Esteri 3

3 ¹Lẹ́yìn èyí ni ọba Serisisi gbé Hamani ọmọ Hammedata ara Agagi ga, ó sì gbé e lékè, ó sì fi ìtẹ́ rẹ̀ sí orí gbogbo àwọn ìjòyè tí ó wà pẹ̀lú rẹ̀. ²Gbogbo àwọn ìránṣẹ́ ọba tí ó wà ní ẹnu ọ̀nà ọba kúnlẹ̀, wọ́n sì tẹríba fún Hamani, gẹ́gẹ́ bí ọba ti pàṣẹ. Ṣùgbọ́n Mordekai kò ní kúnlẹ̀, bẹ́ẹ̀ ni kò sì ní tẹríba. ³Nítorí náà àwọn ìránṣẹ́ ọba tí ó wà ní ẹnu ọ̀nà ọba béèrè lọ́wọ́ Mordekai pé, “Èéṣe tí ìwọ fi ń ṣàìgbọràn sí àṣẹ ọba?” ⁴Ọjọ́ dé ọjọ́ ni wọ́n ń rọ̀ ọ́, ṣùgbọ́n ó kọ̀; nítorí náà wọ́n sọ fún Hamani, láti rí i bóyá ọ̀rọ̀ Mordekai yóò dúró, nítorí tí ó ti sọ fún wọn pé Júù ni òun. ⁵Nígbà tí Hamani rí i pé Mordekai kò ní kúnlẹ̀, bẹ́ẹ̀ ni kò ní tẹríba fún un, ìbínú kún inú rẹ̀. ⁶Pípa Mordekai nìkan dàbí ohun tí ó kéré fún un, nítorí wọ́n ti sọ fún un ẹni tí àwọn ènìyàn Mordekai jẹ́; nítorí náà Hamani wá ọ̀nà láti pa gbogbo àwọn ènìyàn Mordekai run, àwọn Júù, káàkiri gbogbo ìjọba Serisisi.

⁷Ní oṣù kìíní, èyíinì Nisani, ní ọdún kejìlá ọba Serisisi, wọ́n sẹ́ Puri (ìbò) níwájú Hamani fún ọjọ́ kọ̀ọ̀kan àti oṣù kọ̀ọ̀kan; ìbò sì bọ́ sí orí oṣù kejìlá, èyíinì Adari. ⁸Hamani sọ fún ọba Serisisi pé, “Àwọn ènìyàn kan wà tí ó fọ́nká, tí ó sì túká láàrin àwọn ènìyàn káàkiri gbogbo àwọn ìgbèríko ìjọba rẹ. Òfin wọn yàtọ̀ sí ti gbogbo ènìyàn, wọn kò sì pa òfin ọba mọ́; kò sì ní èrè kankan fún ọba láti fàyè gba wọ́n. ⁹Bí ó bá wu ọba, kí a kọ ọ́ pé kí a pa wọ́n run; èmi yóò sì wọn tọ́ọ̀nù fàdákà 375 fún àwọn ìjòyè rẹ̀ sí ilé ìṣúra ọba.”

¹⁰Ọba sì bọ́ òrùka èdìdì rẹ̀, ó sì fi fún Hamani ọmọ Hammedata ara Agagi, ọ̀tá àwọn Júù. ¹¹“Tìrẹ ni fàdákà náà,” ni ọba sọ fún Hamani, “àti àwọn ènìyàn náà pẹ̀lú—ṣe ohun tí ó wù ọ́ sí wọn.”

¹²Ní ọjọ́ kẹtàlá oṣù kìíní ni a pe àwọn akọ̀wé ọba jọ, a sì kọ àṣẹ Hamani sí àwọn gómìnà àgbà ọba, àwọn baálẹ̀ tí ń bójútó ìgbèríko kọ̀ọ̀kan, àti àwọn ìjòyè gbogbo ènìyàn—ìgbèríko kọ̀ọ̀kan ní ọ̀nà ìkọ̀wé tirẹ̀, ènìyàn kọ̀ọ̀kan ní èdè tirẹ̀. A kọ ọ́ ní orúkọ ọba Serisisi, a sì fi òrùka èdìdì rẹ̀ dì í pa. ¹³Àwọn ìránṣẹ́-sáré sì gbé àwọn lẹ́tà lọ sí gbogbo ìgbèríko ọba pé: kí a pa run, kí a pa, kí a sì parẹ́ gbogbo àwọn Júù—ọ̀dọ́ àti àgbà, obìnrin àti ọmọdé—ní ọjọ́ kan, ọjọ́ kẹtàlá oṣù kejìlá, èyíinì Adari, àti kí a kó ẹrù wọn. ¹⁴A ó sì gbé ẹ̀dà rẹ̀ jáde gẹ́gẹ́ bí òfin ní ìgbèríko kọ̀ọ̀kan, a ó fi hàn gbogbo ènìyàn, kí wọ́n lè múra sílẹ̀ de ọjọ́ náà. ¹⁵Nípa àṣẹ ọba ni àwọn ìránṣẹ́-sáré yára jáde, a sì gbé àṣẹ náà jáde ní ilé ìṣọ́ Susa. Ọba àti Hamani jókòó láti mu ọtí, ṣùgbọ́n rúdurùdu ba ìlú Susa.