Mateo 16

16 ¹Miduol kaniya ang mga Pariseo ug mga Saduseo aron sulayan siya, nga naghangyo kaniya nga pakitaan sila ug ilhanan gikan sa langit.

²Mitubag siya, “Kon moabot na ang gabii, moingon kamo, ‘Maayo ang panahon, kay pula ang langit.’

³“Ug sa buntag, ‘Unosan karon, kay pula ug madag-um ang langit.’ Mahibalo kamong mobasa sa nawong sa langit, apan dili kamo makabasa sa mga ilhanan sa panahon.

⁴“Usa ka daotan ug maluibong kaliwatan nangita ug ilhanan; walay ilhanan nga ihatag gawas sa ilhanan ni Jonas.” Unya gibiyaan niya sila ug milakaw.

Ang Igpapatubo sa Bakak nga Pagtulon-an

⁵Sa pagtabok sa mga tinun-an ngadto sa pikas daplin, nalimtan nila ang pagdala ug tinapay.

⁶Miingon si Jesus kanila, “Pagbantay ug pag-amping sa igpapatubo sa mga Pariseo ug mga Saduseo.”

⁷Naglalis sila niini sa ilang kaugalingon ug miingon, “Tungod kay wala kita makadalag tinapay.”

⁸Sa nasayran niya kini, miingon si Jesus, “Nganong naglalisay man kamo sa inyong kaugalingon, kamong gagmayg pagtuo, nga wala kamoy tinapay? ⁹Wala pa ba gihapon kamo makasabot? Wala ba kamo makahinumdom sa lima ka tinapay alang sa 5,000, ug kon pila ka bukag ang inyong natigom?

¹⁰“O ang pito ka tinapay alang sa 4,000, ug kon pila ka bukag ang inyong nahipos?

¹¹“Nganong dili man kamo makasabot nga wala ako magsulti kaninyo mahitungod sa tinapay? Pagbantay sa igpapatubo sa mga Pariseo ug mga Saduseo.”

¹²Unya nasabtan nila nga wala siya magsulti kanila sa pag-amping sa igpapatubo nga anaa sa tinapay, kondili sa pagtulon-an sa mga Pariseo ug mga Saduseo.

Giila ni Pedro ang Anak sa Amahan

¹³Sa pag-abot sa dapit sa Cesarea Filipos, nangutana si Jesus sa iyang mga tinun-an, “Kinsa man, matod sa mga tawo, ang Anak sa Tawo?”

¹⁴Miingon sila, “Ang uban nag-ingon nga si Juan nga Magbabawtismo, ang uban si Elias, ang uban pa si Jeremias o usa sa mga propeta.”

¹⁵Miingon siya kanila, “Apan alang kaninyo, kinsa man ako?”

¹⁶Mitubag si Simon Pedro, “Ikaw ang Cristo, ang Anak sa buhing Amahan.”

¹⁷Mitubag si Jesus, “Simon nga anak ni Jonas, bulahan ka—dili ang unod ug dugo ang nagpadayag niini kanimo, kondili ang akong Amahan sa langit.

¹⁸“Ug sultihan ko ikaw: ikaw si Pedro, ug niining bato tukoron ko ang akong iglesia; ang mga ganghaan sa lubnganan dili makabuntog niini.

¹⁹“Ihatag ko kanimo ang mga yawi sa gingharian sa atong Amahan; bisan unsa ang imong gapuson dinhi sa yuta magapus na sa langit, ug bisan unsa ang imong buhian dinhi sa yuta mabuhian na sa langit.”

²⁰Unya hugot niyang gimandoan ang mga tinun-an nga dili isulti kang bisan kinsa nga siya ang Cristo.

Kinahanglang Mag-antos ug Mabanhaw ang Anak

²¹Sukad niadto, si Jesus misugod sa pagsulti sa iyang mga tinun-an nga kinahanglan siyang moadto sa Jerusalem, mag-antos pag-ayo gikan sa mga anciano, mga pangulong pari, ug mga escriba, patyon, ug banhawon sa ikatulo ka adlaw.

²²Gidala siya ni Pedro sa pikas ug gibadlong siya: “Dili gayod, Ginoo! Dili gayod kini mahitabo kanimo.”

²³Apan milingi siya ug miingon kang Pedro, “Pahawa sa akong atubangan, Satanas! Usa ka babag ka kanako, kay wala ka maghunahuna sa mga butang nga gipakabana sa atong Amahan, kondili sa mga butang nga gipakabana sa mga tawo.”

²⁴Unya miingon si Jesus sa iyang mga tinun-an, “Si bisan kinsa nga buot mosunod kanako kinahanglan maglimod sa iyang kaugalingon, magpas-an sa iyang krus, ug mosunod kanako.

²⁵“Kay si bisan kinsa nga buot magluwas sa iyang kinabuhi mawad-an niini, apan si bisan kinsa nga mawad-an sa iyang kinabuhi tungod kanako makakaplag niini.

²⁶“Unsa may kapuslanan kon maangkon sa usa ka tawo ang tibuok kalibotan apan mawad-an sa iyang kalag? O unsa may ikahatag sa usa ka tawo baylo sa iyang kalag?

²⁷“Kay ang Anak sa Tawo moabot na diha sa himaya sa iyang Amahan uban sa iyang mga anghel, ug unya magabalos sa matag tawo sumala sa iyang binuhatan.

²⁸“Sa pagkatinuod sultihan ko kamo: ang uban nga nagbarog dinhi dili makatilaw sa kamatayon hangtod nga makita nila ang Anak sa Tawo nga moabot diha sa iyang gingharian.”