Mathayo 16

Sura ya 16.

16 ¹Mafarisayo na Masadukayo wakamjia ili kumjaribu, wakimwomba awaonyeshe ishara kutoka mbinguni.

²Akawajibu, "Ifikapo jioni, husema, 'Kutakuwa na hali nzuri ya hewa, kwa maana anga ni jekundu.'

³"Na asubuhi, 'Leo kutakuwa na dhoruba, kwa maana anga ni jekundu na lenye mawingu.' Mnajua kusoma uso wa anga, lakini hamwezi kusoma ishara za nyakati.

⁴"Kizazi kiovu na kisicho na uaminifu kinatafuta ishara; hakitapewa ishara isipokuwa ishara ya Yona." Kisha akawaacha, akaenda zake.

Chachu ya Mafundisho ya Uongo

⁵Wanafunzi walipovuka hadi ng'ambo ya pili, walikuwa wamesahau kuchukua mkate.

⁶Yesu akawaambia, "Angalieni na jihadharini na chachu ya Mafarisayo na Masadukayo."

⁷Wakajadiliana jambo hili wao kwa wao, wakisema, "Ni kwa sababu hatukuleta mkate."

⁸Yesu, akijua hilo, akasema, "Enyi wenye imani haba, kwa nini mnajadiliana wenyewe kwa wenyewe kwamba hamna mkate? ⁹Je, bado hamfahamu? Hamkumbuki ile mikate mitano kwa wale watu 5,000, na vikapu vingapi mlivyokusanya?

¹⁰"Au ile mikate saba kwa wale watu 4,000, na vikapu vingapi mlivyokusanya?

¹¹"Kwa nini hamfahamu kwamba sikuwa nikizungumza nanyi juu ya mkate? Jihadharini na chachu ya Mafarisayo na Masadukayo."

¹²Ndipo wakafahamu kwamba hakuwaambia wajihadhari na chachu iliyo ndani ya mkate, bali na mafundisho ya Mafarisayo na Masadukayo.

Petro Amkiri Mwana wa Baba

¹³Alipofika katika eneo la Kaisaria Filipi, Yesu akawauliza wanafunzi wake, "Watu husema Mwana wa Adamu ni nani?"

¹⁴Wakasema, "Wengine husema ni Yohana Mbatizaji, wengine Eliya, na wengine Yeremia au mmoja wa manabii."

¹⁵Akawaambia, "Lakini ninyi mwasema mimi ni nani?"

¹⁶Simoni Petro akajibu, "Wewe ndiwe Kristo, Mwana wa Baba aliye hai."

¹⁷Yesu akajibu, "Simoni mwana wa Yona, umebarikiwa—mwili na damu havikukufunulia haya, bali Baba yangu aliye mbinguni.

¹⁸"Nami nakuambia: wewe ndiwe Petro, na juu ya mwamba huu nitalijenga kanisa langu; malango ya kuzimu hayatalishinda.

¹⁹"Nitakupa funguo za ufalme wa Baba yetu; lo lote utakalolifunga duniani litakuwa limefungwa mbinguni, na lo lote utakalolifungua duniani litakuwa limefunguliwa mbinguni."

²⁰Kisha akawakataza wanafunzi kwa nguvu wasimwambie mtu ye yote kwamba yeye ndiye Kristo.

Mwana Lazima Ateseke na Kufufuka

²¹Tangu wakati huo, Yesu akaanza kuwaambia wanafunzi wake kwamba hana budi kwenda Yerusalemu, kuteseka mengi kwa mikono ya wazee, wakuu wa makuhani, na waandishi, kuuawa, na kufufuliwa siku ya tatu.

²²Petro akamchukua kando, akaanza kumkemea: "La hasha, Bwana! Jambo hili halitakupata kamwe."

²³Lakini yeye akageuka na kumwambia Petro, "Rudi nyuma yangu, Shetani! Wewe ni kikwazo kwangu, kwa sababu hufikirii yale ayajaliyo Baba yetu, bali yale wayajaliyo wanadamu."

²⁴Ndipo Yesu akawaambia wanafunzi wake, "Mtu ye yote anayetaka kunifuata, ni lazima ajikane mwenyewe, ajitwike msalaba wake, na anifuate.

²⁵"Kwa maana ye yote anayetaka kuyaokoa maisha yake atayapoteza, lakini ye yote atakayeyapoteza maisha yake kwa ajili yangu atayapata.

²⁶"Yamfaa nini mtu akiupata ulimwengu wote lakini akaipoteza nafsi yake? Au mtu atatoa nini badala ya nafsi yake?

²⁷"Kwa maana Mwana wa Adamu yu karibu kuja katika utukufu wa Baba yake pamoja na malaika zake, na ndipo atakapomlipa kila mtu kwa kadiri ya matendo yake.

²⁸"Amin, nawaambia: baadhi ya wasimamao hapa hawataonja mauti hata watakapomwona Mwana wa Adamu akija katika ufalme wake."