Mathayo 14

14 ¹Wakati huo Herode mfalme wa robo alisikia habari za Yesu. ²Akawaambia watumishi wake, "Huyu ni Yohana Mbatizaji; amefufuka kutoka kwa wafu—ndiyo maana nguvu hizi zinatenda kazi ndani yake." ³Kwa maana Herode alikuwa amemkamata Yohana, akamfunga minyororo, akamtia gerezani kwa sababu ya Herodia, mke wa Filipo nduguye, ⁴kwa sababu Yohana alikuwa akimwambia, "Si halali kwako kuwa naye." ⁵Herode alitaka kumuua, lakini aliogopa umati, kwa kuwa walimhesabu Yohana kuwa nabii. ⁶Lakini siku ya kuzaliwa kwa Herode ilipofika, binti wa Herodia alicheza mbele yao na kumpendeza Herode, ⁷hata akaahidi kwa kiapo kumpa lo lote atakaloomba. ⁸Naye, akichochewa na mama yake, akasema, "Nipe hapa kichwa cha Yohana Mbatizaji kwenye sinia."

⁹Mfalme akahuzunika, lakini kwa sababu ya viapo vyake na wageni wake wa karamu, akaamuru apewe, ¹⁰akapeleka watu, akamkata Yohana kichwa gerezani. ¹¹Kichwa chake kikaletwa kwenye sinia, kikapewa yule msichana, naye akampelekea mama yake. ¹²Kisha wanafunzi wa Yohana wakaja, wakauchukua mwili, wakauzika; wakaenda kumwambia Yesu.

Yesu Alisha Watu Elfu Tano

¹³Yesu aliposikia hayo, alijitenga kwa mashua kwenda mahali pasipo watu peke yake. Lakini umati uliposikia, walimfuata kwa miguu kutoka mijini. ¹⁴Alipofika ufuoni, aliona umati mkubwa, akawahurumia, akawaponya wagonjwa wao. ¹⁵Ilipokuwa jioni, wanafunzi wakamwendea wakisema, "Mahali hapa ni pasipo watu, na saa tayari imekwisha kwenda. Uage umati waende vijijini wakajinunulie chakula."

¹⁶Lakini Yesu akawaambia, "Hawana haja ya kuondoka. Wapeni ninyi chakula."

¹⁷Wakamwambia, "Hatuna kitu hapa ila mikate mitano na samaki wawili."

¹⁸Akasema, "Nileteeni hapa."

¹⁹Akauamuru umati uketi kwenye majani. Akaichukua ile mikate mitano na wale samaki wawili, akatazama juu mbinguni, akashukuru, akaimega mikate, akawapa wanafunzi, nao wanafunzi wakaupa umati. ²⁰Wote wakala, wakashiba, wakaokota vipande vilivyosalia, vikapata vikapu kumi na viwili vilivyojaa. ²¹Nao waliokula walikuwa wanaume wapatao 5,000, mbali na wanawake na watoto.

Yesu Atembea Juu ya Maji

²²Mara akawalazimisha wanafunzi wapande mashua na kutangulia mbele yake hadi ng'ambo, wakati yeye akiuaga umati. ²³Baada ya kuuaga umati, alipanda mlimani faraghani ili kuomba. Ilipokuwa jioni, alikuwa huko peke yake. ²⁴Wakati huo mashua ilikuwa tayari mbali na nchi kavu, ikitupwatupwa na mawimbi, kwa maana upepo ulikuwa mbisho. ²⁵Karibu saa tisa alfajiri, Yesu akawajia, akitembea juu ya bahari. ^a a v25 Kesha la nne la usiku lilikuwa kama saa tisa hadi saa kumi na mbili alfajiri—kipindi chenye giza na baridi kali zaidi kabla ya mapambazuko. ²⁶Wanafunzi walipomwona akitembea juu ya bahari, waliogopa sana, wakisema, "Ni mzimu!" Wakapiga kelele kwa hofu.

²⁷Lakini mara Yesu akasema nao: "Jipeni moyo! Ni mimi; msiogope."

²⁸Petro akamjibu, "Bwana, ikiwa ni wewe, niamuru nije kwako juu ya maji."

²⁹Akasema, "Njoo." Petro akashuka kutoka mashuani, akatembea juu ya maji, akamwendea Yesu.

³⁰Lakini alipouona upepo mkali, aliogopa, na alipoanza kuzama, akapiga kelele, "Bwana, niokoe!"

³¹Mara Yesu akanyoosha mkono wake, akamshika, akamwambia, "Wewe wa imani haba, kwa nini uliona shaka?"

³²Nao walipopanda mashuani, upepo ukatulia. ³³Ndipo wale waliokuwa mashuani wakamsujudia, wakisema, "Kweli wewe ni Mwana wa Baba yetu."

³⁴Walipokwisha kuvuka, wakafika nchi kavu huko Genesareti. ³⁵Watu wa mahali pale walipomtambua, walipeleka habari katika nchi ile yote, wakamletea wote waliokuwa wagonjwa. ³⁶Wakamsihi wapate kuugusa tu upindo wa vazi lake; nao wote walioligusa wakaponywa.