ሞት መጥምቕ ዮሃንስ

ሄሮድስ ብመሓላ ጋይላ ተታሊሉ፥ ንዮሃንስ ርእሱ ኣቚረፆ። ኢየሱስ ክሓዝን ገለሰ፥ እቲ ህዝቢ ግና ኸም ብሓዱሽ ተኸተሎ፥ ካብ ሓሙሽተ እንጀራ ድማ መገቦም። ድሒሩ ጴጥሮስ ኣብ ልዕሊ ማይ ናብኡ ወፀ፥ ነቲ ንፋስ ምስ ረአየ ኸዓ ኺጥሕል ጀመረ።

ምዕራፍ 14።

በቲ ጊዜ እቱይ ሄሮድስ ናይ ርብዒ ግዝኣት ኣመሓዳሪ፥ ብዛዕባ ኢየሱስ ዝዝረብ ዝነበረ ወረ ሰምዐ። ንሓሻኽሩ ድማ ከምዙይ በሎም፦ “እዙይ መጥምቕ ዮሃንስ እዩ፤ ካብ ምዉታት ተንሲኡ እዩ፤ ስለዙይ እዮም እዞም ሓይልታት እዚኦም ኣብኡ ዝሰርሑ ዘለዉ።” ሄሮድስ ምእንቲ ሄሮድያዳ ሰበይቲ ሓዉ ፊልጶስ፥ ንዮሃንስ ሒዙ ኣሲሩ ናብ ቤት ማእሰርቲ ዳጐኖ፤ ዮሃንስ “ንኣኣ ክትወስዳ ኣይፍቀደልካን እዩ” ይብሎ ነበረ እሞ። ሄሮድስ ክቐትሎ ደለየ፤ ነቲ ህዝቢ ግና ፈርሐ፤ ንሳቶም ንዮሃንስ ከም ነቢይ ይርእይዎ ነበሩ እሞ። መዓልቲ ልደት ሄሮድስ ምስ በፅሐት ግና፥ ጓል ሄሮድያዳ ኣብ ቅድሚኦም ሰዓሰዐት፤ ንሄሮድስ ድማ ደስ ኣበሎ፤ ስለዙይ እቲ ዝለመነቶ ዅሉ ክህባ ብመሓላ ተመባፅዐ። ብኣዲኣ ተለዓዒላ ኸዓ “ርእሲ መጥምቕ ዮሃንስ ኣብ ሸሓነ ገይርካ ኣብዙይ ሃበኒ” በለት።

እቲ ንጉስ ድማ ሓዘነ፤ ብሰሪ መሓላታቱን ብሰሪ እቶም ምስኡ ተቐሚጦም ዝነበሩ ዕዱማቱን ግና፥ ክወሃባ ኣዘዘ፤ ልኢኹ ድማ ንዮሃንስ ኣብ ቤት ማእሰርቲ ርእሱ ኣቚረፆ። ርእሱ ኸዓ ኣብ ሸሓነ ተምፂኡ ነታ ጓል ተውሃባ፤ ንሳ ድማ ናብ ኣዲኣ ኣምፅአቶ። ሽዑ ደቀ መዛሙርቲ ዮሃንስ መፂኦም፥ ነቲ ሬሳ ወሲዶም ቀበርዎ፤ ከይዶም ድማ ንኢየሱስ ነገርዎ።

ኢየሱስ ንሓሙሽተ ሽሕ ሰብ መገቦም

ኢየሱስ እዙይ ምስ ሰምዐ፥ ብጃልባ ናብ ሓደ ምድረ በዳ በይኑ ገለሰ። እቶም ህዝቢ ግና ሰሚዖም፥ ካብ ከተማታት ብእግሮም ተኸተልዎ። ናብ ምድሪ ምስ ወፀ ኸዓ፥ ብዙሕ ህዝቢ ረአየ፤ ራህርሀሎም ድማ፤ ነቶም ሕሙማቶም ከዓ ኣሕወዮም። ምድሪ ምስ መሰየ ኸዓ፥ እቶም ደቀ መዛሙርቱ ናብኡ መፂኦም “እዝ ቦታ እዙይ ምድረ በዳ እዩ፤ ጊዜ ኸዓ ድሮ ኣኺሉ እዩ፤ እቶም ህዝቢ ናብ ዓድታት ከይዶም ንባዕሎም ምግቢ ክዕድጉ ኣሰናብቶም” በልዎ።

