Chaang khatle Pa om Chong
Jisu na Pharisee rwan khou, nani om chaang gana ani Pa om zathang ding bazei sat rwe diga rinne, khatle mi ding to tanaatnu pot ga amun bina makka sung bina swake diga rinne. Canaan rwan mei khatna ran sat lang lou makka, Bakhou katak rwe, atiga ri kasianuna rai basiatnu basa kamaisa ding sa thang rwe.
15 1Habei ga Pharisee rwan le chongtan bachuthangnu rwan Jerusalem bina Jisu kim bi hungluga rinne, 2“Pa-aam briakpina Naom potroi rwan gana patso rwan om chaang ding bathan sat ongnubo? Banina sa in lang kaan bi bani kut kasin make.”
3Maanna katake, “Pa-aam toga nani le nani om chaang langna ani Pa om zathang ding bazei makpo? 4Balangbe ani Pa na rinne, ‘Napa nanu ding takung tazeiyo,’ khatle, ‘Tudannu bapa banu ding rin basiatnu maan ga batak sekka to that ting gaye.’ 5Atiyeda nanina rinne, ‘Tudannu bapa mak tabe banu khou, “Nangna ei bina paannu khatchale ga ani Pa lang kat thangnu leithwan gaye,” 6maan gana haga langna bapa ding takung lang bathaang maake.’ Nanina nani om chaang lang chungna ani Pa om chong ding bathaang maak thang rwe. 7Nani sathot tonu nun ga! Isaiah na nani lang bi bazega rin basaam thang ngaake, maanna rinne: 8‘Heiba mi nunna bani mun zana Ating takhwang towe, Atiyeda bani sung ba Akhouna namlaaga amme; 9Banina Ating baha bi kalumme, mi nun om zathang ding bachu thangga zekrin danga.’”
10Habei ga Maanna mi khang ding Bakim bi kouluga rinne, “Ngaisuluga louthei ngo: 11Amun bi khutnu pot gana mi ding to tanaatnu make; atiyeda amun bina swaknu pot gana mi ding to tanaatnuwe.”
12Habei ga potroi rwanna Bakim bi hungluga rinne, “Pharisee rwanna hei chong ngaisunu kaan bi ket basui rwe dinu Nangna theibo?”
13Maanna katake, “Tambaan la ongnu Apa na khut maknu thingkung khatchale ga bakamong phokluga zwan sat thanglune. 14Bani ding bathan sat tammo; bani mik chonu lampui kainu nunne. Mik chonuna mik chonu ding lampui kai thang nge dabe, barwei pat ni khun bi ta thanglune.”
15Peter na Bakhou rinne, “Hei chongchat ding ani khou rin chui thang ngo.”
16Jisu na rinne, “Nani le han mi katei nun danga louthei makpo?” 17“Amun bi khut tamnu pot bing ga bon bi ta thangluga haba nung bi langkaang la swak lat tamme dinu nani thei makpo? 18Atiyeda amun bina swak latnu gana lungning bina hungnuwe, atiga haga mi ding to tanaatnuwe. 19Balangbe sung lana sa maknu thou bing hungnuwe: mi athatnu, rwan mei rwan basan laannu, mikin tonu, lungmaannu, chong baze maknu sake pinu, mi rin basiatnu. 20Hei bing gana mi ding to tanaatnuwe, atiyeda kut kasin makka sa innu gana mi khatchale to tanaatnu make.”
Mannu khat om Khaang Theinu Balumsat
21Jisu na haba riak bathan satluga Tyre le Sidon taram la se pen drwe. 22Haba taram bi amnu Canaan mannu khat hungluga, paonu nung rinne, “Pukraangba, David Sa Kapaisa, Ating pi phaangkriang theiyo! Asa reizuni ri kasiana taswang khak pi riangre damme.”
23Maanna bakhou khatchale katak make. Baom potroi rwan hungluga Bakhou hwei ngaake, “Mannu ding bathan thang dro; balangbe maan ani nung suiga pao ongnuwe.”
24Maanna katake, “Ei Israel in om zao baraannu nun lang mu Ating lang hung thang dam ngaake.”
25Atiyeda mannu hungluga Bapam bi khut bokluga rinne, “Pukraangba, Ating badam towo!”
26Maanna katake, “Naosen rwan om uilu ga louluga ui nun lang bazwan thangnu sa make.”
27Mannu na rinne, “Baze, Pukraangba, atiyeda ui nunna le bani bapu rwan om table bina kadaak tanu kachungsa ga sa dabo.”
28Jisu na katake, “Mannu, nang om balumsat ga tak rwe. Nangna nwamnu danga nang lang to ding ngo.” Atiga haba kahan khatna basa reizuni ga pi sa thang rwe.
Pa na Mi Raching Bali ding Pi Sa Thangnu
29Jisu na habei gana se tamluga Galilee tuipui lamsek pi seluga chaang la kaluga habei ga badung ngaake. 30Mi khang khakna ket thoknu, mik chonu, kut ket lwamnu, chong swak maknu khatle katei tam ting kalwangluga Bakim bi hung rwe, atiga bani ding Baket pam bi bang thang rwe, atiga Maanna bani ding pi sa thang rwe. 31Atibriakpina mi khang gana chong swak maknu ga chong kabianu, kut ket lwamnu ga pi sa thangnu, ket thoknu ga senu khatle mik chonu ga munu, hei bing munu kaan bi loh lo rwe; atiga banina Israel om Pa ding lwat liannu pi rwe.
32Jisu na Baom potroi rwan ding Bakim bi kouluga rinne, “Ei heiba mi khang ding nga kriang nge, balangbe bani Ei le ong bachamnu ni thum rwe khatle bani sa lang khatchale maak rwe. Eina bani ding chaamga bathan thang lang nwam make; bani lampui bi tathiat ponnu le zaye.”
33Potroi rwanna ngai ngaake, “Heipai ramkaang riak biya hei danga mi khang ding pi sa imbanu uilu tatoga dou ngam ding gabo?”
34Jisu na bani khou ngai ngaake, “Nani lang uilu inza ambo?” Banina rinne, “Siari, khatle ngaa katisen kasem.”
35Atiga Maanna mi khang ding ram chung la dung lang rin rwe. 36Atiga Maanna uilu siari khatle ngaa ding louluga, chakrin katluga, kasem toluga, potroi rwan lang pi thang rwe, atiga banina mi khang lang pi thang rwe. 37Bani khangsung saluga imba rwe, khatle banina baleinu katup ka luklei pui siari sipka khom thou ngaake. 38Haga sa damnu mi nun ga kamaisa le naosen rwan ding pa makka kapaisa mi raching bali ngaake. 39Mi khang ding bathan thangnu kaan bi, Maan li bi hwanluga Magadan taram la se rwe.