Esther tar manuh khan nimite age te ulai ahise
Mordekai chatkapra pindi kene duar te kandi thake, aru Esther ke jor kori kene koi: tar raja ghor pora tai ke bachai nadibo, aru kun jane tai eneka homoi nimite he raja singhasan te punchise naki. Tai tin din laga upwas rakhibole koi aru matai nathaka te raja logot jai — jodi tai mori jai, tai mori jabo.
4 1Ki sob hoi jaise, eitu sob Mordekai pora jani kene, tar kapra phatai dise, chatkapra pindi kene aru chai lagai kene, sheher te bahar jai kene dangor awaj aru tita pora kandise. 2Raja laga duar tak he tar jaise, kilemane dukh laga kapra pindi kene kun bhi hei bhitor te ghusibo napare. 3Raja laga hukum aru niyom ji sob prodesh te punchise, ta te Yehudi khan bisi dukh korise—upwas rakhi kene, kandi kene, chikar mari kene; bisi manuh chatkapra aru chai te ghumai thakise.
4Esther laga jawan maiki khan aru khoja khan pora tar ke kua homoi te, rani tu bisi dukh pora bikul hoise. Tar chatkapra bodli koribole tai Mordekai nimite kapra pathai dise, kintu tai mana korise. 5Esther pora Hathak ke matise, kun ke raja laga khoja khan majote tai nimite rakhise, aru eitu ki ase aru kile ase janibole tar ke Mordekai logot pathai dise. 6Titia Hathak bahar ulai kene, raja laga duar age te thaka sheher chowk te Mordekai logot jaise, 7Mordekai pora, tar logot ki sob hoise, eitu sob Hathak ke koise, aru Yehudi khan ke khotom koribole Haman pora raja laga bhandar te dibole vachan diya thik poisa tu bhi koise. 8Esther ke dikhabole aru bujhai dibole, aru raja logot jai kene binti koribole aru tar manuh khan nimite bhik mangibole tai ke koribole, Susa te ulai diya khotom kora niyom laga ekta nokol bhi tai tar ke dise.
9Hathak wapas ahi kene, Mordekai ki koise eitu sob Esther ke koi dise. 10Titia Esther pora Hathak ke koise aru Mordekai nimite eitu khobor tar ke dise: 11“Raja laga sob noukar khan aru tar prodesh khan laga manuh khan jane: kun manuh nahole maiki pora mata nathaki kene raja laga bhitor angan te ghuse, tar nimite ekta niyom ase—mora—kintu raja pora tar ke suna laga raj-lathi dikhai dile, tetiya he tai bachibo. Aru moi ke etiya tis din tak raja logot mata nai.”
12Esther ki koise eitu sob tarkhan pora Mordekai ke kua homoi te, 13Mordekai pora Esther ke jawab dise: “Raja laga mahal te sob Yehudi khan majote khali tumi he bachibo eneka tumi nabhabibi. 14Jodi tumi etiya chup-chap thakibo, tene hole Yehudi khan nimite dusra jaga pora aram aru bacha ulabo, kintu tumi aru tumar baba laga ghor tu moribo. Aru kun jane, eneka ekta homoi nimite he tumi raja laga singhason te punchise na nai?” a a v14 Amar Pitri laga nam pura Esther laga kitab te kitia bhi nalikhe, hoilebi Tar nadikha hath tu sob jagah te kaam kori ase—Mordekai pora bacha ahibo eneka pura biswas kore, kilemane Pitri pora Tar manuh khan ke chari nadibo eitu tai jane.
15Titia Esther pora Mordekai ke eitu jawab wapas pathai dise: 16“Jabi, Susa te thaka sob Yehudi khan ke joma koribi. Moi nimite upwas rakhibi—tin din, rati nohoile din, nakhabi aru napibi. Moi laga jawan maiki khan aru moi bhi upwas rakhibo. Titia niyom laga bhirodh hoilebi moi raja logot jabo; aru jodi moi moribo, tene hole moi moribo.” 17Titia Mordekai jai kene, Esther pora tar ke hukum diya sob kaam korise.