Matthew 16

16 ¹Phariseebing eina Sadduceebingna Jishuli chāng yangkida rai, kazingramwui eina machut akha athumli chithei khavai ali poi.

²Ana ngahānkai, "Kazing khaying eina, nathumna 'Kazing phāra, kaja kazingram hunga' da hāng.

³"Kala ngathor, 'Aja kazing ngashumra, kaja kazingram hunga kala khanangzan' da hāng. Nathumna khamasaiwui kashok chi yanglaga hāngshapa, kha atamwui machut chi mahāngshaprarmana.

⁴"Makaphā kala makhaleiva̱ thotna machut phāzata; kha Jonahwui machut maningla machut khangatei mamimara." Chieina ana athumli horhailaga thuihaowa.

Minama Tamkachitheiwui Khawok

⁵Sākhangatha̱bingna lākhavāk kānkā tharan, khamui khuiphung malaihaida makhuiphungthuwa.

⁶Jishuna athumli hānga, "Ning ngasharlu, kala Pharisee eina Sadduceebingwui khawok chili ngasharlu."

⁷Athumna akha eina akha ngazek ngarokta hānga, "Ithumna khamui makhuiphungrarwui vangna."

⁸Chi theida, Jishuna hānga, "Nathum shitkasang kateobing, khamui makhuikaphungwui vang khisāda nathum akha eina akha ngazek ngarokhala? ⁹Aruila nathum bhap matāranglā? Mi thing phangāwui khamui phangā chi, kala luk kayākha kazipkhuikhala chi maphaningungla?

¹⁰"Lah mi thing matiwui khamui shini chi, kala luk kayākha kazipkhuikhala chi maphaningungla?

¹¹"Ina nathumli khamuiwui pongli matuimana da khisāda bhap matāranglā? Pharisee eina Sadduceebingwui khawok chili ngasharlu."

¹²Chiwui thili, ana khamuiwui khawok chili ngasharlu da mahāngmana, kha Pharisee eina Sadduceebingwui tamkachithei chili ngasharlu da hāng kaji hi athumna bhap tāhaowa.

Peterna Avāwui Naomayarali Hāngphat

¹³Jishuna Caesarea Philip ngaleili vākashung eina, awui sākhangatha̱bingli ngahāna, "Miwui Naomayarali mibingna khipāna da jikhala?"

¹⁴Athumna hānga, "Mi kaikha mina Ra̱hikme John ji da hāng, kaikha mina Elijah ji, khangatei mi kaikhana Jeremiahna lah marānbingwui ngachaili akhara ji."

¹⁵Ana athumli hānga, "Kha nathumna ili khipāna da jikhala?"

¹⁶Simon Peterna ngahānkai, "Na Khrista, kharinga Avāwui Naomayara china."

¹⁷Jishuna ngahānkai, "Jonahwui naomayara Simon, na sokhami ngasāhaira, kaja asā kala asheena hi nali machitheimana, kha kazingramli khaleia iwui Avāna chitheihaira.

¹⁸"Kala ina nali kahāngna: na Peterna, kala lunghār hitungli iwui church chi sākāra; kathiwui ngaveibing china chili mayuirarmara.

¹⁹"Ina nali ithumwui Avā wungramwui sho mira; kachikathāli nana okathuili khalap kahai chi kazingramlila khalapra, kala kachikathāli nana okathuili khalāmi kahai chi kazingramlila khalāmira."

²⁰Chiwui thili ana Khristana kaji chi mi khipālikha mahānglakalu da awui sākhangatha̱bingli ningmi.

Anaomayarana Kachot Phungphalungra kala Ringluira

²¹Chithang eina thuida Jishuna awui sākhangatha̱bingli, ana Jerusalemli vāphalungra kala ararbing, pāngmon akhokabing, kala ain kathembingwui eina kakhanang kachot samphangra, kala shaothatra, kala kakathumathang ringluira da hāngchitheiphoka.

²²Kala Peterna ali hokhuilaga kaharda hānga, "Maningphutmana, Proho! Hi nawuitungli mashoklakmara."

²³Kha ana ngareiungda Peterli hānga, "Ikhanukshong unghaolu, Satan! Na iwui shongfali hapkakhano, kaja na ithumwui Avāna phaningmi kaji chi machukmana, kha mibingna phaningmi kaji chi chukta lei."

²⁴Chiwui thili Jishuna awui sākhangatha̱bingli hānga, "Kachikathā mina ithi rāra shurakha, ana khalattawui ningkachāng horhailaga, awui krush chi phungda ithili shurranu.

²⁵"Kaja kachikathāna awui mirin kankhuiga jiakha chi shimānra; kha kachikathāna iwui vang eina awui mirin shimānkha china chi samphangra.

²⁶"Mi akhana okathui katong chi samphangda awui mirin chi shimānhaiakha, khi tongkazā leikhala? Lah mi akhana khi eina awui mirin chi ngatha̱khuishapkhala?

²⁷"Kaja miwui Naomayarana awui Avāwui tekhamatei eina awui kazingraobingli ngasoda kharāra, kala chithang mi kachiva̱li kachichāwui otsak athishurda sāman mira.

²⁸"Kachangkhat eina ina nathumli kahāngna, hili nganingda mi kaikhana, miwui Naomayara awui wungramli rāra chi matheiranglakha, kathi mamazapmara."