Ana Neman Sabuwar Sarauniya

Da Bashti ta tafi, aka tattara 'yan mata zuwa gidan matan sarki bisa doka. Mordekai, wanda ya rene 'yar kawunsa marainiya Esta, ya ce mata ta ɓoye cewa ita Bayahudiya ce. Ta sami kambi, kuma aka rubuta labarinsa game da ƙulla kisan sarki a littafin tarihin sarauta.

Babi na 2.

Bayan haka, sa'ad da fushin Sarki Zerzes ya huce, sai ya tuna da Bashti, da abin da ta yi, da kuma hukuncin da aka yanke mata. Sai masu yi wa sarki hidima suka ce, “A nemo wa sarki budurwai kyawawa masu ƙuruciya. Sarki yă naɗa shugabanni a kowace lardi ta mulkinsa, domin su tattara kowace budurwa kyakkyawa zuwa katangar birnin Shusha, cikin gidan mata a ƙarƙashin Hegai, bābān sarki mai tsaron mata, su kuma yi musu shirye-shiryen kwalliya. Budurwar da ta gamshi sarki, ita ce tă zama sarauniya a maimakon Bashti.” Wannan ya gamshi sarki, sai ya yi haka.

A katangar birnin Shusha, akwai wani Bayahude mai suna Mordekai, ɗan Yayir, ɗan Shimeyi, ɗan Kish, daga kabilar Benyamin, wanda aka kwaso shi daga Urushalima tare da kamammun da aka kwaso tare da Yekoniya sarkin Yahuda, wanda Nebukadnezzar sarkin Babila ya kwashe zuwa bauta. Yana renon Hadassa, wato Esta, 'yar baffansa, wadda ba ta da uba ko uwa. Budurwar kuwa kyakkyawa ce da kyakkyawar siffa; sa'ad da mahaifinta da mahaifiyarta suka mutu, sai Mordekai ya ɗauke ta a matsayin 'yarsa.

Sa'ad da aka ji umarnin sarki da dokarsa, aka kuma tara budurwai da yawa zuwa katangar birnin Shusha a ƙarƙashin kulawar Hegai, sai aka kai Esta ita ma fadar sarki, a ƙarƙashin kulawar Hegai, mai tsaron mata. Budurwar ta gamshe shi, ta kuma sami tagomashi a wurinsa, saboda haka ya yi maza ya yi mata shirye-shiryen kwalliya da rabon abinci, ya kuma ba ta zaɓaɓɓun 'yan mata bakwai daga fadar sarki, ya kuma mayar da ita da kuyanginta zuwa wuri mafi kyau na gidan mata. Esta ba ta bayyana mutanenta ko danginta ba, domin Mordekai ya umarce ta kada tă yi haka. Kowace rana Mordekai yakan yi kai da kawowa a gaban filin gidan mata, domin yă san yadda Esta take da kuma abin da yake faruwa da ita.

Lokacin kowace budurwa na shiga wurin Sarki Zerzes yakan zo bayan watanni goma sha biyu na shirye-shiryen kwalliya da ake buƙata: wata shida da man mur, wata shida kuma da turare da kayan shafe-shafe. Ga yadda kowace budurwa take shiga wurin sarki: duk abin da ta nema, ana ba ta shi domin tă tafi da shi daga gidan mata zuwa fadar sarki. Takan shiga da yamma, da safe kuma takan koma gidan mata na biyu a ƙarƙashin Shashgaz, bābān sarki mai tsaron ƙwarƙwarai. Ba za tă sāke komawa wurin sarki ba sai in ya ji daɗinta, ya kuma kira ta da suna.

Sa'ad da lokacin Esta ya yi na shiga wurin sarki—ita 'yar Abihayil, baffan Mordekai, wanda ya ɗauke ta a matsayin 'yarsa—ba tă nemi kome ba sai abin da Hegai, bābān sarki mai tsaron mata, ya shawarce ta. Esta kuwa ta sami tagomashi a wurin duk wanda ya gan ta.

Aka kai Esta wurin Sarki Zerzes a fadarsa ta sarauta, a wata na goma, wato watan Tebet, a shekara ta bakwai ta mulkinsa. ^a

Sarki ya ƙaunaci Esta fiye da dukan sauran mata; ta kuma sami tagomashi da yarda a wurinsa fiye da dukan budurwai. Saboda haka ya sa rawanin sarauta a kanta, ya kuma naɗa ta sarauniya a maimakon Bashti.

Sarki ya yi babban biki domin dukan shugabanninsa da fadawansa—bikin Esta. Ya kuma yi shelar hutu a larduna, ya ba da kyautai da karimcin sarauta.

To, sa'ad da aka sāke tara budurwai sau na biyu, Mordekai yana zaune a ƙofar sarki. Esta ba ta bayyana mutanenta ko danginta ba, yadda Mordekai ya umarce ta; ta kuma yi masa biyayya kamar yadda take yi sa'ad da yake renonta.

Mordekai Ya Tona Maƙarƙashiya a Kan Sarki

A kwanakin nan, yayin da Mordekai yake zaune a ƙofar sarki, sai Bigtana da Teresh, bābannin sarki guda biyu masu tsaron ƙofa, suka yi fushi, suka ƙulla maƙarƙashiyar kashe Sarki Zerzes. Amma Mordekai ya sami labarin maƙarƙashiyar, sai ya gaya wa Sarauniya Esta, ita kuwa ta sanar da sarki a cikin sunan Mordekai. Aka bincika al'amarin, aka tabbatar gaskiya ne, sai aka rataye su biyun a kan gungume. Aka kuma rubuta wannan a cikin littafin tarihi a gaban sarki.