ማቴዎስ 14

14 ¹በዚያን ጊዜ የአውራጃው ገዥ ሄሮድስ ስለ ኢየሱስ የተነገረውን ወሬ ሰማ። ²አገልጋዮቹንም፣ “ይህ ከሙታን የተነሣው መጥምቁ ዮሐንስ ነው፤ ስለዚህ እነዚህ ኀይላት በእርሱ ይሠራሉ” አላቸው። ³ሄሮድስ የወንድሙ የፊልጶስ ሚስት ስለ ነበረችው ስለ ሄሮድያዳ ዮሐንስን አስይዞ አስሮ በወኅኒ ዘግቶት ነበርና፤ ⁴ዮሐንስ፣ “እርሷን ለአንተ ማግባት አይገባህም” ይለው ነበርና። ⁵ሄሮድስም ሊገድለው ፈልጎ ነበር፤ ነገር ግን ሕዝቡ ዮሐንስን እንደ ነቢይ ይቈጥሩት ስለ ነበር ፈራቸው። ⁶ነገር ግን የሄሮድስ የልደት በዓል በደረሰ ጊዜ የሄሮድያዳ ልጅ በመካከላቸው ዘፈነች፤ ሄሮድስንም ደስ አሰኘችው። ⁷ስለዚህ የለመነችውን ሁሉ ሊሰጣት በመሐላ ቃል ገባላት። ⁸በእናቷ ተመክራ፣ “የመጥምቁ ዮሐንስን ራስ በዚህ፣ በወጭት አምጥተህ ስጠኝ” አለች።

⁹ንጉሡም አዘነ፤ ነገር ግን ስለ መሐላውና በማእድ አብረውት ስለ ተቀመጡት እንዲሰጣት አዘዘ፤ ¹⁰ልኮም ዮሐንስን በወኅኒ ውስጥ አንገቱን አስቈረጠ። ¹¹ራሱም በወጭት መጥቶ ለብላቴናዪቱ ተሰጠ፤ እርሷም ወደ እናቷ ወሰደችው። ¹²ከዚያም የዮሐንስ ደቀ መዛሙርት መጥተው ሬሳውን ወስደው ቀበሩት፤ ሄደውም ለኢየሱስ ነገሩት።

ኢየሱስ አምስት ሺህ ሰዎችን መገበ

¹³ኢየሱስም ይህን በሰማ ጊዜ ለብቻው በታንኳ ወደ ገለልተኛ ስፍራ ፈቀቅ አለ። ሕዝቡ ግን ሰምተው ከከተሞች በእግራቸው ተከተሉት። ¹⁴ከታንኳውም በወጣ ጊዜ ብዙ ሕዝብ አየ፤ አዘነላቸውም፤ ድውዮቻቸውንም ፈወሰ። ¹⁵በመሸም ጊዜ ደቀ መዛሙርቱ ወደ እርሱ ቀርበው፣ “ይህ ገለልተኛ ስፍራ ነው፤ ጊዜውም አሁን አልፏል። ሕዝቡ ወደ መንደሮች ሄደው ለራሳቸው ምግብ እንዲገዙ አሰናብታቸው” አሉት።

¹⁶ኢየሱስ ግን፣ “መሄድ አያስፈልጋቸውም፤ እናንተ ስጧቸው” አላቸው።

¹⁷እነርሱም፣ “በዚህ ከአምስት እንጀራና ከሁለት ዓሣ በቀር ምንም የለንም” አሉት።

¹⁸እርሱም፣ “ወደዚህ ወደ እኔ አምጡልኝ” አለ።

¹⁹ሕዝቡም በሣሩ ላይ እንዲቀመጡ አዘዘ። አምስቱን እንጀራና ሁለቱን ዓሣ ይዞ ወደ ሰማይ አሻቅቦ አየ፤ አመስግኖም እንጀራውን ቈርሶ ለደቀ መዛሙርቱ ሰጠ፤ ደቀ መዛሙርቱም ለሕዝቡ ሰጡ። ²⁰ሁሉም በልተው ጠገቡ፤ ከተረፈውም ቍርስራሽ ዐሥራ ሁለት ሙሉ መሶብ አነሡ። ²¹የበሉትም ከሴቶችና ከልጆች በቀር አምስት ሺህ ያህል ወንዶች ነበሩ።

ኢየሱስ በውሃ ላይ ተራመደ

²²ወዲያውም ሕዝቡን እስኪያሰናብት ድረስ ደቀ መዛሙርቱ በታንኳ ገብተው ቀድመውት ወደ ማዶ እንዲሻገሩ አደረጋቸው። ²³ሕዝቡንም ካሰናበተ በኋላ ሊጸልይ ለብቻው ወደ ተራራ ወጣ። በመሸም ጊዜ በዚያ ብቻውን ነበር። ²⁴ታንኳዪቱም ያን ጊዜ ከየብስ ርቃ ነበር፤ ነፋሱ ከፊት ለፊታቸው ስለ ነበር በማዕበል ትናወጥ ነበር። ²⁵ከሌሊቱም ዘጠኝ ሰዓት ገደማ በባሕር ላይ እየተራመደ ወደ እነርሱ መጣ። ^a a v25 የሌሊቱ አራተኛው ክፍለ ጊዜ ከሌሊቱ ዘጠኝ ሰዓት እስከ ንጋቱ ዐሥራ ሁለት ሰዓት ገደማ ነበር፤ ከጎሕ በፊት እጅግ የጨለመውና የቀዘቀዘው ጊዜ ነው። ²⁶ደቀ መዛሙርቱም በባሕር ላይ ሲራመድ ባዩት ጊዜ፣ “ምትሀት ነው!” ብለው እጅግ ደንግጠው ከፍርሃታቸው የተነሣ ጮኹ።

²⁷ኢየሱስ ግን ወዲያው፣ “አይዟችሁ! እኔ ነኝ፤ አትፍሩ” ብሎ ተናገራቸው።

²⁸ጴጥሮስም መልሶ፣ “ጌታ ሆይ፤ አንተ ከሆንህ በውሃ ላይ ወደ አንተ እንድመጣ እዘዘኝ” አለው።

²⁹እርሱም፣ “ና” አለው። ጴጥሮስም ከታንኳው ወርዶ በውሃ ላይ ተራምዶ ወደ ኢየሱስ ሄደ።

³⁰ነገር ግን ኀይለኛውን ነፋስ ባየ ጊዜ ፈራ፤ መስጠምም በጀመረ ጊዜ፣ “ጌታ ሆይ፤ አድነኝ!” ብሎ ጮኸ።

³¹ኢየሱስም ወዲያው እጁን ዘርግቶ ያዘው፤ “አንተ እምነት የጐደለህ፤ ለምን ተጠራጠርህ?” አለው።

³²ወደ ታንኳውም በገቡ ጊዜ ነፋሱ ጸጥ አለ። ³³በታንኳው የነበሩትም፣ “በእውነት አንተ የአባታችን ልጅ ነህ” ብለው ሰገዱለት።

³⁴ተሻግረውም ወደ ጌንሴሬጥ ምድር ደረሱ። ³⁵የዚያ ስፍራ ሰዎችም ባወቁት ጊዜ ወደ አካባቢው ሁሉ ልከው ድውዮችን ሁሉ ወደ እርሱ አመጡ። ³⁶የልብሱንም ጫፍ ብቻ እንዲዳስሱ ለመኑት፤ የዳሰሱትም ሁሉ ዳኑ።