Haman pora Yehudi khan ke khotom koribole bhabona kore
Haman ke dangor pod diye, aru Mordekai tar age te athu nagare. Apman pai kene, Haman pora ekjon manuh ke morai diya tu bisi chhuta ase koi kene bhabe, aru chithi gola pora basi luwa ekta din te sob Yehudi khan ke nash koribole raja pora ekta hukum kini loi. Khobor luwa manuh khan ghura te jai, aru raja aru Haman bohi kene pi thake.
3 1Eitu pichete Raja Xerxes pora Agagi manuh Hammedatha laga putro Haman ke uthai dise, aru tar ke uncha kori kene, tar logot thaka sob adhikari khan uporte tar bohi thaka jaga ke uncha kori dise. 2Raja laga dorja te thaka raja laga sob noukar khan, raja pora hukum diya nisena, Haman age te athukari kene matha jhukai dise. Kintu Mordecai pora athukari bhi nai aru matha jhukai bhi nai. 3Karne raja laga dorja te thaka raja laga noukar khan pora Mordecai ke hudise, “Tumi kele raja laga hukum mana nai?” 4Din pichete din tarkhan pora tar ke koi thakise, kintu tai mani loa nai; karne, Mordecai laga kotha khara thakibo na nai eitu sabole, tarkhan pora Haman ke koise, kilemane tai nijor ekjon Yehudi ase koi kene tarkhan ke koi disele. 5Jitia Haman pora dikhise Mordecai pora tar age te athukari bhi nai aru matha jhukai bhi nai, titia tai bisi khong pora bhorta hoise. 6Mordecai ekla ke morai diya tu tai nimite chutu kaam nisena bhabise, kilemane Mordecai laga manuh khan kun ase eitu tarkhan pora tar ke koi disele; karne Haman pora Xerxes laga pura rajyo te thaka Mordecai laga sob manuh, Yehudi khan ke khotom koribole bisarise.
7Raja Xerxes laga baroh number saal te, prothom mahina Nisan te, tarkhan pora Haman age te hodai din aru hodai mahina nimite Pur (chithi) phelaise; aru chithi tu baroh number mahina, Adar te girise. 8Haman pora Raja Xerxes ke koise, “Apuni laga rajyo laga sob desh khan te thaka manuh khan majot te ekta jati ephale-uphale hoi kene thaki ase. Tarkhan laga niyom sob manuh pora alag ase, aru tarkhan raja laga niyom ke mana nai; tarkhan ke rakhile raja nimite eku labh nai. 9Jodi raja ke bhal lage, tarkhan ke khotom koribole likhi dibi; aru moi raja laga dhun-bhandar nimite adhikari khan laga hathte 375 ton chandi topai dibo.”
10Titia raja pora tar chhap diya angthi ulai kene Yehudi khan laga dushman, Agagi manuh Hammedatha laga putro Haman ke dise. 11Raja pora Haman ke koise, “Chandi tu tumar ase, aru hei manuh khan ke bhi—tumi ki itcha ase tarkhan logot eneka koribi.”
12Prothom mahina laga teroh number din te raja laga likha manuh khan ke mati kene anise, aru Haman pora hukum diya nisena, raja laga satrap khan, hodai desh uporte thaka shashok khan, aru hodai jati laga adhikari khan ke likhise—hodai desh ke tarkhan nijor akshor te, hodai jati ke tarkhan nijor bhasha te. Raja Xerxes laga nam te likhi kene, raja laga chhap diya angthi pora chhap marise. 13Chithi lora manuh khan pora raja laga sob desh te chithi khan loi jaise: ekdin bhitor te, baroh number mahina Adar laga teroh number din te, sob Yehudi khan ke—jawan aru bura, mahila aru bacha khan ke—khotom koribi, morai dibi aru nash kori dibi, aru tarkhan laga saman khan loi lobi. 14Hei chithi laga ekta nokol hodai desh te niyom nisena ulai dibole thakise, aru sob jati ke dikhai dibole, titia tarkhan hei din nimite taiyar thakibo. 15Raja laga hukum pora chithi lora manuh khan joldi ulai jaise, aru hei hukum Susa laga kella te ulaise. Raja aru Haman tu bohi kene kha-pani kori thakise, kintu Susa sheher tu ghabrai jaise.