Basanda Pfumu wa Mukhetu wa Pha
Bwosu Vasti kávambana, bandumba ba bitoku bákutakaniswa mu nzu ya bakhetu ba kyamvu mu mutsiku. Molodekayi, wuna wátonguna Esta mwana wa khaka wandi wuna kakala konda tata yi ngudi, wubazimbwadi kasweka ni yandi wa Muyuta. Wubonga mukhonzi wa kyamvu, amana lusamu lwandi lwa lukanu lwa kuhonda kyamvu bálusonika mu mukanda wa mambu ma kyamvu.
2 1Kunima, tangwa khabu za kyamvu Zelesesi zádiyuka, wáyubuka Vasti, yi mana káhanga, yi mutsiku wuna bámuzengila. 2Basadi ba kyamvu bázimbula: «Basanda bandumba ba bitoku kikuma kya kyamvu. 3Kyamvu kasola basadi muna kosu kinzunga kya kipfumu kyandi, ndangu bandumba boosu ba bitoku bakutakana ku mbanza ya ngolu ya Susa, ku nzu ya bakhetu, kuna tsi ya moku ma Egayi, mutu meni wa kyamvu wuna wisi kengila bakhetu, amana basadila mambu ma kukitula bitoku. 4Ndumba wuna wisi sephidisa kyamvu kayala mu kifulu kya Vasti.» Dyambu dyadi dyásephidisa kyamvu, amana wáhanga bwabuna.
5Muna mbanza ya ngolu ya Susa, mwákala Muyuta mosi bakala tela Molodekayi, mwana Yayili, mwana Simeyi, mwana Kisi, mukwa kikanda kya Benzyame, 6wuna bánata ku Yelusalemi mu kinzenza, hana kati dya batu ba boloku bana bánata hakimosi yi Yekonya kyamvu kya Yuteya, wuna Nebukanezali kyamvu kya Babiloni kánata. 7Yandi wákala tsasa Adasa, disongidila Esta, mwana wa mukhetu wa khaka wa tata wandi, wuna kakala konda tata yi ngudi. Ndumba wuna wákala kitoku mu lutu yi wa kasemi mu kumona; amana tangwa tata yi ngudi wandi báfwa, Molodekayi wámutonguna hanga mwana wandi wa mukhetu.
8Tangwa mutsiku yi ndinga ya kyamvu byáyukana, amana bandumba balawu bákutakana ku mbanza ya ngolu ya Susa kuna tsi ya luyalu lwa Egayi, Esta phi bámunata ku nzu ya kyamvu, kuna tsi ya moku ma Egayi, tsinzidi wa bakhetu. 9Ndumba wuna wámusephidisa, amana wábonga khenda ku mesu mandi; buna watswatsu wámuheka bima bya kukitula bitoku yi ndambu ya madya, yi bandumba tsambwadi básolama tuka ku nzu ya kyamvu, amana wámunata, yandi yi basadi bandi ba bakhetu, ku kifulu kya theti kya nzu ya bakhetu. 10Esta kazimbwalaku kanda dyandi dya batu yi kikanda kyandi, mukuma Molodekayi wámuzimbwala ni kazimbwalaku. 11Kilumbu kyosu, Molodekayi wákala diengila ku thwala ya kyanzala kya nzu ya bakhetu, ndangu kazaya bwosu Esta kákala yi mana máluta.
12Tangwa dya kosu ndumba dya kukwenda kwena kyamvu Zelesesi dyákala kunima dya ngonda kumi yi zodi za kukitula bitoku bwosu bisi lomba: ngonda sambanu ni mafuta ma mila, ngonda sambanu ni malasi yi bima bya kukitula bitoku. 13Kosu ndumba wakwénda kwena kyamvu mu mutindu wuna: byosu bina kálomba, bámuheka byawu ndangu kanata byawu tuka ku nzu ya bakhetu ku nzu ya kyamvu. 14Wákota mu masika; mu nkyelele wávutuka ku nzu ya bakhetu ya zodi, kuna tsi ya luyalu lwa Sasagazi, mutu meni wa kyamvu wuna wisi kengila bakhetu ba kyamvu. Kavutukaku hika kwena kyamvu, yuka ni kyamvu kásephila mu yandi amana kámutela mu khumbu yandi.
15Tangwa dyákala tangwa dya Esta, mwana wa mukhetu wa Abigayili, khaka wa tata wa Molodekayi, wuna Molodekayi wámutonguna hanga mwana wandi, dya kukwenda kwena kyamvu, kalombaku kima, kaka mana Egayi, mutu meni wa kyamvu wuna wisi kengila bakhetu, káhana ndongisila. Esta wábonga khenda kwena boosu bana bámumona.
16Esta bámunata kwena kyamvu Zelesesi ku nzu yandi ya luyalu, muna ngonda ya kumi, disongidila Tebeti, muna mvula ya tsambwadi ya luyalu lwandi. a a v16 Tebeti yenina ngonda ya kumi muna khalandiliye ya Bayuta, bela-bela yi Disemba yi Yanwaye.
17Kyamvu wázola Esta kuluta bakhetu boosu; wábonga khenda yi thambwasa ku mesu mandi kuluta bandumba boosu. Buna wásya mukhonzi wa luyalu kuna mutwa wandi, amana wámukitula pfumu wa mukhetu mu kifulu kya Vasti.
18Kyamvu wáta mukinzi wa mbuta kikuma kya bapfumu bandi boosu yi basadi bandi, disongidila mukinzi wa Esta. Wásamuna kilumbu kya luvundulu muna binzunga, amana wáhana makabu yi tsambu ya kyamvu.
19Muna tangwa bandumba bákutakana mu mbala ya zodi, Molodekayi kákala wazakala ku mwelu wa kyamvu. 20Esta kazimbwalaku kanda dyandi dya batu yi kikanda kyandi, bwosu Molodekayi kámulongila; wakala mulemvukila bwosu kakala muna tangwa kámutsasa.
Molodekayi Wálukisa Kifwandu kya Kuhonda Kyamvu
21Muna tangwa meni dina, bwosu Molodekayi kákala wazakala ku mwelu wa kyamvu, Bigitani yi Telesi, batu meni bodi ba kyamvu bana bakala kengila mwelu, bákwata khabu, amana bákasa kifwandu kya kuhonda kyamvu Zelesesi. 22Kaasi Molodekayi wázaya kifwandu kina, amana wázimbula kwena pfumu wa mukhetu Esta; yandi wásamuna dyawu kwena kyamvu mu khumbu ya Molodekayi. 23Bázonzila dyambu dina, amana dyázyama dyakyedika, buna bayakala bodi bábakomila ha nti. Básonika dyawu mu mukanda wa mazonzi ma bilumbu ku thwala ya kyamvu.
