மத்தேயு 16

அதிகாரம் 16.

16 ¹பரிசேயரும் சதுசேயரும் அவரைச் சோதிக்கும்படி வந்து, வானத்திலிருந்து ஒரு அடையாளத்தைத் தங்களுக்குக் காண்பிக்கும்படி அவரைக் கேட்டார்கள்.

²அவர் மறுமொழியாக: “மாலைவேளையானபோது, ‘வானம் சிவந்திருக்கிறது, ஆகையால் காலநிலை தெளிவாயிருக்கும்’ என்கிறீர்கள்.

³“காலையிலோ, ‘வானம் சிவந்து இருண்டிருக்கிறது, ஆகையால் இன்று புயல் மூளும்’ என்கிறீர்கள். வானத்தின் முகத்தைப் பகுத்தறிய அறிந்திருக்கிறீர்கள், ஆனால் காலங்களின் அடையாளங்களைப் பகுத்தறிய முடியாதிருக்கிறீர்கள்.

⁴“பொல்லாத, உண்மையற்ற சந்ததி அடையாளத்தைத் தேடுகிறது; யோனாவின் அடையாளமேயன்றி வேறே அடையாளம் அதற்குக் கொடுக்கப்படுவதில்லை” என்று சொல்லி, அவர்களை விட்டு அகன்றுபோனார்.

பொய்ப் போதகத்தின் புளித்தமாவு

⁵சீஷர்கள் அக்கரைக்குப் போனபோது, அப்பம் கொண்டுவர மறந்துபோனார்கள்.

⁶இயேசு அவர்களை நோக்கி: “பரிசேயர், சதுசேயருடைய புளித்தமாவைக்குறித்து எச்சரிக்கையாயிருந்து விழிப்பாயிருங்கள்” என்றார்.

⁷அதற்கு அவர்கள்: “நாம் அப்பம் கொண்டுவராதபடியால் இப்படிச் சொல்லுகிறார்” என்று தங்களுக்குள்ளே பேசிக்கொண்டார்கள்.

⁸இயேசு அதை அறிந்து: “அற்பவிசுவாசிகளே, உங்களிடத்தில் அப்பமில்லையென்று உங்களுக்குள்ளே ஏன் பேசிக்கொள்ளுகிறீர்கள்? ⁹இன்னும் நீங்கள் உணராதிருக்கிறீர்களா? ஐயாயிரம்பேருக்குப் பகிர்ந்த அந்த ஐந்து அப்பங்களையும், எத்தனை கூடைகள் சேர்த்தெடுத்தீர்கள் என்பதையும் நினைவுகூராதிருக்கிறீர்களா?

¹⁰“அல்லது நாலாயிரம்பேருக்குப் பகிர்ந்த அந்த ஏழு அப்பங்களையும், எத்தனை கூடைகள் சேர்த்தெடுத்தீர்கள் என்பதையும் நினைவுகூராதிருக்கிறீர்களா?

¹¹“நான் அப்பத்தைக்குறித்து உங்களோடே பேசவில்லை என்பதை நீங்கள் உணராதிருக்கிறதென்ன? பரிசேயர், சதுசேயருடைய புளித்தமாவைக்குறித்தே எச்சரிக்கையாயிருங்கள்” என்றார்.

¹²அப்பத்தின் புளித்தமாவைக்குறித்து அல்ல, பரிசேயர், சதுசேயருடைய போதகத்தைக்குறித்தே எச்சரிக்கையாயிருக்கும்படி அவர் சொன்னார் என்று அப்பொழுது அவர்கள் அறிந்துகொண்டார்கள்.

பேதுரு பிதாவின் குமாரனை அறிக்கையிடுதல்

¹³இயேசு பிலிப்புச் செசரியாவின் திசைகளில் வந்தபோது, தம்முடைய சீஷர்களை நோக்கி: “மனுஷகுமாரன் யார் என்று மக்கள் சொல்லுகிறார்கள்?” என்று கேட்டார்.

¹⁴அதற்கு அவர்கள்: “சிலர் ஸ்நானகனாகிய யோவான் என்றும், சிலர் எலியா என்றும், வேறு சிலர் எரேமியா அல்லது தீர்க்கதரிசிகளில் ஒருவர் என்றும் சொல்லுகிறார்கள்” என்றார்கள்.

¹⁵அதற்கு அவர்: “நீங்கள் என்னை யார் என்று சொல்லுகிறீர்கள்?” என்று கேட்டார்.

