ማቴዎስ 16

16 ¹ፈሪሳውያንና ሰዱቃውያን ሊፈትኑት መጡ፤ ከሰማይም ምልክት እንዲያሳያቸው ጠየቁት።

²እርሱም መልሶ እንዲህ አላቸው፤ “ምሽት በሚሆንበት ጊዜ፣ ‘ሰማዩ ቀልቶአልና አየሩ ይጥራል’ ትላላችሁ፤

³ጠዋትም፣ ‘ሰማዩ ቀልቶና ጠቍሮአልና ዛሬ ማዕበል ይሆናል’ ትላላችሁ። የሰማዩን ገጽ መለየት ታውቃላችሁ፤ የዘመኑን ምልክቶች ግን መለየት አትችሉም።

⁴ክፉና አመንዝራ ትውልድ ምልክት ይሻል፤ ከዮናስ ምልክት በቀር ሌላ ምልክት አይሰጠውም።” ከዚያም ትቶአቸው ሄደ።

የሐሰት ትምህርት እርሾ

⁵ደቀ መዛሙርቱ ወደ ማዶ ሲሻገሩ፣ እንጀራ ይዘው መሄድ ረስተው ነበር።

⁶ኢየሱስም፣ “ተጠንቀቁ፤ ከፈሪሳውያንና ከሰዱቃውያን እርሾ ተጠበቁ” አላቸው።

⁷እነርሱም እርስ በርሳቸው፣ “ይህን ያለው እንጀራ ስላላመጣን ነው” ተባባሉ።

⁸ኢየሱስም ይህን ዐውቆ እንዲህ አላቸው፤ “እናንተ እምነት የጐደላችሁ፣ እንጀራ ስለሌላችሁ እርስ በርሳችሁ ለምን ትነጋገራላችሁ? ⁹እስከ አሁን አላስተዋላችሁምን? አምስቱን እንጀራ ለአምስት ሺው ሰዎች፣ ስንት ቅርጫትም እንዳነሣችሁ አታስታውሱምን?

¹⁰ወይስ ሰባቱን እንጀራ ለአራት ሺው ሰዎች፣ ስንት መሶብም እንዳነሣችሁ?

¹¹ስለ እንጀራ እንዳልተናገርኋችሁ እንዴት አታስተውሉም? ከፈሪሳውያንና ከሰዱቃውያን እርሾ ተጠንቀቁ።”

¹²በዚያን ጊዜ ከእንጀራ እርሾ ሳይሆን ከፈሪሳውያንና ከሰዱቃውያን ትምህርት እንዲጠበቁ እንደ ነገራቸው ተረዱ።

ጴጥሮስ የአብን ልጅ መሰከረ

¹³ኢየሱስ ወደ ቂሳርያ ፊልጶስ አካባቢ በደረሰ ጊዜ፣ ደቀ መዛሙርቱን፣ “ሰዎች የሰው ልጅ ማን እንደ ሆነ ይላሉ?” ሲል ጠየቃቸው።

¹⁴እነርሱም፣ “አንዳንዶች መጥምቁ ዮሐንስ፣ ሌሎች ኤልያስ፣ ሌሎችም ኤርምያስ ወይም ከነቢያት አንዱ ነው ይላሉ” አሉ።

¹⁵እርሱም፣ “እናንተስ እኔ ማን እንደ ሆንሁ ትላላችሁ?” አላቸው።

¹⁶ስምዖን ጴጥሮስም መልሶ፣ “አንተ ክርስቶስ፣ የሕያው አብ ልጅ ነህ” አለ።

¹⁷ኢየሱስም መልሶ እንዲህ አለው፤ “የዮና ልጅ ስምዖን ሆይ፣ ብፁዕ ነህ፤ ይህን የገለጠልህ በሰማይ ያለው አባቴ እንጂ ሥጋና ደም አይደለም።

¹⁸እኔም እልሃለሁ፤ አንተ ጴጥሮስ ነህ፤ በዚህችም ዐለት ላይ ቤተ ክርስቲያኔን እሠራለሁ፤ የመቃብር ደጆችም አያሸንፉአትም።

¹⁹የአባታችንንም መንግሥት መክፈቻዎች እሰጥሃለሁ፤ በምድር የምታስረው ሁሉ በሰማይ የታሰረ ይሆናል፤ በምድርም የምትፈታው ሁሉ በሰማይ የተፈታ ይሆናል።”

²⁰ከዚያም ክርስቶስ መሆኑን ለማንም እንዳይናገሩ ደቀ መዛሙርቱን አጥብቆ አዘዛቸው።

ወልድ መከራ ሊቀበልና ሊነሣ ይገባዋል

²¹ከዚያን ጊዜ ጀምሮ ኢየሱስ ወደ ኢየሩሳሌም መሄድ፣ ከሽማግሌዎች፣ ከካህናት አለቆችና ከጻፎች ብዙ መከራ መቀበል፣ መገደልና በሦስተኛው ቀን መነሣት እንዳለበት ለደቀ መዛሙርቱ መንገር ጀመረ።

²²ጴጥሮስም ወደ ጎን ወስዶ፣ “ጌታ ሆይ፣ ይህ ከአንተ ይራቅ! ይህ ከቶ አይሁንብህ” ሲል ገሠጸው።

²³እርሱ ግን ዘወር ብሎ ጴጥሮስን፣ “አንተ ሰይጣን፣ ከኋላዬ ሂድ! አባታችን የሚያስበውን ሳይሆን ሰዎች የሚያስቡትን ታስባለህና ዕንቅፋት ሆነህብኛል” አለው።

²⁴ከዚያም ኢየሱስ ደቀ መዛሙርቱን እንዲህ አላቸው፤ “ማንም ሊከተለኝ የሚወድድ ራሱን ይካድ፣ መስቀሉንም ተሸክሞ ይከተለኝ።

²⁵ነፍሱን ሊያድን የሚወድድ ሁሉ ያጠፋታልና፤ ስለ እኔ ግን ነፍሱን የሚያጠፋ ሁሉ ያገኛታል።

²⁶ሰው ዓለሙን ሁሉ ቢያተርፍ ነፍሱን ግን ቢያጠፋ ምን ይጠቅመዋል? ወይስ ሰው ስለ ነፍሱ ቤዛ ምን ሊሰጥ ይችላል?

²⁷የሰው ልጅ ከመላእክቱ ጋር በአባቱ ክብር ሊመጣ ተቃርቦአልና፤ ያን ጊዜም ለእያንዳንዱ እንደ ሥራው ይከፍለዋል።

²⁸እውነት እላችኋለሁ፤ የሰው ልጅ በመንግሥቱ ሲመጣ እስኪያዩ ድረስ እዚህ ከሚቆሙት መካከል አንዳንዶች ሞትን አይቀምሱም።”