Ester 3

3 ¹Human niini gipauswag ni Haring Xerxes si Haman nga anak ni Hammedatha nga Agagihanon, gibayaw siya ug gipataas ang iyang lingkoranan labaw sa tanang mga opisyal nga uban kaniya. ²Ang tanang mga sulugoon sa hari nga anaa sa ganghaan sa hari nangluhod ug nangyukbo kang Haman, sumala sa gisugo sa hari. Apan si Mordecai dili moluhod ni moyukbo. ³Busa ang mga sulugoon sa hari nga anaa sa ganghaan sa hari nangutana kang Mordecai, “Nganong wala ka magtuman sa sugo sa hari?” ⁴Adlaw-adlaw siya nilang giaghat, apan midumili siya; busa gisuginlan nila si Haman, aron tan-awon kon molungtad ba ang baroganan ni Mordecai, kay gisultihan man niya sila nga siya usa ka Judio. ⁵Sa dihang nakita ni Haman nga si Mordecai dili moluhod ni moyukbo kaniya, napuno siya sa kapungot. ⁶Ang pagpatay lamang kang Mordecai daw ubos alang kaniya, kay gisultihan man siya kon kinsa ang katawhan ni Mordecai; busa nagtinguha si Haman sa paglaglag sa tanang katawhan ni Mordecai, ang mga Judio, sa tibuok gingharian ni Xerxes.

⁷Sa unang bulan, ang Nisan, sa ikanapulog duha ka tuig ni Haring Xerxes, naglabay silag Pur (ang ripa) atubangan ni Haman alang sa matag adlaw ug matag bulan; ug ang ripa natagak sa ikanapulog duha ka bulan, ang Adar. ⁸Miingon si Haman kang Haring Xerxes, “Adunay usa ka katawhan nga nagkatibulaag ug nagkatag taliwala sa mga katawhan sa tibuok mga probinsya sa imong gingharian. Ang ilang mga balaod lahi sa tanan, ug wala nila tagda ang mga balaod sa hari; walay kapuslanan sa hari ang pagtugot kanila. ⁹Kon makapahimuot kini sa hari, ipasulat nga laglagon sila; motimbang akog 375 ka tonelada nga pilak ngadto sa iyang mga opisyal alang sa panudlanan sa hari.”

¹⁰Gihubo sa hari ang iyang singsing nga pangtimbre ug gihatag kini kang Haman nga anak ni Hammedatha nga Agagihanon, ang kaaway sa mga Judio. ¹¹“Imo na ang pilak,” miingon ang hari kang Haman, “ug ang katawhan usab—buhata kanila ang bisan unsay imong gusto.”

¹²Sa ikanapulog tulo ka adlaw sa unang bulan gipatawag ang mga escriba sa hari, ug ang sugo ni Haman gisulat ngadto sa mga satrapa sa hari, ang mga gobernador sa matag probinsya, ug ang mga opisyal sa matag katawhan—ang matag probinsya sa kaugalingon nilang sinulatan, ang matag katawhan sa kaugalingon nilang pinulongan. Gisulat kini sa ngalan ni Haring Xerxes, gitimbrehan sa iyang singsing nga pangtimbre. ¹³Ang mga mensahero nagdalag mga sulat ngadto sa tanang mga probinsya sa hari: laglagon, patyon, ug puohon ang tanang mga Judio—bata ug tigulang, mga babaye ug mga bata—sulod sa usa ka adlaw, ang ikanapulog tulo sa ikanapulog duha ka bulan, ang Adar, ug sakmiton ang ilang mga kabtangan. ¹⁴Usa ka kopya ipakanaog ingon nga balaod sa matag probinsya, ipakita sa tanang mga katawhan, aron andam sila alang niadtong adlawa. ¹⁵Sa sugo sa hari ang mga mensahero midali pagpanglakaw, ug ang mando gipakanaog sa kota sa Susa. Ang hari ug si Haman naglingkod nga nag-inom, apan ang siyudad sa Susa nalibog.