Kulomba Kidimbu ku Zilu
Phetelu wázimbula ni yandi wenina Kidisitu, Mwana wa Tata wetu wuna wa luzingu, amana kunima ndambu watelwa Satana kikuma kabwisa mu kuyuka ni Kidisitu yandi bulungini bamuhonda. Kulanda yandi, Yesu wázimbula, kwenina kudisuwangana ngeyi mosi yi kunata kulunsi kyaku, kaasi konda kudisula mu kyawu.
16 1Bafwadisi yi Basadise bísa kwena Yesu kikuma kya kumuleya, hanga bámulomba kabasongila kidimbu kyatuka ku zilu.
2«Amana tangwa dikwísa masika, lwisi zonza: “Zulu kyenina mboti, mukuma zulu kabengi kyenina.”
3«Amana muna suka, lwisi zonza: “Mvula kakála ntangu yayi, mukuma zulu kabengi kyenina amana kyalekama mbunzu.” Luzayi kubakula mbunzu ya zulu, kaasi lwisiku lenda kubakula bidimbu bya ntangu.
4«Mbandu yayi ya mbi, yakonda lukwikilu, yibati sanda kidimbu; kaasi kidimbu kimosi bakáhanaku, kaka kidimbu kya Yonasi.» Amana Yesu wábayambula, wákatuka.
Muvimbu wa Malongi ma Bukamvi
5Buna balonguki básabuka ku sambwa dikwawu, bázimbakana mu kunata mapha.
6Yesu wubazimbwadi: «Kebenu! Dikengenu ku muvimbu wa Bafwadisi yi Basadise.»
7Bawu bekazonzila bawu yi bawu amana bázimbula: «Dyenina kikuma kya betu twanati mapha ku.»
8Buna kábakulabwa Yesu, wubazimbwadi: «A benu ba lukwikilu lwa tswatsu, kikuma kya biki lubati tendanina benu yi benu ni lukondi mapha? 9Khaniku kedi lubakisa? Luzimbakani ni mapha matanu ma batu tsambwadi-kama, yi bitunga biki lwavusa?
10«Kondilo mapha tsambwadi ma batu hyandima-kama, yi bitunga biki lwahungudi?
11«Kikuma kya biki lwisiku bakisa ni kya mapha ku yiluzonzidini? Dikengenu ku muvimbu wa Bafwadisi yi Basadise.»
12Hanga balonguki babakudi ni Yesu kábazimbwalaku kabakenga ku muvimbu wenina mu mapha, kaasi kabakenga ku malongi ma Bafwadisi yi ma Basadise.
Phetelu Wutambwasidi Mwana wa Tata
13Buna kátula mu kinzunga kya Sezale dya Fidiphu, Yesu wáhyula balonguki bandi: «Nati bisi zonza batu ni Mwana wa mutu kenina?»
14Bamuzimbwadini: «Bahika bisi tela ni ngeyi wenina Yowani Mubotiki, bakwawu ni Diya, bakwawu hika ni Yelemiya, kondilo mosi mu bambikudi.»
15Yandi wubazimbwadi: «Kaasi benu nati lubati zonza ni meni yenina?»
16Simoni Phetelu wávutula: «Ngeyi wenina Kidisitu, Mwana wa Tata wa moya.»
17Yesu wávutula: «A Simoni mwana wa Yonasi, ngeyi wenina mutu wa nsambu; mukuma musuni yi menga byánsongilaku dyadi, kaasi Tata wama wuna wenina mu mazilu.
18«Amana yikuzimbwadi: ngeyi wenina Phetelu, amana ha thandu ya tadi yayi yikatunga dibundu dyama; mwelu mya kalunga mikadínungaku.
19«Yikúkabu minsabi mya Kipfumu kya Tata wetu; moosu mana wakása ha tsi makásama kuna zilu, amana moosu mana wakútumuna ha tsi makútumuka kuna zilu.»
20Hanga wátoma kandisa balonguki ndangu bazayisabwoku kwena mutu ni yandi wenina Kidisitu.
Mwana Kafwana Mona Phasi Amana Kafútumuka
21Kunima dya bwabuna, Yesu wáyandika kuzimbula kwena balonguki bandi ni kafwana wenda ku Yelusalemi, kamona phasi za lawu kwena bambuta yi bapfumu ba banganga Nzambi yi balongi ba mitsiku, bamúhonda amana kafútumuka muna kilumbu kyatatu.
22Phetelu wumunati ku kabeta amana wekina mukaya: «Loni, A Pfumu! Dyadi dikádibwanaku kwena ngeyi.»
23Kaasi Yesu wábaluka amana wuzimbudi kwena Phetelu: «Vutuka ku manima mama, Satana! Ngeyi wenina kisimbila kwena meni, mukuma wusiku banza mambu ma Tata wetu, kaasi mambu ma batu.»
24Hanga Yesu wuzimbudi kwena balonguki bandi: «Wosu wuna wazodi kwisa ku manima mama, kadisuwangana yandi-meni, kabonga kitakani kyandi amana kandanda.
25«Mukuma wuna wásanda kuhulula luzingu lwandi, katótisalwa; kaasi wuna watótisa luzingu lwandi kikuma kya meni katámbulalwa.
26«Khi mupfunu kwena mutu kavwa tsi yosu, kaasi katotisa moya wandi? Kondilo biki mutu kafwani kuhana tambwa-tambwa yi moya wandi?
27«Mukuma Mwana wa mutu wena belabela yi kwisa mu khembu ya Tata wandi, kumosi yi banzyo bandi; amana kafúta kosu mutu bwosu buna myenina mihangu myandi.
28«Mu kyedika, yiluzimbwadini: bahika, mu kati dya babana batelama haha, bakádifwilaku, tii yi kuna bamona Mwana wa mutu wekwísa mu Kipfumu kyandi.»
