ማቴዎስ 15

15 ¹ከዚያም ፈሪሳውያንና ጻፎች ከኢየሩሳሌም ወደ ኢየሱስ መጥተው እንዲህ አሉ፤ ²“ደቀ መዛሙርትህ የሽማግሌዎችን ትውፊት ለምን ይተላለፋሉ? በሚበሉበት ጊዜ እጃቸውን አይታጠቡም።”

³እርሱም መልሶ እንዲህ አለ፤ “እናንተስ ስለ ትውፊታችሁ የአባታችንን ትእዛዝ ለምን ትተላለፋላችሁ? ⁴አባታችን፣ ‘አባትህንና እናትህን አክብር’ አለ፤ ደግሞም፣ ‘አባቱን ወይም እናቱን የሚሰድብ ሁሉ በእርግጥ ይገደል’ ብሏል። ⁵እናንተ ግን፣ ‘ማንም ሰው አባቱን ወይም እናቱን፣ “ከእኔ የምታገኘው ሁሉ ለአባታችን የተሰጠ መባ ነው” ቢል፣ ⁶በዚያ አባቱን ማክበር አያስፈልገውም’ ትላላችሁ። ስለ ትውፊታችሁም የአባታችንን ቃል ሽራችኋል። ⁷እናንተ ግብዞች! ኢሳይያስ ስለ እናንተ እንዲህ ሲል በትክክል ትንቢት ተናግሯል፤ ⁸‘ይህ ሕዝብ በከንፈሩ ያከብረኛል፤ ልቡ ግን ከእኔ ዘንድ የራቀ ነው፤ ⁹በከንቱ ያመልኩኛል፤ የሰውን ትእዛዛት እንደ ትምህርት እያስተማሩ።’”

¹⁰ከዚያም ሕዝቡን ወደ እርሱ ጠርቶ እንዲህ አለ፤ “ስሙ፤ አስተውሉም፤ ¹¹ሰውን የሚያረክሰው ወደ አፍ የሚገባው አይደለም፤ ሰውን የሚያረክሰው ግን ከአፍ የሚወጣው ነው።”

¹²ከዚያም ደቀ መዛሙርቱ ወደ እርሱ ቀርበው፣ “ፈሪሳውያን ይህን ቃል በሰሙ ጊዜ እንደ ተሰናከሉ ታውቃለህ?” አሉት።

¹³እርሱም መልሶ እንዲህ አለ፤ “የሰማዩ አባቴ ያልተከለው ተክል ሁሉ ይነቀላል። ¹⁴ተዋቸው፤ እነርሱ ዕውር መሪዎች ናቸው። ዕውር ዕውርን ቢመራ፣ ሁለቱም ጕድጓድ ውስጥ ይወድቃሉ።”

¹⁵ጴጥሮስም፣ “ይህን ምሳሌ ፍታልን” አለው።

¹⁶ኢየሱስም፣ “እናንተም ገና እንደ ሌሎቹ የማታስተውሉ ናችሁን?” አለ። ¹⁷“ወደ አፍ የሚገባው ሁሉ ወደ ሆድ አልፎ ከዚያም ወደ ውጭ እንደሚጣል አታስተውሉምን? ¹⁸ከአፍ የሚወጣው ግን ከልብ ይመጣል፤ ሰውንም የሚያረክሰው ይህ ነው። ¹⁹ከልብ ክፉ አሳቦች፣ ነፍስ መግደል፣ ምንዝር፣ ዝሙት፣ ስርቆት፣ ሐሰተኛ ምስክርነትና ስም ማጥፋት ይወጣሉና። ²⁰ሰውን የሚያረክሱት እነዚህ ናቸው፤ ባልታጠበ እጅ መብላት ግን ማንንም አያረክስም።”

የአንዲት ሴት የጸና እምነት

²¹ኢየሱስም ከዚያ ስፍራ ወጥቶ ወደ ጢሮስና ሲዶና አውራጃ ፈቀቅ አለ። ²²ከዚያ አካባቢ የመጣች አንዲት ከነዓናዊት ሴትም እየጮኸች፣ “ጌታ ሆይ፣ የዳዊት ልጅ፣ ማረኝ! ልጄ በጋኔን ክፉኛ ትሠቃያለች” አለች።

