አስቴር 2

2 ¹ከጊዜ በኋላ የንጉሥ ጠረክሲስ ቍጣ በበረደ ጊዜ፣ ዋሽቲን፣ ያደረገችውንና በእርሷ ላይ የተወሰነባትን አሰበ። ²የንጉሡም አሽከሮች እንዲህ አሉ፤ “ለንጉሡ ውብ ወጣት ደናግል ይፈለጉለት። ³ንጉሡ በመንግሥቱ አውራጃ ሁሉ ሹማምት ይሹም፤ እነርሱም ውብ ወጣት ደናግልን ሁሉ ወደ ሱሳ ግንብ፣ ሴቶችን ወደሚጠብቀው ወደ ንጉሡ ጃንደረባ ወደ ሄጌ ሐረም ይሰብስቡ፤ የውበት እንክብካቤም ይሰጣቸው። ⁴ንጉሡን ደስ የምታሰኘው ወጣት ሴት በዋሽቲ ፈንታ ትንገሥ።” ይህም ንጉሡን ደስ አሰኘው፤ እንዲሁም አደረገ።

⁵በሱሳ ግንብ ውስጥ መርዶክዮስ የተባለ አንድ አይሁዳዊ ይኖር ነበር፤ እርሱም የብንያም ነገድ የሆነ የቂስ ልጅ የሳሚ ልጅ የኢያዕር ልጅ ነበር፣ ⁶የባቢሎን ንጉሥ ናቡከደነፆር ማርኮ ከወሰዳቸው፣ ከይሁዳ ንጉሥ ከኢኮንያ ጋር ተማርከው ከተወሰዱት ምርኮኞች መካከል ከኢየሩሳሌም ተማርኮ የተወሰደ ነበር። ⁷እርሱም አባትና እናት የሌላትን የአጎቱን ልጅ ሀዳሳን፣ ማለትም አስቴርን ያሳድግ ነበር። ወጣቲቱም ቅርጿ ያማረ ለማየትም ደስ የሚያሰኝ ነበረች፤ አባቷና እናቷ በሞቱ ጊዜ መርዶክዮስ እንደ ገዛ ልጁ አድርጎ ወሰዳት።

⁸የንጉሡ ትእዛዝና አዋጅ በተሰማ ጊዜ፣ ብዙ ወጣት ሴቶችም በሄጌ እጅ ሥር ወደ ሱሳ ግንብ በተሰበሰቡ ጊዜ፣ አስቴርም ሴቶችን ወደሚጠብቀው ወደ ሄጌ እጅ ሥር ወደ ንጉሡ ቤተ መንግሥት ተወሰደች። ⁹ወጣቲቱም ደስ አሰኘችው፤ በፊቱም ሞገስ አገኘች፤ ስለዚህ ፈጥኖ የውበት እንክብካቤዋንና ድርሻ ምግቧን፣ ከንጉሡ ቤተ መንግሥት የተመረጡ ሰባት ወጣት ሴቶችንም ሰጣት፤ እርሷንና አገልጋዮቿንም ወደ ሐረም ምርጥ ስፍራ አዛወራት። ¹⁰መርዶክዮስ እንዳትገልጥ ነግሯት ስለ ነበር፣ አስቴር ወገኗንም ሆነ ዘመዷን አልገለጠችም ነበር። ¹¹መርዶክዮስም አስቴር እንዴት እንዳለችና ምን እንደ ደረሰባት ለማወቅ፣ በየዕለቱ በሐረሙ አደባባይ ፊት ለፊት ወዲያና ወዲህ ይመላለስ ነበር።

