ಸ್ನಾನಿಕನಾದ ಯೋಹಾನನ ಮರಣ

ಔತಣದಲ್ಲಿ ಮಾಡಿದ ಪ್ರಮಾಣದಲ್ಲಿ ಸಿಕ್ಕಿಬಿದ್ದ ಹೆರೋದನು ಯೋಹಾನನ ತಲೆ ಕಡಿಸುತ್ತಾನೆ. ಯೇಸು ದುಃಖಿಸಲು ಏಕಾಂತಕ್ಕೆ ಹೋಗುತ್ತಾನೆ, ಆದರೂ ಜನಸಮೂಹ ಹಿಂಬಾಲಿಸುತ್ತದೆ, ಅವನು ಐದು ರೊಟ್ಟಿಗಳಿಂದ ಅವರಿಗೆ ಉಣಿಸುತ್ತಾನೆ. ತರುವಾಯ ಪೇತ್ರನು ನೀರಿನ ಮೇಲೆ ಅವನ ಕಡೆಗೆ ನಡೆಯುತ್ತಾನೆ, ಗಾಳಿಯನ್ನು ನೋಡಿ, ಮುಳುಗತೊಡಗುತ್ತಾನೆ.

ಅಧ್ಯಾಯ 14.

ಆ ಸಮಯದಲ್ಲಿ ಉಪರಾಜನಾದ ಹೆರೋದನು ಯೇಸುವಿನ ಕುರಿತಾದ ಸುದ್ದಿಯನ್ನು ಕೇಳಿದನು. ಅವನು ತನ್ನ ಸೇವಕರಿಗೆ, “ಇವನು ಸತ್ತವರೊಳಗಿಂದ ಎದ್ದುಬಂದ ಸ್ನಾನಿಕನಾದ ಯೋಹಾನನೇ; ಆದ್ದರಿಂದಲೇ ಈ ಶಕ್ತಿಗಳು ಅವನಲ್ಲಿ ಕಾರ್ಯಮಾಡುತ್ತಿವೆ,” ಎಂದು ಹೇಳಿದನು. ತನ್ನ ಸಹೋದರನಾದ ಫಿಲಿಪ್ಪನ ಹೆಂಡತಿಯಾದ ಹೆರೋದ್ಯಳ ನಿಮಿತ್ತ ಹೆರೋದನು ಯೋಹಾನನನ್ನು ಹಿಡಿದು, ಸರಪಣಿಯಿಂದ ಬಂಧಿಸಿ, ಸೆರೆಮನೆಯಲ್ಲಿ ಹಾಕಿಸಿದ್ದನು. ಏಕೆಂದರೆ ಯೋಹಾನನು ಅವನಿಗೆ, “ಅವಳನ್ನು ಇಟ್ಟುಕೊಳ್ಳುವುದು ನಿನಗೆ ನ್ಯಾಯವಲ್ಲ,” ಎಂದು ಹೇಳುತ್ತಾ ಬಂದಿದ್ದನು. ಹೆರೋದನು ಅವನನ್ನು ಕೊಲ್ಲಬೇಕೆಂದಿದ್ದನು; ಆದರೆ ಜನರು ಯೋಹಾನನನ್ನು ಪ್ರವಾದಿ ಎಂದು ಎಣಿಸಿದ್ದರಿಂದ ಅವರಿಗೆ ಹೆದರಿದನು. ಆದರೆ ಹೆರೋದನ ಜನ್ಮದಿನ ಬಂದಾಗ, ಹೆರೋದ್ಯಳ ಮಗಳು ಅವರ ಮುಂದೆ ನಾಟ್ಯವಾಡಿ ಹೆರೋದನನ್ನು ಮೆಚ್ಚಿಸಿದಳು. ಆದ್ದರಿಂದ ಅವಳು ಕೇಳಿದ್ದನ್ನೆಲ್ಲಾ ಕೊಡುತ್ತೇನೆಂದು ಅವನು ಆಣೆಯಿಟ್ಟು ಮಾತುಕೊಟ್ಟನು. ತನ್ನ ತಾಯಿಯ ಪ್ರೇರಣೆಯಿಂದ ಅವಳು, “ಸ್ನಾನಿಕನಾದ ಯೋಹಾನನ ತಲೆಯನ್ನು ಒಂದು ತಟ್ಟೆಯಲ್ಲಿ ಇಲ್ಲೇ ನನಗೆ ಕೊಡಿಸಿ,” ಎಂದಳು.

