மத்தேயு 15

15 ¹அப்பொழுது எருசலேமிலிருந்து பரிசேயரும் வேதபாரகரும் இயேசுவினிடத்தில் வந்து: ²“உம்முடைய சீஷர்கள் மூப்பர்களின் பாரம்பரியத்தை ஏன் மீறுகிறார்கள்? அவர்கள் சாப்பிடும்போது தங்கள் கைகளைக் கழுவுகிறதில்லையே” என்றார்கள்.

³அதற்கு அவர் பிரதியுத்தரமாக: “நீங்களும் உங்கள் பாரம்பரியத்தினிமித்தம் எங்கள் பிதாவின் கட்டளையை ஏன் மீறுகிறீர்கள்? ⁴ஏனெனில் எங்கள் பிதா: ‘உன் தகப்பனையும் உன் தாயையும் கனம்பண்ணுவாயாக’ என்றும், ‘தகப்பனையாவது தாயையாவது சபிக்கிறவன் நிச்சயமாய்க் கொலைசெய்யப்படக்கடவன்’ என்றும் சொன்னாரே. ⁵நீங்களோ: ‘எவனாகிலும் தன் தகப்பனையாவது தாயையாவது நோக்கி, “என்னிடத்திலிருந்து நீ அடையத்தக்கது எதுவோ அது எங்கள் பிதாவுக்கு அர்ப்பணிக்கப்பட்ட காணிக்கை” என்று சொன்னால், ⁶அவன் தன் தகப்பனை அதினால் கனம்பண்ணவேண்டியதில்லை’ என்கிறீர்கள். இப்படி உங்கள் பாரம்பரியத்தினிமித்தம் எங்கள் பிதாவின் வார்த்தையை நீங்கள் அவமாக்கிவிட்டீர்கள். ⁷மாயக்காரரே! ஏசாயா உங்களைக்குறித்து சரியாய்த் தீர்க்கதரிசனம் உரைக்கும்போது சொன்னது சரியே: ⁸‘இந்த ஜனங்கள் தங்கள் உதடுகளால் என்னைக் கனம்பண்ணுகிறார்கள், ஆனால் அவர்கள் இருதயமோ எனக்குத் தூரமாய் விலகியிருக்கிறது; ⁹அவர்கள் வீணாய் என்னை ஆராதிக்கிறார்கள், மனுஷருடைய கட்டளைகளை உபதேசங்களாகப் போதிக்கிறார்கள்.’”

¹⁰பின்பு அவர் ஜனக்கூட்டத்தைத் தம்மிடத்தில் அழைத்து: “கேளுங்கள், உணருங்கள்: ¹¹வாய்க்குள்ளே போகிறது மனுஷனைத் தீட்டுப்படுத்தாது; வாயிலிருந்து புறப்படுகிறதே மனுஷனைத் தீட்டுப்படுத்தும்” என்றார்.

¹²அப்பொழுது அவருடைய சீஷர்கள் அவரிடத்தில் வந்து: “இந்த வார்த்தையைக் கேட்டு பரிசேயர் இடறலடைந்தார்கள் என்று அறிவீரா?” என்றார்கள்.

¹³அதற்கு அவர்: “என் பரமபிதா நடாத எந்தச் செடியும் வேரோடே பிடுங்கப்படும். ¹⁴அவர்களை விட்டுவிடுங்கள்; அவர்கள் குருடருக்கு வழிகாட்டிகளான குருடர். குருடன் குருடனுக்கு வழிகாட்டினால், இருவரும் குழியில் விழுவார்கள்” என்றார்.

¹⁵அப்பொழுது பேதுரு அவரை நோக்கி: “இந்த உவமையை எங்களுக்கு விளக்கிச்சொல்லும்” என்றான்.

¹⁶அதற்கு இயேசு: “நீங்களும் இன்னும் மற்றவர்களைப்போல் உணர்வில்லாதவர்களாய் இருக்கிறீர்களா? ¹⁷வாய்க்குள்ளே போகிறதெல்லாம் வயிற்றில் சென்று, பின்பு கழிவறையில் தள்ளப்படும் என்று அறியீர்களா? ¹⁸வாயிலிருந்து புறப்படுகிறவைகளோ இருதயத்திலிருந்து வருகிறது; அவைகளே மனுஷனைத் தீட்டுப்படுத்தும். ¹⁹ஏனெனில் இருதயத்திலிருந்து பொல்லாத சிந்தனைகள் புறப்படுகின்றன: கொலைபாதகம், விபசாரம், வேசித்தனம், களவு, பொய்ச்சாட்சி, தூஷணம். ²⁰இவைகளே மனுஷனைத் தீட்டுப்படுத்தும்; கழுவாத கைகளால் சாப்பிடுகிறது ஒருவனையும் தீட்டுப்படுத்தாது” என்றார்.

ஒரு ஸ்திரீயின் விடாமுயற்சியான விசுவாசம்

²¹இயேசு அவ்விடத்தைவிட்டுப் புறப்பட்டு, தீரு சீதோன் பட்டணங்களின் திசைகளுக்கு விலகிப்போனார். ²²அப்பொழுது அந்த எல்லைகளிலிருந்து வந்த ஒரு கானானிய ஸ்திரீ: “ஆண்டவரே, தாவீதின் குமாரனே, எனக்கு இரங்கும்! என் மகள் பிசாசினால் கொடிதாய் வேதனைப்படுகிறாள்” என்று சத்தமிட்டாள்.