¹⁶சீமோன் பேதுரு மறுமொழியாக: “நீர் கிறிஸ்து, ஜீவனுள்ள பிதாவின் குமாரன்” என்றார்.

¹⁷இயேசு அவனை நோக்கி: “யோனாவின் குமாரனாகிய சீமோனே, நீ பாக்கியவான்; மாம்சமும் இரத்தமும் இதை உனக்கு வெளிப்படுத்தவில்லை, பரலோகத்திலிருக்கிற என் பிதாவே இதை வெளிப்படுத்தினார்.

¹⁸“மேலும் நான் உனக்குச் சொல்லுகிறேன்: நீ பேதுரு, இந்தக் கல்லின்மேல் என் சபையைக் கட்டுவேன்; பாதாளத்தின் வாசல்கள் அதை மேற்கொள்வதில்லை.

¹⁹“எங்கள் பிதாவின் ராஜ்யத்தின் திறவுகோல்களை உனக்குத் தருவேன்; பூமியிலே நீ எதைக் கட்டுகிறாயோ அது பரலோகத்திலும் கட்டப்பட்டிருக்கும், பூமியிலே நீ எதை விடுதலையாக்குகிறாயோ அது பரலோகத்திலும் விடுதலையாக்கப்பட்டிருக்கும்” என்றார்.

²⁰அப்பொழுது, தாம் கிறிஸ்து என்று ஒருவருக்கும் சொல்லவேண்டாமென்று தம்முடைய சீஷர்களுக்குக் கண்டிப்பாய்க் கட்டளையிட்டார்.

குமாரன் பாடுபட்டு உயிர்த்தெழவேண்டும்

²¹அதுமுதல், தாம் எருசலேமுக்குப் போய், மூப்பராலும் பிரதான ஆசாரியராலும் வேதபாரகராலும் அநேகம் பாடுபட்டு, கொல்லப்பட்டு, மூன்றாம் நாளில் உயிர்த்தெழவேண்டும் என்று இயேசு தம்முடைய சீஷர்களுக்குச் சொல்லத் தொடங்கினார்.

²²அப்பொழுது பேதுரு அவரைத் தனியே அழைத்துக்கொண்டுபோய்: “ஆண்டவரே, இது ஒருபோதும் நேரிடலாகாது; இது உமக்கு ஒருக்காலும் சம்பவியாது” என்று அவரைக் கடிந்துகொள்ளத் தொடங்கினான்.

²³அவரோ திரும்பிப் பேதுருவை நோக்கி: “சாத்தானே, எனக்குப் பின்னாகப் போ; நீ எனக்கு இடறலாயிருக்கிறாய்; ஏனெனில் நீ எங்கள் பிதாவுக்குரியவைகளைச் சிந்தியாமல், மனிதருக்குரியவைகளைச் சிந்திக்கிறாய்” என்றார்.

²⁴அப்பொழுது இயேசு தம்முடைய சீஷர்களை நோக்கி: “ஒருவன் என் பின்னே வர விரும்பினால், அவன் தன்னைத்தான் வெறுத்து, தன் சிலுவையை எடுத்துக்கொண்டு, என்னைப் பின்பற்றக்கடவன்.

²⁵“ஏனெனில், தன் ஜீவனை இரட்சிக்க விரும்புகிறவன் அதை இழந்துபோவான்; என்னிமித்தம் தன் ஜீவனை இழந்துபோகிறவன் அதைக் கண்டடைவான்.

²⁶“ஒரு மனிதன் உலகம் முழுவதையும் ஆதாயப்படுத்திக்கொண்டாலும், தன் ஆத்துமாவை இழந்துபோனால் அவனுக்கு லாபம் என்ன? அல்லது ஒரு மனிதன் தன் ஆத்துமாவுக்கு ஈடாக என்னத்தைக் கொடுப்பான்?

²⁷“மனுஷகுமாரன் தம்முடைய தூதரோடேகூடத் தம்முடைய பிதாவின் மகிமையில் வரப்போகிறார்; அப்பொழுது அவனவனுடைய கிரியைகளுக்குத்தக்கதாக அவனவனுக்குப் பலனளிப்பார்.

²⁸“மெய்யாகவே நான் உங்களுக்குச் சொல்லுகிறேன்: மனுஷகுமாரன் தம்முடைய ராஜ்யத்தில் வருவதைக் காணுமளவும், இங்கே நிற்கிறவர்களில் சிலர் மரணத்தை ருசிபார்ப்பதில்லை.”