Esther 2

2 ¹Chiwui thili, Awunga Ahasueruswui malungkhavāt ngalanthui tharan, ana Vashtili, ava khi sākahai, kala awuitungli khi kakaso sākahai chi phaningunga. ²Awungawui raobingna hānga, "Awungawui vang kachingva̱ ngalānao mathā phākhuiranu. ³Kachingva̱ ngalānao mathā saikorali Susa keinungmāngli, sha̱nao khamayona awungawui ahonga Hegaiwui khareili khalei sha̱naobingwui shimli kazipkhui khavai, awunga china awui wungram ngalei kachida otva̱bing kapangmiranu; kala athumli azak khamathā sākhavai ot sāmichinglu. ⁴Awungali ningyāng ungngasaka ngalānao chi Vashtiwui mahutli mungranu." Hi awungali ningyāng unglakhaowa, kala ana chithāda sai.

⁵Susa keinungmāngli Jehudipa akha okthuida leisai, awui ming Mordecaina, Jairwui nao, Shime-iwui nao, Kishwui nao, Benjaminshi akhana, ⁶Babylonwui awunga Nebuchadnezzarna khuivā kahai Judahwui awunga Jeconiah ngasoda tukthui kahai narkahaibingwui ngachaili Jerusalemwui eina tukvā kahaina. ⁷Ana avāgatowui naongalāva̱, ava kala ava̱va̱ maleila, Hadassah, chiya Estherli nganaokhuida leisai. Ngalānao chi asho-arep unglaka kala mathālaka; ava kala ava̱va̱ thihaida, Mordecaina ali awui naongalāva̱ thada nganaokhui.

⁸Awungawui kakaso kala kaso shākhuilaga, ngalānao kachungkha Hegaiwui khareili Susa keinungmāngli kazipkhui tharan, Estherli awungawui konungli, sha̱nao khamayona Hegaiwui khareili khuivā. ⁹Ngalānao chi ali ningyāng ungngasaka kala ngahānkhangai samphanga, chiwui vang ana ngalāngda ali azak khamathā sākhavai ot kala kashakazā yar mi, awungawui konungwui eina ngalānao shini kapangkhui, kala ali kala awui rao sha̱naobingli sha̱naobingwui shimwui mathāmeikap pamli khuivā. ¹⁰Estherna awui yur lah awui shimkhur chi maphongmilui, kaja Mordecaina ali chithāda masā khavai kasoi. ¹¹Esther kathāda leikhala kala awuitungli khi shokkahai chi theikhui khavai, zimiksho kachida Mordecaina sha̱naobingwui shim yāngkhupwui mangāli yaothuizata.

¹²Ngalānao kachiwui Awunga Ahasueruswui pāngli vākhavai atam chi, khamathā samichinga sākhavai phalungra kachāng tharāda khani kupkahaiwui thili rai; kachāng tharuk myrrh thao eina, kala kachāng tharuk anganam kala azak mathān ot eina sāmichinga. ¹³Ngalānao kachi hithāda awungawui pāngli vai: sha̱naobingwui shimwui eina awungawui konungli khuivā khavai, ana khipākha kapokhui chi ali samichinga. ¹⁴Ngazin ana zang; ngathor ana angashirva̱ khamayona awungawui ahonga Shaashgazwui khareili khalei sha̱naobingwui shim kakhaneli latunga. Awungana awuili ningyāng maungakha kala aming eina makhokha, ana awungawui pāngli malatunlui.

¹⁵Mordecaina awui naongalāva̱ thada nganaokhui kahai Mordecaiwui avāgato Abihailwui naongalāva̱ Esther, awungawui pāngli vākhavai awui atam rai tharan, sha̱nao khamayona awungawui ahonga Hegaina hāngkahai maningla khangatei nothā mapokhuimana. Ali kathei mi kachiva̱li Esther ngahānkhangai samphanga.

¹⁶Estherli awui mungwui zingkum kashine, kachāng katharā Tebethli, awui konungli Awunga Ahasueruswui pāngli khuivā. ^a a v16 Tebeth hi Hebrew kum-mashingwui kachāng katharāna, December kala Januarywui atamla thai.

¹⁷Awungana sha̱nao saikorawui lāngda Estherli leishilāka; kachingva̱ ngalānao saikorawui lāngda ana ngahānkhangai kala khayākakā samphanga. Chiwui vang eina ana wungnao kuihon chi akuili teimi, kala Vashtiwui mahutli ali awungva̱ sāngasaka.

¹⁸Chieina awungana awui wungnaobing kala raobing saikorali zātkhān kahakva akha sai, kala chili Estherwui zātkhān da hoi. Kala ngaleili zimiksho akha sāngasakhaowa, kala awungawui khalei athishurda lemmet phungrāmihaowa.

¹⁹Chitharan kachingva̱bing rākakhaneli kazipkhui tharan, Mordecaina awungawui ngaveili pamsai. ²⁰Estherna, Mordecaina ali kaso kahai thada, awui yur lah shimkhur mahāngchitheimana; ali khuipama atam thada, ana Mordecaiwui kahāng nganāchinga.

Mordecaina Awungawuitungli Khangarān Akha Phāshoka

²¹Atam chitharan, Mordecaina awungawui ngaveili pamda leilakha, khāmong mayonkasā awungawui ahonga khani, Bigthana eina Tereshna, malungvāthaoda Awunga Ahasuerusli sāthat khavai khangarān sai. ²²Kha khangarān chi Mordecaina theihaowa, kala Awungva̱ Estherli hānga; Estherna chi Mordecaiwui ming eina awungali unghānga. ²³Apong chi ngathingkhuida, mashung da samphanga, kala mipā khani chi tārong akhali shaoshānhaowa. Hi awungawui mangāli Thotrinchān Lairikli kapiserhaida lei.