shimānhaora da, kazingramli khalei nathumwui Avāwui ning maningmana.'

Nachināna Nali Morei Sa Tharan

¹⁵"Nachināna nali morei saakha, zatlaga nanimāng ngasopamda ali awui khayon chitheilu. Ana nganaakha, nana nachināli yuihaira. ¹⁶Kha ana manganaakha, khangatei akha lah khani nala thānphunglu, chithāda shākhi khani lah kathumwui khamor eina ot kachiva̱ nganingra. ¹⁷Ana athumli manganaakha, churchli hānglu. Ana churchlila manganaakha, ali kha̱mi lah khāshinā khaloka thāda sālu. ¹⁸Kachangkhat eina ina nathumli kahāngna, okathuili nathumna khalapta kachiva̱ chi kazingramli khalap ngasāra, kala okathuili nathumna khalā kachiva̱ chi kazingramli khalā ngasāra. ¹⁹Latluida, kachangkhat eina ina nathumli kahāngna: nathumwui ngachaili khani okathuili athumna kapopo ot akha ngaraichaiakha, kazingramli khalei iwui Avāna athumwui vang sāmira. ²⁰Khikhalajila khipam khani lah kathum iwui ming eina ngarumlaga kazipakha, apam chili ina athumwui ngachaili leira."

Avāwui Pheomi kala Ithumwuina

²¹Chieina Peterna Jishuli khavāda hānga, "Proho, iwuili morei kasā iwui achināli ina kayākhashida pheomirakhala? Shini shida eina tangda?"

²²Jishuna ngahānkai, "Ina nali kahāngna, shini shida maningla, hangshinida shini shida pheomilu. ²³Chiwui vang eina ithumwui Avā wungram hi awui raobingli ngasoda hishap sākhangai awunga akhathāna. ²⁴Ana hishap sā chitheiya tharan, lupā kachungkha shukhai mi akha awui mangāli khuirai. ²⁵Ana runkhavai matangwui vang, awui akhavāna ali, apreiva̱li, anaongarāli, kala awui khalalei saikorali yorkhuilaga leiman runhaikhavai kasoi."

²⁶Chieina rao china awui mangāli khuktizangta, poda hānga, "Ili khangaraimilu, kala ina saikora runra. ²⁷Chi raowui akhavā china lukhamashana pemtinghaida, ali shokngasaka, kala awui leiman pheomi."

²⁸"Chi rao china shokta, awuili lupā shākha shukhai raoruma akha leisāda, ali yonkhuilaga chokahai chitheida hānga, 'Nana iwuili shukhai chi runlu!'"

²⁹Chieina awui raoruma china khuktizangta, ali poda hānga, "Ili khangaraimilu; ina nali runra. ³⁰Kha ana mamayāmana, vāda leiman marunranglakha eina tangda ali phātopli narhai. ³¹Shokkahai chi kathei eina, awui raorumabing china wukkhananglakhaoda, vāda shokkahai saikora athumwui akhavāli unghānga."

³²Chieina akhavā china ali hokhuilaga hānga, "Makhayā rao, nana ili kapowui vang eina, ina nawui leiman saikora pheomi. ³³Ina nali khalumashanmi kahai thada, nanala nawui raorumali khalumashanmi mamashungmala? ³⁴Malungvātlakhaoda, awui akhavā china leiman saikora marunranglakha eina tangda ali khama za̱mibingli mikai. ³⁵Kazingramli khaleia iwui Avānala, nathum kachiva̱na awui achināli amalung katonga eina mapheomiakha, nathumli chithāda sāra."