¹²እያንዳንዷ ወጣት ሴት ወደ ንጉሥ ጠረክሲስ የምትገባበት ተራ የሚደርሰው፣ አሥራ ሁለት ወር የሚፈጀውን የተደነገገ የውበት እንክብካቤ ከጨረሰች በኋላ ነበር፤ ስድስት ወር በከርቤ ዘይት፣ ስድስት ወር ደግሞ በሽቱና በመዋቢያ። ¹³እያንዳንዷ ወጣት ሴት ወደ ንጉሡ የምትገባው እንዲህ ነበር፤ ከሐረሙ ወደ ንጉሡ ቤተ መንግሥት ይዛ እንድትገባ የጠየቀችው ሁሉ ይሰጣት ነበር። ¹⁴ማታ ትገባለች፤ ጠዋት ቁባቶችን ወደሚጠብቀው ወደ ንጉሡ ጃንደረባ ወደ ሳሻጋዝ ወደ ሁለተኛው ሐረም ትመለስ ነበር። ንጉሡ ካልወደዳትና በስሟ ጠርቶ ካልጠራት በቀር ወደ እርሱ አትመለስም ነበር።

¹⁵መርዶክዮስ የገዛ ልጁ አድርጎ ያሳደጋት፣ የአጎቱ የአቢካኢል ልጅ የአስቴር ተራ ወደ ንጉሡ ለመግባት በደረሰ ጊዜ፣ ሴቶችን የሚጠብቀው የንጉሡ ጃንደረባ ሄጌ ከመከራት በቀር ሌላ ምንም አልጠየቀችም። አስቴርም ባዩዋት ሁሉ ዘንድ ሞገስ አገኘች።

¹⁶አስቴርም በነገሠ በሰባተኛው ዓመት በአሥረኛው ወር፣ በጤቤት ወር፣ ወደ ንጉሥ ጠረክሲስ ወደ ቤተ መንግሥቱ ተወሰደች። ^a a v16 ጤቤት በዕብራውያን ዘመን አቈጣጠር አሥረኛው ወር ሲሆን፣ በግምት ከታኅሣሥ እስከ ጥር ያለው ነው።

¹⁷ንጉሡም ከሴቶች ሁሉ ይልቅ አስቴርን ወደደ፤ እርሷም ከደናግል ሁሉ ይልቅ በፊቱ ሞገስንና ተቀባይነትን አገኘች። ስለዚህ የንግሥና ዘውዱን በራሷ ላይ አደረገ፤ በዋሽቲም ፈንታ አነገሣት።

¹⁸ንጉሡም ለሹማምቱና ለአገልጋዮቹ ሁሉ ታላቅ ግብዣ አደረገ፤ ይኸውም የአስቴር ግብዣ ነበር። በአውራጃዎችም ዕረፍት አወጀ፤ በንጉሣዊ ልግስናም ስጦታ ሰጠ።

¹⁹ደናግሉም ለሁለተኛ ጊዜ በተሰበሰቡ ጊዜ፣ መርዶክዮስ በንጉሡ በር ተቀምጦ ነበር። ²⁰አስቴርም መርዶክዮስ እንዳዘዛት ወገኗንም ሆነ ዘመዷን አልገለጠችም ነበር፤ ባሳደጋት ጊዜ እንደ ነበረ ሁሉ ትታዘዘው ነበር።

መርዶክዮስ በንጉሡ ላይ የተሸረበን ሴራ ገለጠ

²¹በዚያ ዘመን መርዶክዮስ በንጉሡ በር ተቀምጦ ሳለ፣ ደጃፉን የሚጠብቁ ሁለት የንጉሡ ጃንደረቦች ቢግታንና ተራሽ ተቈጥተው ንጉሥ ጠረክሲስን ለመግደል አደሙ። ²²መርዶክዮስ ግን ሴራውን አወቀ፤ ለንግሥቲቱም ለአስቴር ነገራት፤ እርሷም በመርዶክዮስ ስም ለንጉሡ አመለከተች። ²³ነገሩም ተመርምሮ እውነት ሆኖ ተገኘ፤ ሁለቱም ሰዎች በእንጨት ላይ ተሰቀሉ። ይህም በንጉሡ ፊት በዜና መዋዕል መጽሐፍ ተመዘገበ።