Matiu 16

16 ¹Àwọn Farisi àti àwọn Sadusi wá láti dán an wò, wọ́n ń béèrè pé kí ó fi àmì kan láti ọ̀run hàn wọ́n.

²Ó dáhùn pé, “Nígbà tí alẹ́ bá dé, ẹ̀yin a wí pé, ‘Ojú ọjọ́ yóò dára, nítorí ojú ọ̀run pupa.’

³“Àti ní òwúrọ̀, ‘Ìjì yóò wà lónìí, nítorí ojú ọ̀run pupa, ó sì ṣókùnkùn.’ Ẹ mọ bí a ti ń ka ojú ọ̀run, ṣùgbọ́n ẹ kò lè ka àwọn àmì ìgbà.

⁴“Ìran búburú tí kò sì nígbàgbọ́ ń wá àmì; kì yóò sí àmì tí a ó fún un bí kò ṣe àmì Jona.” Nígbà náà ni ó fi wọ́n sílẹ̀, ó sì lọ.

Ìwúkàrà Ẹ̀kọ́ Èké

⁵Nígbà tí àwọn ọmọ-ẹ̀hìn rékọjá sí òdìkejì, wọ́n ti gbàgbé láti mú àkàrà wá.

⁶Jesu wí fún wọn pé, “Ẹ ṣọ́ra, kí ẹ sì yẹra fún ìwúkàrà àwọn Farisi àti àwọn Sadusi.”

⁷Wọ́n jíròrò èyí láàrin ara wọn, wọ́n sì wí pé, “Nítorí àwa kò mú àkàrà kankan wá ni.”

⁸Jesu mọ èyí, ó sì wí pé, “Èéṣe tí ẹ̀yin fi ń jíròrò láàrin ara yín, ẹ̀yin onígbàgbọ́ kékeré, pé ẹ kò ní àkàrà? ⁹Síbẹ̀, ṣé ẹ kò tí ì yé yín? Ṣé ẹ kò rántí àkàrà márùn-ún fún ẹgbẹ̀rún márùn-ún, àti iye agbọ̀n tí ẹ kójọ?

¹⁰“Tàbí àkàrà méje fún ẹgbẹ̀rún mẹ́rin, àti iye agbọ̀n tí ẹ kójọ?

¹¹“Èéṣe tí kò fi yé yín pé kì í ṣe nípa àkàrà ni mo ń bá yín sọ̀rọ̀? Ẹ ṣọ́ra fún ìwúkàrà àwọn Farisi àti àwọn Sadusi.”

¹²Nígbà náà ni ó wá yé wọn pé kì í ṣe ìwúkàrà inú àkàrà ni ó sọ fún wọn pé kí wọ́n ṣọ́ra fún, bí kò ṣe ẹ̀kọ́ àwọn Farisi àti àwọn Sadusi.

Peteru Jẹ́wọ́ Ọmọ Baba

¹³Nígbà tí ó dé agbègbè Kesarea Filipi, Jesu béèrè lọ́wọ́ àwọn ọmọ-ẹ̀hìn rẹ̀ pé, “Ta ni àwọn ènìyàn ń sọ pé Ọmọ Ènìyàn jẹ́?”

¹⁴Wọ́n sì wí pé, “Àwọn kan ní Johanu Onítẹ̀bọmi, àwọn mìíràn ní Elijah, àwọn mìíràn sì ní Jeremiah tàbí ọ̀kan nínú àwọn wòlíì.”

¹⁵Ó wí fún wọn pé, “Ṣùgbọ́n ẹ̀yin ń sọ pé ta ni èmi?”

¹⁶Simoni Peteru dáhùn pé, “Ẹ̀yin ni Kristi, Ọmọ Baba alààyè.”

¹⁷Jesu dáhùn pé, “Simoni ọmọ Jona, alábùkún-fún ni ìwọ—kì í ṣe ẹran-ara àti ẹ̀jẹ̀ ni ó fi èyí hàn ọ́, bí kò ṣe Baba mi tí ń bẹ ní ọ̀run.

¹⁸“Èmi sì wí fún ọ pé: ìwọ ni Peteru, àti pé lórí àpáta yìí ni èmi yóò kọ́ ìjọ mi; ẹnu-ọ̀nà isà-òkú kì yóò borí rẹ̀.

¹⁹“Èmi yóò fi àwọn kọ́kọ́rọ́ ìjọba Baba wa fún ọ; ohunkóhun tí ìwọ bá dè lórí ilẹ̀-ayé ni a ó ti dè ní ọ̀run, àti ohunkóhun tí ìwọ bá tú sílẹ̀ lórí ilẹ̀-ayé ni a ó ti tú sílẹ̀ ní ọ̀run.”

²⁰Nígbà náà ni ó kìlọ̀ fún àwọn ọmọ-ẹ̀hìn gidigidi pé kí wọ́n má sọ fún ẹnikẹ́ni pé òun ni Kristi.

Ọmọ náà Gbọdọ̀ Jìyà, kí ó sì Jíǹde

²¹Láti ìgbà náà lọ, Jesu bẹ̀rẹ̀ sí í sọ fún àwọn ọmọ-ẹ̀hìn rẹ̀ pé òun gbọdọ̀ lọ sí Jerusalemu, kí òun jìyà púpọ̀ lọ́wọ́ àwọn àgbàgbà, àwọn olórí àlùfáà, àti àwọn akọ̀wé òfin, kí a pa òun, àti kí a jí òun dìde ní ọjọ́ kẹta.

²²Peteru fà á sọ́tọ̀, ó sì bá a wí pé, “Kò ní rí bẹ́ẹ̀, Olúwa! Èyí kì yóò ṣẹlẹ̀ sí yín láéláé.”

²³Ṣùgbọ́n ó yípadà, ó sì wí fún Peteru pé, “Kúrò lẹ́hìn mi, Satani! Ìdènà ni ìwọ jẹ́ fún mi, nítorí ìwọ kò ronú nípa ohun tí Baba wa kà sí, bí kò ṣe ohun tí àwọn ènìyàn kà sí.”

²⁴Nígbà náà ni Jesu wí fún àwọn ọmọ-ẹ̀hìn rẹ̀ pé, “Ẹnikẹ́ni tí ó bá fẹ́ tọ̀ mí lẹ́hìn gbọdọ̀ sẹ́ ara rẹ̀, kí ó gbé àgbélébùú rẹ̀, kí ó sì máa tọ̀ mí lẹ́hìn.

²⁵“Nítorí ẹnikẹ́ni tí ó bá fẹ́ gba ẹ̀mí rẹ̀ là yóò pàdánù rẹ̀, ṣùgbọ́n ẹnikẹ́ni tí ó bá pàdánù ẹ̀mí rẹ̀ nítorí mi yóò rí i.

²⁶“Èrè kín ni ó jẹ́ bí ènìyàn bá jèrè gbogbo ayé ṣùgbọ́n tí ó pàdánù ọkàn rẹ̀? Tàbí kín ni ènìyàn lè fi dípò ọkàn rẹ̀?

²⁷“Nítorí Ọmọ Ènìyàn ń bọ̀ nínú ògo Baba rẹ̀ pẹ̀lú àwọn angẹli rẹ̀, nígbà náà ni yóò sì san fún olúkúlùkù gẹ́gẹ́ bí iṣẹ́ rẹ̀.

²⁸“Lóòótọ́ ni mo wí fún yín: àwọn kan tí ó dúró níhìn-ín kì yóò tọ́ ikú wò títí wọn yóò fi rí Ọmọ Ènìyàn tí ń bọ̀ nínú ìjọba rẹ̀.”