Matthew 14

14 ¹Atam chitharan rammunga Herodna Jishuwui pao chi shai. ²Ana awui raobing chili hānga, "Hi Ra̱hikme Johnna, kathiwui eina ringshokhaira; chiwui vang eina pangshap hi awuilungli ot sāda leili." ³Kaja Herodna agato Philip preiva̱ Herodiaswui vang Johnli tukkhuilaga, khalapda, phātopli sanghaowa, ⁴kaja Johnna ali, "Nana ali khangakum hi ain maningmana" da hāngkhamina. ⁵Herodna ali shaothat khavai sāna, kha yaruili ngacheehaowa, kaja athumna Johnli marān akhana da khui. ⁶Kha Herodwui kapharā zimiksho ungshung tharan, Herodiaswui nao ngalāva̱na athumwui mangāli chakoi rasāda Herodli penngasaka, ⁷chiwui vang eina ana pokachāng saikora ali mi khavai mingzaida ngashitsangmi. ⁸Ava̱va̱na thānkhami mangā eina, ana hānga, "Ra̱hikme Johnwui kui khongpheili sangda hili ili khamilu."

⁹Awunga wukhananglakhaowa, kha awui tuingashit kala ngasotnaobingwui vang eina, ana kaso sai, ¹⁰kala ana shirātda phātopli Johnwui akui rangngasaka, ¹¹Awui akui khongpheili sangda khuirai, ngalāva̱ chili mi, kala ngalāva̱na ava̱va̱li khuiungmi. ¹²Chiwui thili Johnwui sākhangatha̱bingna vāda, awui angun chi akhuilaga chifahaowa; kala athumna vāda Jishuli hānga.

Jishuna Mi Thoukai Phangā Phazāmi

¹³Hi kashā eina, Jishuna marikhong tonglaga khalatta ngachakyang kahai apam akhali vāhaowa. Kha mi kachungkhana chi shālaga keinungbingwui eina phei eina awui thi shurrai. ¹⁴Jishuna kārkashok tharan, mi kachungkha theida, athumli lumashanlakhaoda, athumwui kakazānaobing raimi. ¹⁵Kazing khaying eina, sākhangatha̱bingna ali hānga, "Hi mi makapāna apamna, kala kazingla yingura. Chithākha athumna keinungbingli vāda kachichāwui kashakazā alozā khavai, yaruili chihovāhaolu."

¹⁶Kha Jishuna athumli hānga, "Athum zatthui khavai khikha maleimana. Nathumna athumli zākhavai milu."

¹⁷Athumna ali hānga, "Hili ithumwui pāngli khamui phangā kala khai khani māng leili."

¹⁸Ana hānga, "Chi iwuili hili khuirālu."

¹⁹Ana yaruili khawotungli pamzang khavai kasoi. Khai khani kala khamui phangā chi kalāplaga, kazingram yangkāda ningkashi seihā sai, kala khamui chi serkhailaga sākhangatha̱bingli mi, chieina athumna yaruili yaowa. ²⁰Athum saikorana shai kala ningyāng unglakhaowa, kala athumna shaineng luk tharāda khani pemda kazipkhui. ²¹Sha̱nao kala naoshinao chi mazangla, kazā mibing chi mi thing phangā shakhana.

Jishuna Tara̱tungli Zata

²²Ana yaruili shiunmahungda leilakha, hengsāda sākhangatha̱bingli marikhongli kātonglaga ali marida lākhavākli lāk ngasakhaowa. ²³Yaruili shiunhaiwui thili, ana seihā sākhavai amāng kaphungli kai. Kazing khaying eina, ana chili amāng pama. ²⁴Marikhong chi ara ngalei kathengwui eina lam katāva̱ tai, tara̱ khangaphaona ngaphumhaida, kaja masi chi athumli phanhaoka. ²⁵Ngaya pung khamate shakhanali, ana ngayitung kachengda zatlaga athumwuili raihaowa. ^a a v25 Ngayāwui khamung mati chi arui pung 3 eina 6 tāshung shakhana — zimiksho marāng eina tangdawui tangkhamang kala khazik kameimeiwui atamna. ²⁶Ana ngayitungli kazat chi sākhangatha̱bingna theilaga ngacheenāhaida, "Kameona!" da hānga, kala ngachee eina vaotaraiya.

²⁷Kha Jishuna hengsāda athumli hānga, "Malung pingmeilu! Ilaka; mangacheealu."

²⁸Peterna ali ngahānkai, "Proho, nana jiakha, ili tara̱tungli nawuili rākhavai kasoilu."

²⁹Ana hānga, "Rālu." Peterna marikhong eina tunglaga, tara̱tungli zatta Jishuwuishong vai.

³⁰Kha siphan zingrot chi theilaga, ana ngacheehaowa, kala tāzang haokaphok eina, ana vaoda hānga, "Proho, ili kanmilu!"

³¹Jishuna hengsāda pāng khangkāda ali singkhuilaga hānga, "Na shitkasang teokhava, khisāda ningmaonghaikhala?"

³²Chieina anina marikhong kātong tharan, masi chi khāmhaowa. ³³Chieina marikhongli khaleibingna ali khorumda hānga, "Kachangkhat na ithumwui Avāwui Naomayarana."

³⁴Chieina athumna ngayi chi kānkāda, Gennesaret ngaleili vashoka. ³⁵Apam chiwui mibingna ali theihai tharan, ngalei chiwui apam saikorali pao chihovāda kakazānaobing saikora awuili khuirai. ³⁶Athumna awui kachonmareili tangda saza̱khui khavai eina poi, kala kachonmarei saza̱khuibing mi saikorana kharai samphanga.