ಅರಸನು ದುಃಖಪಟ್ಟನು; ಆದರೆ ತಾನು ಇಟ್ಟ ಆಣೆಗಳ ನಿಮಿತ್ತವೂ ಊಟಕ್ಕೆ ಕೂತಿದ್ದ ಅತಿಥಿಗಳ ನಿಮಿತ್ತವೂ ಅದನ್ನು ಕೊಡುವಂತೆ ಅಪ್ಪಣೆಮಾಡಿದನು. ಅವನು ಆಳುಗಳನ್ನು ಕಳುಹಿಸಿ ಸೆರೆಮನೆಯಲ್ಲಿ ಯೋಹಾನನ ತಲೆಯನ್ನು ಕಡಿಸಿದನು. ಅವನ ತಲೆಯನ್ನು ಒಂದು ತಟ್ಟೆಯಲ್ಲಿ ತಂದು ಹುಡುಗಿಗೆ ಕೊಟ್ಟರು; ಅವಳು ಅದನ್ನು ತನ್ನ ತಾಯಿಗೆ ತಂದುಕೊಟ್ಟಳು. ಆಗ ಯೋಹಾನನ ಶಿಷ್ಯರು ಬಂದು ಶವವನ್ನು ತೆಗೆದುಕೊಂಡು ಹೂಳಿಟ್ಟರು; ಬಳಿಕ ಹೋಗಿ ಯೇಸುವಿಗೆ ತಿಳಿಸಿದರು.

ಯೇಸು ಐದು ಸಾವಿರ ಜನರಿಗೆ ಆಹಾರ ನೀಡಿದ್ದು

ಇದನ್ನು ಕೇಳಿ ಯೇಸು ದೋಣಿಯಲ್ಲಿ ಹೊರಟು ಏಕಾಂತವಾದ ನಿರ್ಜನ ಸ್ಥಳಕ್ಕೆ ತಾವೊಬ್ಬರೇ ಹೋದರು. ಆದರೆ ಜನರು ಅದನ್ನು ಕೇಳಿ ಊರುಗಳಿಂದ ಕಾಲ್ನಡೆಯಾಗಿ ಅವರ ಹಿಂದೆ ಹೋದರು. ಅವರು ದಡಕ್ಕೆ ಇಳಿದಾಗ ಜನರ ದೊಡ್ಡ ಗುಂಪನ್ನು ಕಂಡು ಅವರ ಮೇಲೆ ಕನಿಕರಪಟ್ಟು ಅವರಲ್ಲಿದ್ದ ರೋಗಿಗಳನ್ನು ಸ್ವಸ್ಥಪಡಿಸಿದರು. ಸಂಜೆಯಾದಾಗ ಶಿಷ್ಯರು ಅವರ ಬಳಿಗೆ ಬಂದು, “ಇದು ನಿರ್ಜನ ಸ್ಥಳ, ಹೊತ್ತೂ ಆಗಲೇ ಮೀರಿಹೋಗಿದೆ. ಜನರು ಹಳ್ಳಿಗಳಿಗೆ ಹೋಗಿ ತಮಗೆ ಆಹಾರವನ್ನು ಕೊಂಡುಕೊಳ್ಳುವಂತೆ ಅವರನ್ನು ಕಳುಹಿಸಿಬಿಡಿ,” ಎಂದರು.