²³அவர் அவளுக்கு ஒரு உத்தரவும் சொல்லவில்லை. அப்பொழுது அவருடைய சீஷர்கள் வந்து: “இவளை அனுப்பிவிடும், நமக்குப் பின்னாலே கூப்பிட்டுக்கொண்டே வருகிறாளே” என்று அவரை வேண்டிக்கொண்டார்கள்.

²⁴அதற்கு அவர்: “இஸ்ரவேல் வம்சத்தாரின் காணாமற்போன ஆடுகளிடத்திற்கே அன்றி மற்றெவரிடத்திற்கும் நான் அனுப்பப்படவில்லை” என்றார்.

²⁵அப்பொழுது அவள் வந்து அவரைப் பணிந்துகொண்டு: “ஆண்டவரே, எனக்கு உதவிசெய்யும்” என்றாள்.

²⁶அவர் பிரதியுத்தரமாக: “பிள்ளைகளின் அப்பத்தை எடுத்து நாய்க்குட்டிகளுக்குப் போடுகிறது நல்லதல்ல” என்றார்.

²⁷அதற்கு அவள்: “மெய்தான் ஆண்டவரே, ஆகிலும் நாய்க்குட்டிகளும் தங்கள் எஜமான்களின் மேஜையிலிருந்து விழும் துணிக்கைகளைத் தின்னுமே” என்றாள்.

²⁸அப்பொழுது இயேசு: “ஸ்திரீயே, உன் விசுவாசம் பெரிது; நீ விரும்புகிறபடி உனக்கு ஆகக்கடவது” என்றார். அந்நேரமே அவள் மகள் சொஸ்தமானாள்.

பிதாவானவர் நாலாயிரம் பேரைப் போஷிக்கிறார்

²⁹இயேசு அவ்விடம்விட்டுப் புறப்பட்டு, கலிலேயா கடலருகே வந்து, மலையின்மேல் ஏறி அங்கே உட்கார்ந்தார். ³⁰திரளான ஜனங்கள் சப்பாணிகளையும், குருடரையும், ஊனரையும், ஊமையரையும், வேறு அநேகரையும் அவரிடத்தில் கொண்டுவந்து, அவர்களை அவர் பாதத்தில் வைத்தார்கள்; அவர் அவர்களைச் சொஸ்தமாக்கினார். ³¹ஊமையர் பேசுகிறதையும், ஊனர் சொஸ்தமாகிறதையும், சப்பாணிகள் நடக்கிறதையும், குருடர் காண்கிறதையும் ஜனக்கூட்டம் கண்டு ஆச்சரியப்பட்டு, இஸ்ரவேலின் பிதாவை மகிமைப்படுத்தினார்கள்.

³²பின்பு இயேசு தம்முடைய சீஷர்களைத் தம்மிடத்தில் அழைத்து: “இந்த ஜனக்கூட்டத்தின்மேல் எனக்கு மனதுருகுகிறது; இவர்கள் இப்பொழுது மூன்று நாளாய் என்னோடிருந்து சாப்பிட ஒன்றுமில்லாதிருக்கிறார்கள். இவர்களைப் பட்டினியாய் அனுப்பிவிட எனக்கு மனதில்லை; வழியில் சோர்ந்துபோவார்களே” என்றார்.

³³அதற்கு அவருடைய சீஷர்கள்: “இவ்வளவு பெரிய ஜனக்கூட்டத்திற்குத் திருப்தியுண்டாக்கத்தக்க அப்பங்களை இந்த வனாந்தரத்தில் நாம் எங்கே சம்பாதிப்போம்?” என்றார்கள்.

³⁴இயேசு அவர்களை நோக்கி: “உங்களிடத்தில் எத்தனை அப்பங்கள் உண்டு?” என்று கேட்டார். அதற்கு அவர்கள்: “ஏழு அப்பங்களும் சில சிறு மீன்களும் உண்டு” என்றார்கள்.

³⁵அப்பொழுது அவர் ஜனங்களைத் தரையில் பந்தியிருக்கும்படி கட்டளையிட்டார். ³⁶பின்பு அவர் அந்த ஏழு அப்பங்களையும் மீன்களையும் எடுத்து, ஸ்தோத்திரம்பண்ணி, பிட்டு, தம்முடைய சீஷர்களிடத்தில் கொடுத்தார்; சீஷர்கள் ஜனங்களுக்குக் கொடுத்தார்கள். ³⁷அவர்களெல்லாரும் சாப்பிட்டுத் திருப்தியடைந்தார்கள்; மீதியான துணிக்கைகளை ஏழு கூடைகள் நிறைய எடுத்தார்கள். ³⁸ஸ்திரீகளையும் பிள்ளைகளையும் தவிர, சாப்பிட்ட புருஷர் நாலாயிரம் பேராயிருந்தார்கள். ³⁹அவர் ஜனங்களை அனுப்பிவிட்டபின்பு, படவில் ஏறி, மகதான் என்னும் பகுதிக்கு வந்தார்.