ማቴዎስ 16 FHB Father's Heart Bible™

16 ¹ፈሪሳውያንን ሰዱቃውያንን ክፍትንዎ መፂኦም፥ ካብ ሰማይ ምልክት ከርእዮም ለመንዎ።

²ንሱ ኸዓ ከምዙይ ኢሉ መለሰሎም፦ “ምሸት ምስ ኮነ፥ ‘ሰማይ ቀይሑ ኣሎ እሞ፥ ኣየር ፅቡቕ ክኸውን እዩ’ ትብሉ።”

³“ንግሆ ኸዓ፥ ‘ሰማይ ቀይሑን ፀሚልዩን ኣሎ እሞ፥ ሎሚ ህቦብላ ክኸውን እዩ’ ትብሉ። ገፅ ሰማይ ከተንብቡ ትኽእሉ ኢኹም፥ ምልክት እዋናት ግና ከተንብቡ ኣይትኽእሉን ኢኹም።”

⁴“ክፉእን ዘማውን ትውልዲ ፥ ንምልክት እዩ ዝደሊ ዘሎ፤ ብዘይ ናይ ነቢይ ዮናስ ምልክት ግና ፥ ካልእ ዝወሃቦ ምልክት የብሉን።” ሽዑ ሓዲግዎም ከደ።

ማይ ብሑቕ ትምህርቲ ሓሰት

⁵ደቀ መዛሙርቱ ናብቲ ማዕዶ ምስ ተሳገሩ፥ እንጀራ ኽማልኡ ረሲዖም ነበሩ።

⁶ኢየሱስ ድማ “ተጠንቀቑ፥ ካብ ማይ ብሑቕ ፈሪሳውያንን ሰዱቃውያንን ተጠበቑ” በሎም።

⁷ንሳቶም ከዓ ንስንሳቶም እናተዘራረቡ “እንጀራ ስለ ዘይኣማሊእና እዩ” በሉ።

⁸ኢየሱስ ድማ ነዙይ ፈሊጡ ከምዙይ በሎም፦ “ኣቱም እምነት ዝወሓደኩም፥ እንጀራ ስለ ዘይብልኩም ስለ ምንታይ ንስንሳትኩም ትዘራረቡ ኣለኹም? ⁹ገና ኣይተረዳእኩምን ዲኹም? ነቲ ሓሙሽተ እንጀራ ናይ እቶም ሓሙሽተ ሺሕ፥ ክንደይ መሶብ ከም ዝኣከብኩምውን ኣይትዝክሩን ዲኹም?

¹⁰“ወይ ነቲ ሸውዓተ እንጀራ ናይ እቶም ኣርባዕተ ሺሕ፥ ክንደይ መሶብ ከም ዝኣከብኩም?

¹¹“ብዛዕባ እንጀራ ኸም ዘይተዛረብኩኹም ስለ ምንታይ ኣይተረዳእኩምን? ካብ ማይ ብሑቕ ፈሪሳውያንን ሰዱቃውያንን ተጠንቀቑ።”

¹²ሽዑ ካብ ማይ ብሑቕ እንጀራ ዘይኮነስ፥ ካብ ትምህርቲ ፈሪሳውያንን ሰዱቃውያንን ክጥንቀቑ ኸም ዝበሎም ኣስተውዓሉ።

ጴጥሮስ ንወዲ ኣቦ መስከረ

¹³ኢየሱስ ናብ ከባቢ ቂሳርያ ፊልጶስ መፂኡ፥ ንደቀ መዛሙርቱ “ሰብ ንወዲ ሰብ መን ይብልዎ?” ኢሉ ሓተቶም።

¹⁴ንሳቶም ድማ “ገሊኦም ዮሃንስ መጥምቕ፥ ገሊኦም ኤልያስ፥ ገሊኦም ድማ ኤርምያስ ወይ ሓደ ኻብ ነብያት ይብሉ” በልዎ።

¹⁵ንሱ ኸዓ “ንስኻትኩምከ ንኣይ መን ትብሉኒ?” በሎም።

¹⁶ስምኦን ጴጥሮስ ድማ “ንስኻ ክርስቶስ፥ ወዲ ህያው ኣቦ ኢኻ” ኢሉ መለሰ።

¹⁷ኢየሱስ ድማ ከምዙይ ኢሉ መለሰሉ፦ “ኦ ስምኦን ወዲ ዮናስ፥ ብፁእ ኢኻ፤ እዙይ እቲ ኣብ ሰማያት ዘሎ ኣቦይ እምበር፥ ስጋን ደምን ኣይገለፀልካን እዩ።