ኢየሱስ ግና “ክኸዱ ኣየድልዮምን እዩ፤ ንስኻትኩም ምግቢ ሃብዎም” በሎም።

ንሳቶም ድማ “ኣብዙይ ብዘይ ሓሙሽተ እንጀራን ክልተ ዓሳን፥ ካልእ የብልናን” በልዎ።

ንሱ ኸዓ “ናባይ ናብዙይ ኣምፅእዎም” በለ።

ነቶም ህዝቢ ድማ ኣብ ሳዕሪ ኽቕመጡ ኣዘዞም። ነቲ ሓሙሽተ እንጀራን ክልተ ዓሳን ኣልዒሉ ድማ፥ ናብ ሰማይ ጠሚቱ ኣመስገነ፤ ነቲ እንጀራ ቈሪሱ ኸዓ ንደቀ መዛሙርቱ ሃቦም፤ እቶም ደቀ መዛሙርቲ ድማ ነቶም ህዝቢ ሃብዎም። ኵሎም ድማ በሊዖም ፀገቡ፤ ካብቲ ዝተረፈ ርፍራፍ ድማ ዓሰርተ ኽልተ መሶብ መሊኦም ኣልዓሉ። እቶም ዝበልዑ ድማ፥ ብዘይ ኣንስትን ህፃናትን፥ ኣስታት ሓሙሽተ ሽሕ ሰብኡት ነበሩ።

ኢየሱስ ኣብ ልዕሊ ባሕሪ ተመላለሰ

ሽዑ ንሽዑ ኸዓ ንሱ ነቶም ህዝቢ ከሰናብት እንተሎ፥ ነቶም ደቀ መዛሙርቱ ናብ ጃልባ ኣእትዩ፥ ቅድሚኡ ናብ ማዕዶ ክኸዱ ኣገደዶም። ነቶም ህዝቢ ኣሰናቢቱ ድማ፥ ክፅሊ ንበይኑ ናብ እምባ ደየበ። ምድሪ ምስ መሰየ ኸዓ፥ ኣብኡ በይኑ ነበረ። እታ ጃልባ ድማ ድሮ ኻብ ምድሪ ርሒቓ፥ ንፋስ ይፃረሮም ስለ ዝነበረ፥ ብማዕበል ትህረም ነበረት። ኣስታት ትሽዓተ ሰዓት ናይ ለይቲ ኸዓ፥ ኣብ ልዕሊ ባሕሪ እናኸደ ናብኣቶም መፀ። ^a እቶም ደቀ መዛሙርቲ ኸዓ ኣብ ልዕሊ ባሕሪ እናኸደ ምስ ረአይዎ፥ ተሸበሩ፤ “ህጅ እዩ!” እናበሉ ድማ ብፍርሒ ኣእወዩ።

ኢየሱስ ግና ሽዑ ንሽዑ “ኣጆኹም! ኣነ እየ፤ ኣይትፍርሑ” በሎም።

ጴጥሮስ ድማ “ኦ ጐይታ! ንስኻ እንተ ዄንካ፥ ኣብ ልዕሊ ማይ ናባኻ ክመፅእ ኣዝዘኒ” ኢሉ መለሰሉ።

ንሱ ኸዓ “ናዓ” በሎ። ጴጥሮስ ድማ ካብ ጃልባ ወሪዱ፥ ኣብ ልዕሊ ማይ እናኸደ ናብ ኢየሱስ ከደ።

ነቲ ብርቱዕ ንፋስ ምስ ረአየ ግና ፈርሐ፤ ክሰጥም ምስ ጀመረ ኸዓ “ኦ ጐይታ! ኣድሕነኒ” ኢሉ ኣእወየ።

ኢየሱስ ድማ ሽዑ ንሽዑ ኢዱ ዘርጊሑ ሓዞ፤ “ኣታ ውሑድ እምነት ዘለካ፥ ስለምንታይ ተጠራጠርካ?” ኢሉ ድማ በሎ።

ናብ ጃልባ ምስ ደየቡ ድማ፥ እቲ ንፋስ ዝግ በለ። ሽዑ እቶም ኣብ ጃልባ ዝነበሩ ሰገዱሉ፤ “ብሓቂ ንስኻ ወዲ ኣቦና ኢኻ” ድማ በሉ።

ተሳጊሮም ድማ፥ ናብ ምድሪ ጌንሴሬጥ መፁ። እቶም ናይቲ ቦታ እቱይ ሰባት ከዓ ምስ ኣለልይዎ፥ ናብ ኵሉ እቲ ኸባቢ እቱይ ልኢኾም፥ ንዅሎም እቶም ሕሙማት ናብኡ ኣምፅኡ። ጫፍ ክዳኑ ጥራሕ ክትንክፉ ድማ ለመንዎ፤ እቶም ዝተንከፉ ዅሎም ከዓ ሓወዩ።