ኣስቴር 2 FHB Father's Heart Bible™

2 ¹ድሕሪ እዙይ፥ ቑጥዐ ንጉስ ኣሃሽዌሮስ ምስ ሃደአ፥ ንዋሽቲ፥ እቲ ዝገበረቶ ነገርን ኣብ ልዕሊኣ ዝተወሰነን ዘከረ። ²ኣገልገልቲ ንጉስ ድማ ከምዙይ በሉ፦ “ንንጉስ መልክዐኛታት ደናግል ኣጓላት ይደለያሉ። ³ንጉስ ኣብ ኵሉ ኣውራጃታት መንግስቱ ኣሕሉቕ ይሹም፤ ንሳቶም ድማ ነፍሲ ወከፍ መልክዐኛ ድንግል ጓል፥ ናብ ዕርድቲ ኸተማ ሱሳ፥ ናብቲ ነተን ኣንስቲ ዝሕሉ ስሉብ ንጉስ ሄጋይ ዝመርሖ ቤት ኣንስቲ ይእክብወን፤ ናይ ፅባቐ መድሃኒት ድማ ይወሃበን። ⁴እታ ንንጉስ ደስ እተብል ጓል ድማ ኣብ ክንዲ ዋሽቲ ትንገስ።” እዝ ነገር እዙይ ድማ ንንጉስ ደስ ኣበሎ፤ ከምኡውን ገበረ።

⁵ኣብ ዕርድቲ ኸተማ ሱሳ ድማ መርዶክዮስ ዝበሃል ሓደ ኣይሁዳዊ ይነብር ነበረ፤ ንሱ ወዲ ኢያኢር፥ ወዲ ሳሚ፥ ወዲ ቂስ፥ ብንያማዊ እዩ፤ ⁶ንሱ፥ ምስ ኢኮንያን ንጉስ ይሁዳ፥ ናቡከደነፆር ንጉስ ባቢሎን ካብ ኢየሩሳሌም ምስ ዝማረኾ ምሩኻት ዝተማረኸ እዩ። ⁷ንሱ ድማ ንሃዳሳ፥ ንሳ ኣስቴር፥ ጓል ሓወቦኡ፥ ኣቦ ኾነ እኖ ዘይብላ፥ የዕቢ ነበረ። እታ ጓል ከዓ መልክዐኛ፥ ትርኢታውን ፅብቕቲ ነበረት፤ ኣቦኣን እኖኣን ምስ ሞቱ ድማ፥ መርዶክዮስ ከም ጓሉ ገይሩ ወሰዳ።

⁸ትእዛዝ ንጉስን ኣዋጁን ምስ ተሰምዐ፥ ብዙሓት ኣጓላትን ናብ ዕርድቲ ኸተማ ሱሳ፥ ኣብ ትሕቲ ሄጋይ ምስ ተኣከባ፥ ኣስቴርውን ናብ ቤተ መንግስቲ ንጉስ፥ ናብ ኢድ ሄጋይ እቲ ሓላዊ ኣንስቲ ተወስደት። ⁹እታ ጓል ከዓ ደስ ኣበለቶ፥ ኣብ ቅድሚኡውን ሞገስ ረኸበት፤ ስለዙይ ቐልጢፉ ናይ ፅባቐ መድሃኒታን ግደ መብልዓን ሃባ፤ ካብ ቤተ መንግስቲ ንጉስ ሸውዓተ ዝተመረፃ ኣጓላት ድማ ሃባ፤ ንኣኣን ነግራዳን ድማ ናብቲ ዝበለፀ ክፍሊ ቤት ኣንስቲ ኣግዓዘን። ¹⁰ኣስቴር ድማ፥ መርዶክዮስ ከይትገልፅ ኣዚዝዋ ስለ ዝነበረ፥ ህዝባ ኾነ ዓሌታ ኣይገለፀትን። ¹¹መርዶክዮስ ድማ ኣስቴር ከመይ ከም ዘላን እንታይ ከም ዝወረዳን ክፈልጥ፥ ኵሉ መዓልቲ ኣብ ቅድሚ ኣፅድ ቤት ኣንስቲ ይመላለስ ነበረ።

