Tetutik ak Ng'olyootap Kwanda
Koleenji Jeso Pharisaik kole kakawek tetutikwak ng'atuutyetap Kwandanyo, ak kole kiit ne yaei chii koek ne ma tiliil ko mang'une mugulelda, ma kiit ne chut kutit. Kwony ne po Kanaan ko ma chame si kiyookta, kowolji ineendet, ak kosap chepto ne ki kinyalili.
15 1Yeityo kobwonji Jeso Pharisaik ak siriik eng' Jerusalem, koleenji, 2“Amune pchei kasubikyuk tetutigap poisyek? Ma iun eunekwak ye amei.”
3Ki wolji ineendet koleenji, “Amune agine opchei ng'atuutyetap Kwandanyo agobo tetutikwok? 4Amu ki mwa Kwandanyo kole, ‘Teech kwandang'ung' ak kamenng'ung',’ ak kole, ‘Age tugul ne sasei kwan anan kamet, kebarei iman.’ 5Ago omwae okweek ole, ‘Age tugul ne leenji kwandanyi anan kamennyi, ‘Kiy age tugul ne isichei eng' anee ko kaayachi Kwandanyo,’ 6ko ma nyolu koteech kwandanyi eng' nooto.’ Kawek okweek ng'olyootap Kwandanyo agobo tetutikwok. 7Okweek chombilik! Ki maoten Isaiah komyee agobo okweek, kole: 8‘Teechei anee ibini eng' kutikwak, ago loo muguleldanywa eng' anee; 9sosei anee eng' tangoi, koneetis ng'atuutigap piik ko uu kaneetiset.’”
10Yeityo koguur tuiyet kobwonji, koleenji, “Ogas ak oguito: 11Ma kiit ne kochut kutit ne yaei chii koek ne ma tiliil, ago kiit ne mang'une kutit ne yaei chii koek ne ma tiliil.”
12Yeityo kobwonji kasubik, koleenji, “Inai ile ki kitiny mugulelwegap Pharisaik ye kagas ng'olyoondoni?”
13Ki wolji ineendet koleenji, “Keet age tugul ne ma ki mine Kwandanyo ne mi kipsengwet, ko kitutu. 14Pagaakta icheek; amu ko riibiik che koryotiin. Ngo riibei chii ne koraat chiito age ne koraat, ko kebut eng' keriinget kweanet.”
15Ki leenji ineendet Petero, “Boorwech paragutoni.”
16Ki le Jeso, “Tos ta omereeseen agoi nguno ko uu alak? 17Moguito ile kiit age tugul ne kochut kutit kochoru moet ak kiwirto saang'? 18Ago kiit ne mang'une kutit ko punu muguleldo, ak nooto ne yaei chii koek ne ma tiliil. 19Amu rutei muguleldo kabwaatutik che ya: rumisyet, adulamindo, sokseet, choorindo, jorweetap lemenik, chaametap piik. 20Chooto ko yaei chii koek ne ma tiliil, ago amisyet eng' eunek che ma kiuun ko ma yaei chii age koek ne ma tiliil.”
Imonateet ne Kigimit ne po Kwondo
21Kingo isto olooto Jeso, koisto kwo emetap Tyro ak Sidon. 22Ki nyoonji ineendet kwondo age ne po Kanaan ne ki punu olooto, kowaachei, koleenji, “Rirenjo, ee Kiptaiyat, Weeriitap Daudi! Inyalili tipnyu miising' oindet.”
23Ki ma wolji ineendet kiy age tugul. Kobwonji kasubikyik, kogaigai ineendet, koleenji, “Oon kwondani—amu waach kosubwech.”
24Ki wolji koleenji, “Ki kiyok anee aba keechiirek che tuun che po kootap Israel kityo.”
25Ago ki nyo ineendet kogutunyi eng' tainnyi, koleenji, “Kiptaiyat, toreto!”
26Ki wolji koleenji, “Ma po iman keip amdigap lagok ak kewiirchi sesenik.”
27Ki le, “Ou, Kiptaiyat, ago agot sesenik ko amei usgoiywek che ibutyot eng' meesetap mastinwekwak.”
28Ki wolji Jeso koleenji, “Ee kwondo, oo imonateeng'ung'. Ingoyai ko uu ye imache.” Ak ki saptooni tipnyi eng' sainooto.
Ibaei Kwanda Piik Elphuusyek Ang'wan
29Kingo isto olooto Jeso, kowendi kolda cheroronyotap Galilaya, kotogosta tulweet, ak kingo kagotep yooto. 30Kobwonji tuiyosyek che eecheen kobooto che ing'waldos, che koryotiin, che yaacheen, che namaat kuut, ak alak che chaang', koisibchi keelyekyik, ak ki sapsapta icheek. 31Ki kwong'yo anyun tuiyet, ye kingo keer ne namaat kuut kong'alaal, che yaacheen kosaapat, che ing'waldos kowendot, ak che koryotiin kogeer; ak kogoochi kaat Kwandap Israel.
32Ki kuur Jeso kasubikyik kobwonji, koleenji, “Arirwo tuiyoni—amu kagomi kobooto anee peetuusyek somok ko mami kiy ne koamei. Ma amache aoon kong'etyotiin; si ko mobut eng' ooreet.”
33Ki teebe kasubik koleenji, “Imuuchech kenyooru magatiinik ano eng' komosta ne itininoni, si keipchi tuiyet ne oo ko uu nooto?”
34Ki teebe Jeso koleenji, “Magatiinik ata che itinye?” Ki le, “Tisap, ak cheebageyogik che tutik che tee.”
35Ak ki leenji tuiyet kotep ng'wony. 36Ak ki imut magatiinik tisap ak cheebageyogik, kingo kagomwa kongoi, kowir, kogoochi kasubik, ak kigoochin icheek tuiyosyek. 37Ki am tugul ak kobiyong'otiin, ak ki yum magatyogik che tee mesetinwek tisap che nyiitaat. 38Icheeget che ki am ko ki piik eliphuusyek ang'wan, kobatee kwonyiik ak lagok. 39Kingo kagoon tuiyosyek, kolaany moinget ak kobwa emetap Magadan.