Matiyu 15 FHB Father's Heart Bible™

15 ¹Sai Farisiyawa da malaman Attaura suka zo wurin Yesu daga Urushalima, suka ce, ²“Me ya sa almajiranka suke karya al'adar dattawa? Ba sa wanke hannuwansu sa'ad da suke cin abinci.”

³Ya amsa musu ya ce, “Ku kuma, me ya sa kuke karya umarnin Ubanmu saboda al'adarku? ⁴Gama Ubanmu ya ce, ‘Ka girmama mahaifinka da mahaifiyarka,’ da kuma, ‘Duk wanda ya zagi mahaifinsa ko mahaifiyarsa, dole a kashe shi.’ ⁵Amma ku kuna cewa, ‘Duk wanda ya ce wa mahaifinsa ko mahaifiyarsa, “Duk abin da za ka amfana daga wurina baiko ne wanda aka keɓe wa Ubanmu,” ⁶ba lalle ne ya girmama mahaifinsa da shi ba.’ Ta haka kun soke maganar Ubanmu saboda al'adarku. ⁷Ku munafukai! Daidai Ishaya ya yi annabci a kanku, sa'ad da ya ce, ⁸‘Mutanen nan suna girmama ni da leɓunansu, amma zuciyarsu tana nesa da ni; ⁹suna bauta mini a banza, suna koyar da dokokin mutane kamar rukunnan koyarwa.’”

¹⁰Sai ya kira taron wurinsa ya ce, “Ku saurara, ku kuma fahimta: ¹¹Ba abin da yake shiga baki ne yake ƙazantar da mutum ba, sai dai abin da yake fitowa daga baki, shi ne yake ƙazantar da mutum.”

¹²Sai almajiran suka zo wurinsa suka ce, “Ka san Farisiyawa sun ji haushi sa'ad da suka ji wannan magana?”

¹³Ya amsa ya ce, “Duk shukar da Ubana na Sama bai shuka ba, za a tumɓuke ta. ¹⁴Ku ƙyale su; makafi ne masu jagorar makafi. In makaho ya yi wa makaho jagora, dukansu za su faɗa cikin rami.”

¹⁵Bitrus ya ce masa, “Ka bayyana mana wannan misali.”

¹⁶“Har yanzu ku ma ba ku da fahimta kamar sauran?” Yesu ya ce. ¹⁷“Ashe, ba ku gane ba cewa duk abin da yake shiga baki yakan ratsa zuwa ciki, sa'an nan a fitar da shi waje? ¹⁸Amma abin da yake fitowa daga baki daga zuciya yake fitowa, shi ne kuwa yake ƙazantar da mutum. ¹⁹Gama daga zuciya ne mugayen tunani suke fitowa: kisankai, zina, fasikanci, sata, shaidar zur, da ɓata suna. ²⁰Waɗannan ne suke ƙazantar da mutum, amma cin abinci da hannuwa marasa wanki ba ya ƙazantar da kowa ba.”

Bangaskiyar Wata Mace Mai Nacewa

²¹Da Yesu ya bar wurin, sai ya janye zuwa yankin Taya da Sidon. ²²Sai ga wata mace Bakan'aniya daga wannan yanki ta zo, tana ihu, “Ka yi mini jinƙai, ya Ubangiji, Ɗan Dawuda! Aljani yana wa 'yata azaba ƙwarai.”

²³Bai amsa mata kome ba. Sai almajiransa suka zo suka roƙe shi, “Ka sallame ta, gama tana ta ihu a bayanmu.”

²⁴Ya amsa ya ce, “An aiko ni ne kawai ga ɓatattun tumakin gidan Isra'ila.”

²⁵Amma ta zo ta durƙusa a gabansa, tana cewa, “Ya Ubangiji, ka taimake ni!”

²⁶Ya amsa ya ce, “Bai dace a ɗauki gurasar yara a jefa wa karnuka ba.”

²⁷“I, ya Ubangiji,” ta ce, “amma duk da haka karnuka ma sukan ci gutsattsarin da suke fāɗuwa daga teburin iyayengijinsu.”

²⁸Yesu ya amsa mata ya ce, “Mace, bangaskiyarki da girma take. A yi miki yadda kike so.” Nan take kuwa 'yarta ta warke tun daga wannan sa'a.

Uba Ya Ciyar da Dubu Huɗu

²⁹Da Yesu ya bar wurin, sai ya bi gaɓar Tekun Galili, ya hau kan dutse, ya zauna a can. ³⁰Sai taro mai yawa suka zo wurinsa, suna kawo guragu, da makafi, da nakasassu, da bebaye, da waɗansu da yawa, suka kwantar da su a ƙafafunsa, ya kuwa warkar da su. ³¹Saboda haka taron suka yi mamaki, suna ganin bebaye suna magana, nakasassu sun warke, guragu suna tafiya, makafi kuma suna gani; sai suka ɗaukaka Uban Isra'ila.

³²Yesu ya kira almajiransa wurinsa ya ce, “Ina jin tausayin wannan taro, gama kwana uku ke nan suna tare da ni, ba su kuwa da abin da za su ci. Ba na so in sallame su da yunwa, kada su suma a hanya.”

³³Almajiran suka tambaye shi, “A wannan wuri mai nisa, ina za mu sami isasshiyar gurasa da za ta ƙosar da irin wannan taro?”

³⁴“Burodi nawa kuke da shi?” Yesu ya tambaya. “Guda bakwai,” suka ce, “da 'yan ƙananan kifaye.”

³⁵Sai ya umarci taron su zauna a ƙasa. ³⁶Sai ya ɗauki burodi bakwai da kifayen, ya yi godiya, ya kakkarya su, ya ba almajiran, su kuwa suka ba taron. ³⁷Dukansu suka ci suka ƙoshi, suka tattara gutsattsarin da suka rage, kwanduna bakwai cike. ³⁸Waɗanda suka ci kuwa maza dubu huɗu ne, ban da mata da yara. ³⁹Bayan ya sallami taron, sai ya shiga jirgin ruwa, ya tafi yankin Magadan.