¹⁸“ኣነ ድማ እብለካ ኣለኹ፦ ንስኻ ጴጥሮስ ኢኻ፤ ኣብዛ ኽውሒ እዚኣ ድማ ቤተ ክርስቲያነይ ክሃንፅ እየ፤ ደጌታት ሲኦልውን ኣይስዕርዎን እዮም።

¹⁹“መፋትሕ መንግስቲ ኣቦና ድማ ክህበካ እየ፤ ኣብ ምድሪ ንዝኣሰርካዮ ዅሉ ፥ ኣብ ሰማይ እሱር ኮይኑ ክፀንሕ እዩ፤ ኣብ ምድሪ ንዝፈታሕካዮ ዅሉ ድማ ፥ ኣብ ሰማይ ፍቱሕ ኮይኑ ክፀንሕ እዩ።”

²⁰ሽዑ ንሱ ክርስቶስ ምዃኑ ንሓደ እኳ ኸይነግሩ ንደቀ መዛሙርቱ ኣትሪሩ ኣዘዞም።

ወልድ ክሳቐን ክትንስእን ኣለዎ

²¹ካብታ መዓልቲ እቲኣ ጀሚሩ ኢየሱስ ናብ ኢየሩሳሌም ክኸይድ፥ ካብ ሽማግለታትን ሊቃነ ካህናትን መምህራን ሕግን ብዙሕ መከራ ክቕበል፥ ክቕተል፥ ብሳልሳይ መዓልቲ ድማ ክትንስእ ከም ዘለዎ ንደቀ መዛሙርቱ ክነግሮም ጀመረ።

²²ጴጥሮስ ድማ ንበይኑ ወሲዱ “ከምኡ ኣይኹን፥ ኦ ጐይታ! እዙይ ከቶ ኣይረኸበካን” ኢሉ ገሰፆ።

²³ንሱ ግና ግልስ ኢሉ ንጴጥሮስ ከምዙይ በሎ፦ “ኦ ሰይጣን፥ ናብ ድሕረይ ኪድ! ንስኻ ዕንቅፋት ኢኻሞ፤ እቲ ኣቦና ዝግደሰሉ ዘይኮነስ፥ እቲ ሰብ ዝግደሰሉ ትሓስብ ኣለኻ።”

²⁴ሽዑ ኢየሱስ ንደቀ መዛሙርቱ ከምዙይ በሎም፦ “ደድሕረይ ክስዕብ ዝደሊ ዅሉ፥ ንነፍሱ ይኽሓድ፥ መስቀሉ ፆይሩ ድማ ይስዓበኒ።

²⁵“ንህይወቱ ኸድሕን ዝደሊ ዅሉ ኼጥፍኣ እዩ እሞ፤ ንህይወቱ ምእንታይ ዘጥፍኣ ግና ኺረኽባ እዩ።

²⁶“ሓደ ሰብ ኵላ ዓለም እንተ ኣትረፈ፥ ንነፍሱ ግና እንተ ኣጥፍአ፥ እንታይ ይጠቕሞ? ወይ ሰብ ክንዲ ነፍሱ እንታይ ክህብ ይኽእል?

²⁷“ወዲ ሰብ ብኽብሪ ኣቦኡ ምስ መላእኽቱ ክመፅእ እዩ እሞ፤ ሽዑ ድማ ንነፍሲ ወከፍ ከም ግብሩ ክፈድዮ እዩ።

²⁸“ብሓቂ እብለኩም ኣለኹ፦ ኣብዙይ ደው ዝበሉ ኻብቶም ዘለዉ ገሊኦም፥ ወዲ ሰብ ብመንግስቱ ክመፅእ ክሳዕ ዝርእዩ፥ ሞት ኣይጥዕሙን እዮም።”