ಆದರೆ ಯೇಸು ಅವರಿಗೆ, “ಅವರು ಹೋಗಬೇಕಾಗಿಲ್ಲ; ನೀವೇ ಅವರಿಗೆ ಊಟ ಕೊಡಿರಿ,” ಎಂದರು.

ಅದಕ್ಕೆ ಅವರು, “ಇಲ್ಲಿ ನಮ್ಮ ಬಳಿ ಐದು ರೊಟ್ಟಿ ಎರಡು ಮೀನುಗಳ ಹೊರತು ಬೇರೇನೂ ಇಲ್ಲ,” ಎಂದರು.

ಅದಕ್ಕೆ ಅವರು, “ಅವುಗಳನ್ನು ಇಲ್ಲಿ ನನ್ನ ಬಳಿಗೆ ತನ್ನಿರಿ,” ಎಂದರು.

ಜನರು ಹುಲ್ಲಿನ ಮೇಲೆ ಕೂತುಕೊಳ್ಳುವಂತೆ ಅಪ್ಪಣೆಕೊಟ್ಟು, ಆ ಐದು ರೊಟ್ಟಿ ಎರಡು ಮೀನುಗಳನ್ನು ತೆಗೆದುಕೊಂಡು, ಸ್ವರ್ಗದ ಕಡೆಗೆ ನೋಡಿ, ಸ್ತೋತ್ರಮಾಡಿ, ರೊಟ್ಟಿಗಳನ್ನು ಮುರಿದು ಶಿಷ್ಯರಿಗೆ ಕೊಟ್ಟರು; ಶಿಷ್ಯರು ಅವುಗಳನ್ನು ಜನರಿಗೆ ಕೊಟ್ಟರು. ಎಲ್ಲರೂ ತಿಂದು ತೃಪ್ತರಾದರು; ಮಿಕ್ಕ ತುಂಡುಗಳನ್ನು ಅವರು ಹನ್ನೆರಡು ಪುಟ್ಟಿ ತುಂಬಾ ಎತ್ತಿದರು. ತಿಂದವರು ಸ್ತ್ರೀಯರನ್ನೂ ಮಕ್ಕಳನ್ನೂ ಬಿಟ್ಟು ಸುಮಾರು 5,000 ಗಂಡಸರಿದ್ದರು.

ಯೇಸು ನೀರಿನ ಮೇಲೆ ನಡೆದದ್ದು

ಕೂಡಲೇ ಯೇಸು ಜನರನ್ನು ಕಳುಹಿಸಿಬಿಡುತ್ತಿರುವಾಗ, ಶಿಷ್ಯರು ದೋಣಿಯನ್ನು ಹತ್ತಿ ತಮ್ಮ ಮುಂದಾಗಿ ಆಚೆದಡಕ್ಕೆ ಹೋಗುವಂತೆ ಮಾಡಿದರು. ಜನರನ್ನು ಕಳುಹಿಸಿದ ಮೇಲೆ ಅವರು ಪ್ರಾರ್ಥನೆಮಾಡಲು ಏಕಾಂತವಾಗಿ ಬೆಟ್ಟವನ್ನು ಹತ್ತಿದರು. ಸಂಜೆಯಾದಾಗ ಅವರು ಅಲ್ಲಿ ಒಬ್ಬರೇ ಇದ್ದರು. ದೋಣಿಯು ಆಗಲೇ ದಡದಿಂದ ಬಹುದೂರ ಸಾಗಿತ್ತು; ಗಾಳಿ ಎದುರಾಗಿದ್ದರಿಂದ ಅಲೆಗಳು ಅದನ್ನು ಬಡಿಯುತ್ತಿದ್ದವು. ಬೆಳಗಿನ ಜಾವ ಸುಮಾರು ಮೂರು ಗಂಟೆಗೆ ಅವರು ಸಮುದ್ರದ ಮೇಲೆ ನಡೆಯುತ್ತಾ ಅವರ ಬಳಿಗೆ ಬಂದರು. ^a ಅವರು ಸಮುದ್ರದ ಮೇಲೆ ನಡೆಯುವುದನ್ನು ಕಂಡು ಶಿಷ್ಯರು ಗಾಬರಿಗೊಂಡು, “ಭೂತ!” ಎಂದು ಹೆದರಿಕೆಯಿಂದ ಕೂಗಿಕೊಂಡರು.

