Matthew 15

15 ¹Chieina Phariseebing eina ain kathemabingna Jerusalemwui eina Jishuli rāhānga, ²"Khisāda nawui sākhangatha̱bingna awo-ayibingwui khangachāyan sakhaikhala? Athumna phazā tharan pāng mamazikmana."

³Ana ngahānkai, "Khisāda nathumla nathumwui khangachāyan mayon khavaiwui vang ithumwui Avāwui ningkhami sakhaikhala? ⁴Kaja ithumwui Avāna hānga, 'Nava̱ navāli khayāshilu,' kala, 'Kachikathāna avāva̱li lah ava̱va̱li khonshiakha mi chipāli shaothat thathuira.' ⁵Kha nathumna hānga, 'Kachikathāna awui avāva̱ lah ava̱va̱li hānga, "Nana iwui eina kānkhanā samphangkapai chi saikora ithumwui Avāli mikahaina,"' ⁶ana chi eina avāli khayāshi mahomana.' Nathumwui khangachāyanwui vang eina nathumna ithumwui Avāwui Tui chi khamasai ngasakhaira. ⁷Phākakhaningbing! Isaiahna nathumwui pongli mashungda marānda hānga: ⁸'Mibing hina athumwui morchai eina ili khayāshiya, kha athumwui ning china iwui eina katāva̱li lei;' ⁹aremali athumna ili khoruma, miwui ningkhami chi tamkachitheina da tamchithei.'"

¹⁰Chieina ana yaruili hokhuida hānga, "Nganālaga bhap tālu: ¹¹Khamorli kazang china mi chili makhao mangasakmana, kha khamorwui eina kashok china mi chili makhao khangasakna."

¹²Chieina sākhangatha̱bingna ali rāhānga, "Phariseebingna hikahāng tui shā tharan mamayāngaihaira da na theila?"

¹³Ana ngahānkai, "Kazingramli khalei iwui Avāna maling thingrong saikora phurthathaora. ¹⁴Athumli ningkhānlu; athum mik khangapeo thānmebingna. Mikpeoana mikpeoali shongfa thānmiakha, ani khanini khorjopli tāzangra."

¹⁵Peterna ali hānga, "Chānjam hi ithumli pheichitheifalu."

¹⁶"Nathumla arui eina tangda kateibing thada theithang maleirangla?" da Jishuna hānga. ¹⁷"Khamorli kazang saikora wukli kazangda chiwui thili kayāngli shokhaora kaji nathum bhap matāthula? ¹⁸Kha khamorwui eina kashok china wuklungwui eina kharāna, kala chi eina mili makhao khangasakna. ¹⁹Kaja makaphā ningphanin, shaokathat, phokaphā, shāmkasa, khaleekasa̱, mikhanam shākhi, kala khamashāt tui chi wuklungwui eina shoka. ²⁰Hi saikorana mili makhao khangasakna, kha pāng mamazikla phazā chi eina khipālikha makhao makhangasakmana."

Sha̱nao Akhawui Shitkasang Sāching

²¹Jishuna apam chiwui eina thuihaida Tyre eina Sidon ngaleili vāhaowa. ²²Ngalei chiwui Canaan sha̱nao akhana rāda, panglāk eina vaoda hānga, "Amei, Davidwui Naomayara, ili khalumashanmilu! Iwui naongalāva̱li kameona chotchānglak eina ningrāk ngasakhaira."

²³Ana ali tui akhala mangahānkāmana. Awui sākhangatha̱bing china rāda ali pohaira, "Ali chihohaolu, kaja ana ithumwui thili vaozata."

²⁴Ana ngahānkai, "Ina shimān kahai Israel shimkhurwui yaonaobing chili maningla kachihona kahaina."

²⁵Kha ana rāda awui ngalemli khuktizangda hānga, "Amei, ili khangachonmilu!"

²⁶Ana ngahānkai, "Naoshinaobingwui kashakazā khuilaga fabingli zangki chi khamashung maningmana."

²⁷"Mha, Amei," ana hānga, "chithālala fabingna khalatta akhavābingwui tablewui eina tātung kahai zātpā tākatung chi zai."

²⁸Jishuna ngahānkai, "Sha̱nao, nawui shitkasang kharena. Na kaphaning athishurda shokranu." Kala chitam eina awui naongalāva̱ raimihaowa.

Avāna Mi Thing Matili Zāngasak

²⁹Apam chi horlaga Jishuna Galilee yireiwui shatungvāk zatlaga, kaphungli kai, kala apam chili pama. ³⁰Mi kachungkha china phei katekbing, mik khangapeobing, khangazanbing, khak khangasha̱bing kala kateibing kachungkha khuida awui ngalemli rāda, athumli awui pheili sangserhaida, ana athumli raimisera. ³¹Chithāda mi kachungkha china khak khangasha̱ matui, khangazan raimi, phei katek zata, kala mik khangapeo thei chi theilaga matakhakhai; kala athumna Israelwui Avāli tekmatei mihaowa.

³²Jishuna awui sākhangatha̱bingli awui ngalemli holaga hānga, "Mibing hili ina lumashanlaka; kaja zimiksho kathumthang athumna ili ngasokda kaura, kala athumli ara zākhavaila maleithura. Ina athumli kakhum eina machihohaingaimana, kaja athum shongfali kongluihaora."

³³Sākhangatha̱bingna ngahānna, "Hi ngachakyāng kahai apamli hitākam mi kachungkhali zāngasak khavai kashakazā ithumna kachili phāshapkhala?"

³⁴"Nathumwuili khamui kayākha leikhala?" da Jishuna ngahāna. Athumna ngahānkai, "Khamui shini leili, kala khai kateo kaikhala lei."

³⁵Chieina ana yarui chili ngaleili pamzanglu da kasoi. ³⁶Kala ana khamui shini eina khai chi khuida ningkashi seihā sālaga serkhaida sākhangatha̱bingli mi, kala athumna yaruili yaowa. ³⁷Athum saikorana shai kala ningyāng unglakhaowa, kala athumna shaineng luk shini pemda kazipkhui. ³⁸Kazābing chi sha̱nao kala naoshinao mazangla mi thingmati leiya. ³⁹Yaruili shiunkup kahaiwui thili, ana marikhong kātonglaga Magadan ngaleivāk vāhaowa.