Soomet Kaboorunet eng' Kipsengwet
Kiguure Petero ineendet kole Kristo, Weeriitap Kwanda ne sabei, ak eng' minutik che ng'ering' kingo isup, kiguure Setani amu ki eetei kogas kole nyolu kebar Kristoni. Kole Jeso, ngo isup, ko koeng'uni chiito ineegei ak koip kateeretit, ma koek ne kisarak eng' niito.
16 1Ki pwanji Pharisaik ak Sadukaik kotyeme ineendet, kosoomei koboorchi icheek kaboorunet ne po kipsengwet.
2Ki wolji koleenji, “Ye konyo kemeut, omwae ole, ‘Komyee betusyet, amu kabireer kipsengwet.’
3“Ak eng' mornet, ‘Mi koristo ra, amu kabireer kipsengwet ak ko moigei.’ Ongen osoman taitap kipsengwet, ago maomuuch osoman kaborunosyegap peetuusyek.
4“Cheeng'ei ibinda ne ya ak ne teweerin kaboorunet; ago ma kigoochin kaboorunet age, kobatee ne po Jona.” Yeityo kobagaakta icheek ak kowo.
Mermereegap Kaneetiset ne po Lembech
5Ye ki olang'ji tyeng'ik koba oliindo age, ko ki utye koip magatiinik.
6Ki leenji Jeso icheek, “Oriipkei ak oriibegei mermereegap Pharisaik ak Sadukaik.”
7Ki ng'alaale icheek among tuwai kole, “Amu ma kiip magatiinik.”
8Kingo nai Jeso niito, koleenji, “Amu nee si ong'alaale among okweek, okweek che po iyanatet ne ming'in, amu ma otinye magatiinik? 9Tos matomo oguiye? Tos matomo obwaat magatiinik muut che po piik 5,000, ak ateruusyek ata che ki otaach?
10“Anan magatiinik tisap che po piik 4,000, ak ateruusyek ata che ki oyum?
11“Amu nee si matomo onai ale ma kiang'alaalji okweek agobo magatiinik? Oriibegei mermereegap Pharisaik ak Sadukaik.”
12Yeityo ko iguiyo icheek kole ma ki leenji icheek koriibegei mermereek ne mi magatiinik, ago kaneetisyetap Pharisaik ak Sadukaik.
Ng'aanyei Petero Weeriit ne po Kwanda
13Ye ki it Jeso komoswegap Kaisaria-Philippi, ki teebe tyeng'ikyik koleenji, “Ng'oo ne le piik ko Weeriitap chii?”
14Ki le, “Le alak ko Johana kabatisanindet, alak ko Elijah, alak ko Jeremiah anan age eng' maotik.”
15Ki leenji icheek, “Ago ng'oo ne omwae ole aa anee?”
16Ki wolji Simion Petero koleenji, “Inyee ko Kristo, Weeriit ne po Kwanda ne sabei.”
17Ki wolji Jeso koleenji, “Ipaibai inyee Simion weeriitap Jona—ma ki iboorchin niito uiyoonik ak korotiik, ago Abba ne mi kipsengwet.
18“Ak amwaun ale: inyee ko Petero, ak eng' koini ateeche churateennyu; ak ma kosiir ineendet kurgeetap meet.
19“Agoonin funguoisyegap laitornatetap Kwandanyo; kiy age tugul ne irat eng' ng'wony, korate eng' kipsengwet, ak kiy age tugul ne ipagaakta eng' ng'wony, kogopagaakta eng' kipsengwet.”
20Yeityo ko ng'at tyeng'iik kou amemwachi chii age tugul kole ko ineendet Kristo.
Matiny Weeriit Konyalil ak Kong'eeti
21Kobooch peetuunooto, ki toi Jeso komwachi tyeng'ikyik kole matiny kowo Jerusalem, konyalilji che chaang' eng' poisyek ak tisiik che eecheen ak siriik, kobara, ak kong'eetwo eng' peetuut ne po somok.
22Ki inam Petero ineendet taban, ak kokergong' kole, “Amume, Kiptaiyat! Ma kiyaiywon niito tengen.”
23Ago ki weigei ineendet koleenji Petero, “Wei let anyun, Setani! Inyee ko kipng'wootet eng' anee, amu ma ibwaati tuguuk che mage Kwandanyo, ago tuguuk che mage piik.”
24Yeityo ko leenji Jeso tyeng'ikyik, “Age tugul ne machei kobwonji let anyun, iming'inegei ineegei, konam msalabanyi, ak kosubun anee.
25“Amu age tugul ne machei koriip saboondanyi kobeeti; ago ineendet ne ibeeti saboondanyi agobo anee kotun nyooru.
26“Nee ne myee eng' chii ngot konyoor emet komugul ago kobeeti tamirmirindanyi? Anan ko nee ne kimuuchi chii kogoochi eng' walutyetap tamirmirindanyi?
27“Amu nyonei Weeriitap chii eng' toroorindap Kwandanyi kobooto angeennyi, ak koit koriimis age tugul kou poisyennywa.
28“Amwaiwok iman ale: mi alak che teng'eche yu che ma kiiny meet, agoi koger Weeriitap chii kobwa laitornatennyi.”