Meetap Johana Kabatisanindet
Herod, amu ki ng'at eng' aryomnatennyi eng' sigeetap poiboiyet, kotilji Johana metit. Istoegei Jeso si korur, ago koosup tuiyet ineendet, ak kobae icheek eng' magatiinik mut. Letap nooto, kowolu Petero parak peek kotokyi ineendet, kogeer koristo, ak kotoi konyoe.
14 1Ki kas eng' peetuusyechooto Herod laitoryat ng'aleek che agobo Jeso. 2Ki leenji otwogikyik, “Ni ko Johana Kabatisanindet, ne kaging'eet eng' meet—kanyonjin anyun koyaei kimnatosyek chu eng' ineendet.” 3Amu ki nam Herod Johana, ak ki ratyi ineendet, ak kotoorchi korgoreet agobo Herodias, osotyotap tupchennyi Philipu, 4amu ki leenji Johana, “Ma nyolu si itinye ineendet.” 5Ki mache Herod kobar ineendet, ago ki iywei tuiyet, amu ki keere icheek Johana ko maotindet. 6Ago ye kingo it peetuutap sigeetap Herod, koureren cheptap Herodias eng' tainnywa, ak kibaibai Herod, 7nooto anyun ko kayom eng' mumeek, kole kogoochi kiit age tugul ne soomei. 8Ye ki ong'at kamennyi, komwa kole, “Konoo metitap Johana Kabatisanindet yu, eng' sanit.”
9Ki iimak laitoryat, ago amu mumeekyik ak toek che ki kiguur, ki ng'at kole kigoochi, 10ak ki yookto si kitil metitap Johana eng' korgoreet. 11Ki kiip metinnyi eng' sanit, ak kigoochi chebooto, ne ki iityi kamennyi. 12Kobwa anyun kasubigap Johana, ak konam poorto ak kotup; ak ki pa komwachi Jeso.
Iamisyei Jeso Piik Eliphuusyek Muut
13Ye kingo kas Jeso nooto, ki istoegei eng' moinget kwo komosta ne komosin ineegei kityo. Ago ki kas tuiyosyek ak koosup eng' keelyek kobun nganasook. 14Ye kingo lany emet, kogeer tuiyet ne oo, ak ki riiregei agobo icheek, ak ki isoop piikyik che myandos. 15Ye kingo it koskoleng'ut, ki leenji kasubik, “Komosta ni ko ne komosin, ak kagolanda sait. Istoi tuiyosyek si kwo nganasook ak koaldagei amitwogik.”
16Ago ki leenji Jeso, “Ma machei si kwo. Oiamisyei okweek icheek.”
17Ki leenji, “Ma kitinye kiit yu, kobatee magatiinik muut ak njireenik aeng'.”
18Ki le, “Oibu icheek yu anee.”
19Ki ng'at tuiyosyek kotebee eng' susweek. Ak ki nam magatiinik muut ak njireenik aeng', ak kong'eeny kipsengwet, ak kingo kagogoito kongoi, ak kopchei magatiinik, ak kogoochi kasubik, ak ki igoochi icheek tuiyosyek. 20Ki am tugul ak kobiyo, ak ki oyum mesendoik taman ak aeng' che nyiit, logoek che ki kong'etu. 21Che ki am ko ki olo po murenik eliphuusyek muut, kobatee kwonyiik ak lagok.
Kiwendot Jeso eng' Parak Peek
22Koma tyanit ko ki ng'at kasubik kolaany moinget, ak kwo tai ineendet kobun ngeguut age, ye yani istoi tuiyosyek. 23Kingo kagoisto tuiyosyek, kotogosta tulweet eng' ung'oot si kosaaei. Ye kingo it koskoleng'ut, ki mi yooto ineegei kityo. 24Ki kagolanda moinget kolooch kobun emet, koryep maraneet, ak usoonet agaigai icheek. 25Ye tee sait somok eng' mornet, konyoonji icheek, kiwendot eng' parak cherongo. a a v25 Riibsetap kemeut ne po ang'wan ko ki ye tee sait somok agoi lo eng' mornet—komostanooto ne kirimen ak ne kiuure miising' kotomo kogarorir. 26Ye ki keer kasubik ineendet kiwendot eng' parak cherongo, koiyweis miising', ak kole, “Sagoot ni!” ak kowaach eng' kayweet.
27Ago ki ng'alaalji Jeso icheek eng' yooto, “Onyigoonen! Anee ni; among' oiywei.”
28Kowolji Petero koleenji, “Kiptaiyat, ngot ko inyee, ng'atwo si anyoone eng' parak peek.”
29Ki le, “Nyoo.” Ki lan Petero eng' moinget, ak kiwendot eng' parak peek, ak kwo ole mi Jeso.
30Ago ye kingo keer usoonet ne oo, ki iywei, ak kingo toi koming'initu, kowaach kole, “Kiptaiyat, isaru anee!”
31Eng' yooto ki ryen Jeso eunnyi, ak konam ineendet, ak kole, “Inyee ne ming'in yaneet, amune ki itinye kayaneet?”
32Ak ye kingo lany moinget, ki siisyo usoonet. 33Kolas anyun che ki mi moinget ineendet, kole, “Iman ii Weeriitap Kwandanyo inyee.”
34Ye kingo kagobata, kobwa emetap Gennesaret. 35Ye ki nai murenigap komostanooto ineendet, ki yooto ng'olyoot komoswek tugul che neegit, ak ki iptoi ineendet tugul che myandos. 36Ki soomei ineendet si kotwa kityo tabandap ngoryennyi, ak ki kisoop tugul che ki twa.