አስቴር 3

3 ¹ከዚህ በኋላ ንጉሡ ጠረክሲስ የአጋጋዊውን የሐመዳታ ልጅ ሐማን ከፍ ከፍ አደረገው፤ ወንበሩንም ከእርሱ ጋር ከነበሩት መኳንንት ሁሉ በላይ ከፍ አደረገለት። ²ንጉሡ ባዘዘው መሠረት በንጉሡ ደጅ የነበሩ የንጉሡ ባሪያዎች ሁሉ ተንበርክከው ለሐማ ይሰግዱ ነበር። መርዶክዮስ ግን አይንበረከክም፤ አይሰግድም ነበር። ³በንጉሡ ደጅ የነበሩ የንጉሡ ባሪያዎች መርዶክዮስን፣ “የንጉሡን ትእዛዝ ለምን ትተላለፋለህ?” ብለው ጠየቁት። ⁴ቀን በቀን ያባብሉት ነበር፤ እርሱ ግን እምቢ አለ፤ አይሁዳዊ መሆኑን ነግሯቸው ስለ ነበር የመርዶክዮስ አቋም ጸንቶ ይኖር እንደ ሆነ ለማየት ለሐማ ነገሩት። ⁵ሐማ መርዶክዮስ እንደማይንበረከክለትና እንደማይሰግድለት ባየ ጊዜ በቍጣ ተሞላ። ⁶የመርዶክዮስ ሕዝብ እነማን እንደ ሆኑ ነግረውት ስለ ነበር መርዶክዮስን ብቻ መግደል አንሶ ታየው፤ ስለዚህ ሐማ በጠረክሲስ መንግሥት ሁሉ የነበሩትን የመርዶክዮስን ሕዝብ አይሁድን ሁሉ ለማጥፋት ፈለገ።

⁷በንጉሡ ጠረክሲስ በአሥራ ሁለተኛው ዓመት በመጀመሪያው ወር በኒሳን ለእያንዳንዱ ቀንና ለእያንዳንዱ ወር በሐማ ፊት ፉርን (ዕጣውን) ተጣጣሉ፤ ዕጣውም በአሥራ ሁለተኛው ወር በአዳር ላይ ወደቀ። ⁸ሐማም ንጉሡን ጠረክሲስን እንዲህ አለው፤ “በመንግሥትህ አውራጃዎች ሁሉ በሕዝቦች መካከል ተበትኖና ተከፋፍሎ የሚኖር አንድ ሕዝብ አለ። ሕጎቻቸው ከሁሉም ሕዝብ ሕግ የተለዩ ናቸው፤ የንጉሡንም ሕግ ከቁም ነገር አይቈጥሩም፤ እነርሱን መታገሡ ለንጉሡ ምንም አይጠቅመውም። ⁹ንጉሡን ደስ የሚያሰኘው ከሆነ፣ እነርሱ እንዲጠፉ ይጻፍ፤ እኔም ለንጉሡ ግምጃ ቤት ሦስት መቶ ሰባ አምስት ቶን ብር ለሹማምቱ እመዝናለሁ።”

¹⁰ንጉሡም የማኅተም ቀለበቱን ከጣቱ አውልቆ ለአይሁድ ጠላት ለአጋጋዊው ለሐመዳታ ልጅ ለሐማ ሰጠው። ¹¹ንጉሡም ሐማን፣ “ብሩ ያንተ ነው፤ ሕዝቡም ቢሆን፣ እንደ ፈቀድህ አድርግባቸው” አለው።

¹²በመጀመሪያው ወር በአሥራ ሦስተኛው ቀን የንጉሡ ጸሐፊዎች ተጠሩ፤ ሐማ ያዘዘውም ሁሉ ለንጉሡ ሹማምት፣ በየአውራጃው ላሉ ገዦችና ለሕዝቡ ሁሉ መኳንንት ተጻፈ፤ ለእያንዳንዱ አውራጃ በራሱ ጽሕፈት፣ ለእያንዳንዱም ሕዝብ በራሱ ቋንቋ ተጻፈ። በንጉሡ በጠረክሲስ ስም ተጽፎ በማኅተም ቀለበቱም ታተመ። ¹³መልእክተኞችም ወደ ንጉሡ አውራጃዎች ሁሉ ደብዳቤዎችን ወሰዱ፤ ወጣትና ሽማግሌ፣ ሴቶችና ሕፃናት ሳይቀሩ አይሁድን ሁሉ በአንድ ቀን በአሥራ ሁለተኛው ወር በአዳር በአሥራ ሦስተኛው ቀን ለማጥፋት፣ ለመግደልና ለማስወገድ፣ ንብረታቸውንም ለመበዝበዝ ታዘዘ። ¹⁴ለዚያም ቀን ተዘጋጅተው እንዲጠብቁ የደብዳቤው ግልባጭ በያንዳንዱ አውራጃ እንደ ሕግ ወጥቶ ለሕዝቦች ሁሉ ይገለጥ ነበር። ¹⁵በንጉሡ ትእዛዝ መልእክተኞቹ ፈጥነው ወጡ፤ ዐዋጁም በሱሳ ግንብ ውስጥ ወጣ። ንጉሡና ሐማ ሊጠጡ ተቀመጡ፤ የሱሳ ከተማ ግን ታወከች።