¹²ነፍሲ ወከፍ ጓል ናብ ንጉስ ኣሃሽዌሮስ እትኣትወሉ ተራ፥ ዓሰርተ ኽልተ ወርሒ ናይ ግዴታ ናይ ፅባቐ መድሃኒት ምስ ገበረት ይበፅሕ ነበረ፤ ሽዱሽተ ወርሒ ብዘይቲ ኸርበ፥ ሽዱሽተ ወርሒ ኸዓ ብጥዑም ጨናን ቅብኣትን። ¹³ነፍሲ ወከፍ ጓል ናብ ንጉስ ከምዙይ ገይራ ትኣቱ ነበረት፦ ካብ ቤት ኣንስቲ ናብ ቤተ መንግስቲ ንጉስ ክትማልኦ ዝደለየቶ ዅሉ ይወሃባ ነበረ። ¹⁴ምሸት ትኣቱ፤ ንግሆ ድማ ናብ ካልኣይ ቤት ኣንስቲ፥ ናብ ኢድ ሻዓሽጋዝ እቲ ነተን ዕቁባት ዝሕሉ ስሉብ ንጉስ ትምለስ ነበረት። ንጉስ እንተ ዘይፈተዋን ብስማ እንተ ዘይፀውዓን ድማ፥ ናብ ንጉስ ኣይትምለስን ነበረት።

¹⁵ኣስቴር፥ ጓል ዓቢካኢል፥ ሓወቦ መርዶክዮስ፥ እቲ ኸም ጓሉ ገይሩ ዘዕበያ፥ ናብ ንጉስ ክትኣቱ ተራኣ ምስ በፅሐ ድማ፥ ብዘይ እቲ ነተን ኣንስቲ ዝሕሉ ስሉብ ንጉስ ሄጋይ ዝበላ፥ ሓደ እኳ ኣይለመነትን። ኣስቴር ድማ ኣብ ቅድሚ ዅሎም እቶም ዝረአይዋ ሞገስ ረኸበት።

¹⁶ኣስቴር ድማ ኣብ መበል ዓሰርተ ወርሒ፥ ጥቤት ኣብ ዝበሃል፥ ኣብ መበል ሸውዓተ ዓመት ንግስናኡ፥ ናብ ንጉስ ኣሃሽዌሮስ ናብ ቤተ መንግስቱ ተወስደት። ^a a v16 ጥቤት መበል ዓሰርተ ወርሒ ናይ ኣቆፃፅራ እብራውያን ኮይኑ ፥ ዳርጋ ታሕሳስ–ጥሪ እዩ።

¹⁷ንጉስ ድማ ንኣስቴር ካብ ኵለን ኣንስቲ ኣዝዩ ኣፍቀራ፤ ካብ ኵለን ደናግል ንላዕሊ ኸዓ ኣብ ቅድሚኡ ሞገስን ፀጋን ረኸበት። ስለዙይ ነቲ ንጉሳዊ ኣኽሊል ኣብ ርእሳ ገበረ፤ ኣብ ክንዲ ዋሽቲውን ኣንገሳ።

¹⁸ንጉስ ድማ ንዅሎም ሹመኛታቱን ኣገልገልቱን ዓብዪ ድግስ ፥ ድግስ ኣስቴር ገበረ። ኣብ ኣውራጃታትውን በዓል ኣወጀ፤ ከም ልግሲ ንጉስ ድማ ገፀ በረኸት ሃበ።

¹⁹እተን ደናግል ንኻልኣይ ጊዜ ምስ ተኣከባ ድማ ፥ መርዶክዮስ ኣብ ኣፍ ደገ ንጉስ ተቐሚጡ ነበረ። ²⁰ኣስቴር ድማ ከምቲ መርዶክዮስ ዝኣዘዛ፥ ህዝባ ኾነ ዓሌታ ኣይገለፀትን፤ ከምቲ ዘዕበያ ጊዜ፥ ትእዛዙ ትእዘዝ ነበረት።

መርዶክዮስ ኣብ ልዕሊ ንጉስ ዝተገብረ ተንኰል ቀሊዑ

²¹በተን መዓልቲታት እቲኣተን፥ መርዶክዮስ ኣብ ኣፍ ደገ ንጉስ ተቐሚጡ ኸሎ፥ ብግታንን ቴሬሽን፥ ነቲ ኣፍ ደገ ዝሕልዉ ኽልተ ስሉባት ንጉስ፥ ተቘጢዖም፥ ንጉስ ኣሃሽዌሮስ ክቐትልዎ ተማኸሩ። ²²መርዶክዮስ ግና ነቲ ተንኰል ፈሊጡ ፥ ንንግስቲ ኣስቴር ነገራ፤ ንሳ ድማ ብስም መርዶክዮስ ንንጉስ ነገረቶ። ²³እቲ ነገር ድማ ተመርመረ ፥ ሓቂ ምዃኑ ተረጋገፀ፤ ክልቲኦም ድማ ኣብ ባላ ተሰቒሎም ተቐተሉ። ኣብ ቅድሚ ንጉስ ድማ ፥ ኣብ መፅሓፍ ታሪክ ተፅሓፈ።