ಆದರೆ ಯೇಸು ಕೂಡಲೇ ಅವರೊಡನೆ, “ಧೈರ್ಯವಾಗಿರಿ! ನಾನೇ; ಹೆದರಬೇಡಿರಿ,” ಎಂದರು.

ಅದಕ್ಕೆ ಪೇತ್ರನು, “ಪ್ರಭುವೇ, ನೀವೇ ಆಗಿದ್ದರೆ, ನೀರಿನ ಮೇಲೆ ನಡೆದು ನಿಮ್ಮ ಬಳಿಗೆ ಬರುವಂತೆ ನನಗೆ ಅಪ್ಪಣೆಕೊಡಿ,” ಎಂದನು.

ಅದಕ್ಕೆ ಅವರು, “ಬಾ,” ಎಂದರು. ಪೇತ್ರನು ದೋಣಿಯಿಂದ ಇಳಿದು ನೀರಿನ ಮೇಲೆ ನಡೆದು ಯೇಸುವಿನ ಕಡೆಗೆ ಹೋದನು.

ಆದರೆ ಬಿರುಗಾಳಿಯನ್ನು ಕಂಡು ಅವನು ಹೆದರಿದನು; ಮುಳುಗಲು ಪ್ರಾರಂಭಿಸಿ, “ಪ್ರಭುವೇ, ನನ್ನನ್ನು ರಕ್ಷಿಸಿರಿ!” ಎಂದು ಕೂಗಿದನು.

ಕೂಡಲೇ ಯೇಸು ಕೈಚಾಚಿ ಅವನನ್ನು ಹಿಡಿದು, “ಅಲ್ಪವಿಶ್ವಾಸಿಯೇ, ಏಕೆ ಸಂದೇಹಪಟ್ಟೆ?” ಎಂದರು.

ಅವರು ದೋಣಿಯನ್ನು ಹತ್ತಿದಾಗ ಗಾಳಿ ನಿಂತುಹೋಯಿತು. ಆಗ ದೋಣಿಯಲ್ಲಿದ್ದವರು ಅವರನ್ನು ಆರಾಧಿಸಿ, “ನಿಜವಾಗಿಯೂ ನೀವು ನಮ್ಮ ತಂದೆಯ ಪುತ್ರ,” ಎಂದರು.

ಅವರು ದಾಟಿ ಆಚೆಗೆ ಹೋಗಿ ಗೆನ್ನೇಸರೆತ್ ಎಂಬ ಪ್ರದೇಶದ ದಡಕ್ಕೆ ಬಂದರು. ಆ ಸ್ಥಳದ ಜನರು ಅವರನ್ನು ಗುರುತಿಸಿದಾಗ, ಆ ಸುತ್ತಲಿನ ಪ್ರದೇಶವೆಲ್ಲಾ ಸುದ್ದಿ ಕಳುಹಿಸಿ ರೋಗಿಗಳೆಲ್ಲರನ್ನೂ ಅವರ ಬಳಿಗೆ ತಂದರು. ಅವರ ಉಡುಪಿನ ಅಂಚನ್ನು ಮಾತ್ರ ಮುಟ್ಟಗೊಡಿಸಬೇಕೆಂದು ಅವರು ಬೇಡಿಕೊಂಡರು; ಮುಟ್ಟಿದವರೆಲ್ಲರೂ ಸ್ವಸ್ಥರಾದರು.