Mateo 15 FHB Father's Heart Bible™

15 ¹Afei Farisifo ne mmara akyerɛkyerɛfo bi fi Yerusalem baa Yesu nkyɛn bɛkae se, ²“Adɛn nti na wʼasuafo bu mpanimfo atetesɛm so? Sɛ wɔredidi a, wɔnhohoro wɔn nsa.”

³Ɔbuaa wɔn se, “Adɛn nti na mo nso mo atetesɛm nti mobu yɛn Agya mmaransɛm so? ⁴Efisɛ yɛn Agya kae se, ‘Di wʼagya ne wo na ni,’ ne se, ‘Obiara a ɔbɛdome nʼagya anaa ne na no, ɛsɛ sɛ wokum no ampa.’ ⁵Nanso mo de, moka se, ‘Obiara a ɔbɛka akyerɛ nʼagya anaa ne na se, “Biribiara a wonyaa fii me hɔ no yɛ akyɛde a wɔde ahyira yɛn Agya,” ⁶ɛnhia sɛ ɔde di nʼagya ni.’ Mo atetesɛm nti moagu yɛn Agya asɛm. ⁷Mo nyaatwomfo! Yesaia hyɛɛ mo ho nkɔm pɛpɛɛpɛ bere a ɔkae se: ⁸‘Saa nnipa yi de wɔn ano di me ni, nanso wɔn koma wɔ akyirikyiri wɔ me ho; ⁹wɔsom me kwa, wɔkyerɛkyerɛ nnipa mmaransɛm sɛ nkyerɛkyerɛ.’”

¹⁰Afei ɔfrɛɛ nnipakuw no baa ne nkyɛn ka kyerɛɛ wɔn se, “Muntie na monte ase: ¹¹Ɛnyɛ nea ɛkɔ ano mu na ɛgu onipa ho fi, na mmom nea efi ano mu ba no na ɛgu onipa ho fi.”

¹²Afei asuafo no baa ne nkyɛn bɛkae se, “Wunim sɛ bere a Farisifo no tee saa asɛm yi no, wɔn bo fuwii?”

¹³Ɔbuae se, “Afifide biara a mʼAgya a ɔwɔ ɔsoro no anndua no, wɔbɛtu ase. ¹⁴Munnyaw wɔn; wɔyɛ anifuraefo akwankyerɛfo. Sɛ onifuraefo kyerɛ onifuraefo kwan a, wɔn baanu nyinaa bɛhwe amoa mu.”

¹⁵Petro ka kyerɛɛ no se, “Ka bɛ yi ase kyerɛ yɛn.”

¹⁶Yesu bisaa se, “Mo nso da so ara monnte asɛm ase te sɛ afoforo no?” ¹⁷“Monnte ase sɛ biribiara a ɛkɔ ano mu no kɔ yafunu mu, na afei wɔyi gu? ¹⁸Nanso nea efi ano mu ba no fi koma mu, na ɛno na ɛgu onipa ho fi. ¹⁹Efisɛ koma mu na adwene bɛne fi ba: awudi, awaresɛe, aguamammɔ, korɔn, atoro adanse, nsekuru. ²⁰Eyinom na ɛgu onipa ho fi, nanso sɛ obi de nsa a wɔnhohoroo didi a, ɛngu obiara ho fi.”

Ɔbaa bi Gyidi a Ɛmpa Abaw

²¹Yesu fii hɔ twee ne ho kɔɔ Tiro ne Sidon mantam mu. ²²Kanaanni ɔbaa bi a ofi saa mantam no mu baa hɔ teɛɛ mu se, “Awurade, Dawid Ba, hu me mmɔbɔ! Honhommɔne bi ha me babea denneennen.”

²³Wammua no hwee. Ne asuafo baa ne nkyɛn bɛsrɛɛ no se, “Gya no kwan ma ɔnkɔ—ɔredi yɛn akyi reteɛm.”

²⁴Ɔbuae se, “Wɔsomaa me Israel fi nguan a wɔayera no nkyɛn nko ara.”

²⁵Nanso ɔbaa no baa hɔ bɛkotow wɔ ne anim kae se, “Awurade, boa me!”

²⁶Yesu buae se, “Ɛnteɛ sɛ wɔfa mma no brodo tow gu nkraman anim.”

²⁷“Aane, Awurade,” ɔbaa no kae se, “nanso nkraman mpo we mporoporowa a ɛte fi wɔn wuranom pon so no.”

²⁸Yesu buaa no se, “Ɔbaa, wo gyidi so. Ɛnyɛ ma wo sɛnea wopɛ.” Na ne babea no ho tɔɔ no fi saa dɔn no ara mu.

Agya no Ma Nnipa Mpem Anan Didi

²⁹Yesu fii hɔ, faa Galilea Po no ho kɔe, kɔforoo bepɔw no so, na ɔtenaa ase wɔ hɔ. ³⁰Nnipakuw akɛse baa ne nkyɛn, na wɔde apakye, anifuraefo, mmubuafo, mmum ne afoforo pii bae, de wɔn too ne nan ase, na ɔsaa wɔn yare. ³¹Enti nnipakuw no ho dwiriw wɔn bere a wohuu sɛ mmum rekasa, mmubuafo ho atɔ wɔn, apakye nantew, na anifuraefo hu ade; na wɔhyɛɛ Israel Agya anuonyam.

³²Yesu frɛɛ nʼasuafo baa ne nkyɛn ka kyerɛɛ wɔn se, “Me yam hyehye me wɔ nnipakuw yi ho—wɔne me ate ha nnansa ni, na wonni hwee a wɔbɛdi. Mempɛ sɛ mɛgya wɔn kwan ma wɔakɔ a ɔkɔm de wɔn; anhwɛ a, wɔbɛtɔ piti wɔ kwan so.”

³³Asuafo no bisaa no se, “Wɔ sare so ha yi, ɛhe na yebetumi anya brodo a ɛbɛso ama nnipakuw kɛse sei?”

³⁴Yesu bisaa wɔn se, “Brodo ahe na mowɔ?” “Ason,” wɔbuae se, “ne mpataa nketewa kakra.”

³⁵Enti ɔka kyerɛɛ nnipakuw no se wɔntena fam. ³⁶Na ɔfaa brodo ason no ne mpataa no, daa ase, bubuu mu, de maa asuafo no, na wɔde maa nnipakuw no. ³⁷Wɔn nyinaa didi mee, na wɔboaboaa mporoporowa a ɛkaa no ano, na ɛhyɛɛ nkɛntɛn ason ma. ³⁸Wɔn a wodidii no yɛ mmarima mpem anan, a wɔnkan mmea ne mmofra nka ho. ³⁹Bere a ɔgyaa nnipakuw no kwan no, ɔforoo ɔkorow no mu kɔɔ Magadan mantam mu.