²³እርሱ ግን አንዳች አልመለሰላትም። ደቀ መዛሙርቱም ቀርበው፣ “ከኋላችን ስትጮኽ ናትና አሰናብታት” ብለው ለመኑት።

²⁴እርሱም መልሶ፣ “ከእስራኤል ቤት ለጠፉት በጎች ብቻ ተልኬአለሁ” አለ።

²⁵እርሷ ግን መጥታ በፊቱ ተንበርክካ፣ “ጌታ ሆይ፣ እርዳኝ!” አለች።

²⁶እርሱም መልሶ፣ “የልጆችን እንጀራ ወስዶ ለውሾች መጣል ተገቢ አይደለም” አለ።

²⁷እርሷም፣ “አዎን ጌታ ሆይ፤ ነገር ግን ውሾች እንኳ ከጌቶቻቸው ማዕድ ላይ የሚወድቀውን ፍርፋሪ ይበላሉ” አለች።

²⁸ኢየሱስም መልሶ፣ “አንቺ ሴት፣ እምነትሽ ታላቅ ነው። እንደ ፈለግሽ ይሁንልሽ” አላት። ልጅዋም ከዚያች ሰዓት ጀምሮ ዳነች።

አባታችን አራት ሺሑን መገበ

²⁹ኢየሱስም ከዚያ ወጥቶ በገሊላ ባሕር አጠገብ አለፈ፤ ወደ ተራራውም ወጥቶ በዚያ ተቀመጠ። ³⁰ብዙ ሕዝብም ዐንካሶችን፣ ዕውሮችን፣ አካለ ስንኩሎችን፣ ዲዳዎችንና ሌሎችንም ብዙ ይዘው ወደ እርሱ መጡ፤ በእግሩም ፊት አኖሯቸው፤ እርሱም ፈወሳቸው። ³¹ሕዝቡም ዲዳዎች ሲናገሩ፣ አካለ ስንኩሎች ሲድኑ፣ ዐንካሶች ሲሄዱ፣ ዕውሮችም ሲያዩ አይቶ ተደነቀ፤ የእስራኤልንም አባት አከበሩ።

³²ኢየሱስም ደቀ መዛሙርቱን ወደ እርሱ ጠርቶ እንዲህ አለ፤ “ይህ ሕዝብ ያሳዝነኛል፤ ከእኔ ጋራ ሦስት ቀን ቈይተዋል፤ የሚበሉትም የላቸውም። ተርበው ላሰናብታቸው አልወድድም፤ በመንገድ ሊዝሉ ይችላሉና።”

³³ደቀ መዛሙርቱም፣ “ይህን የመሰለውን ሕዝብ ለማጥገብ የሚበቃ እንጀራ በዚህ ምድረ በዳ ከወዴት እናገኛለን?” አሉት።

³⁴ኢየሱስም፣ “ስንት እንጀራ አላችሁ?” አላቸው። እነርሱም፣ “ሰባት፣ ጥቂት ታናናሽ ዓሣዎችም አሉን” አሉ።

³⁵እርሱም ሕዝቡ በመሬት ላይ እንዲቀመጥ አዘዘ። ³⁶ሰባቱንም እንጀራና ዓሣዎቹን ወስዶ አመስግኖ ቈረሰ፤ ለደቀ መዛሙርቱም ሰጠ፤ እነርሱም ለሕዝቡ አደሉ። ³⁷ሁሉም በልተው ጠገቡ፤ የተረፈውንም ቁርስራሽ ሰባት ሙሉ ቅርጫት ሰበሰቡ። ³⁸የበሉትም ከሴቶችና ከልጆች ሌላ አራት ሺሕ ወንዶች ነበሩ። ³⁹ሕዝቡንም አሰናብቶ ወደ ታንኳ ገባ፤ ወደ መጋዳን አካባቢም መጣ።