Eksodu 10

10 ¹Nígbà náà ni Baba wa sọ fún Mose pé, “Lọ sọ́dọ̀ Farao, nítorí mo ti mú ọkàn rẹ̀ àti ọkàn àwọn ìránṣẹ́ rẹ̀ le, kí n lè fi àwọn àmì mi sí àárín wọn. ²Kí ìwọ lè sọ fún ọmọ rẹ àti ọmọ ọmọ rẹ bí mo ṣe fi àwọn ará Ejibiti ṣe ẹlẹ́yà, àti bí mo ṣe fi àwọn àmì mi sí àárín wọn, kí ẹ̀yin kí ó lè mọ̀ pé Èmi ni Baba yín.”

³Mose àti Aaroni lọ sọ́dọ̀ Farao, wọ́n sì wí fún un pé, “Báyìí ni Baba àwọn ará Heberu wí: ‘Yóò ti pẹ́ tó tí ìwọ yóò fi kọ̀ láti rẹ ara rẹ sílẹ̀ níwájú mi? Jẹ́ kí àwọn ènìyàn mi lọ kí wọ́n lè sìn mí.’ ⁴Nítorí bí ìwọ bá kọ̀ láti jẹ́ kí àwọn ènìyàn mi lọ, lọ́la èmi yóò mú eṣú wá sí agbègbè rẹ. ⁵Wọn yóò bo ojú ilẹ̀, tí a kì yóò sì lè rí ilẹ̀ mọ́, wọn yóò sì jẹ ohun tí yìnyín ṣẹ́kù fún ọ, wọn yóò sì jẹ gbogbo igi tí ń hù fún ọ ní oko. ⁶Wọn yóò kún inú ilé rẹ, àti ilé àwọn ìránṣẹ́ rẹ, àti ilé gbogbo àwọn ará Ejibiti—irú èyí tí àwọn baba rẹ àti àwọn baba ńlá rẹ kò rí rí, láti ọjọ́ tí wọ́n ti wà ní ayé títí di òní yìí.” Nígbà náà ó yípadà ó sì kúrò lọ́dọ̀ Farao.

⁷Àwọn ìjòyè Farao wí fún un pé, “Yóò ti pẹ́ tó tí ọkùnrin yìí yóò fi máa dẹkùn mú wa? Jẹ́ kí àwọn ènìyàn náà lọ, kí wọ́n lè sin Ọlọ́run wọn. Ṣé ìwọ kò tíì mọ̀ pé Ejibiti ti parun?”

⁸A sì mú Mose àti Aaroni padà wá sọ́dọ̀ Farao. “Ẹ lọ, ẹ sin Ọlọ́run,” ni ó wí. “Ṣùgbọ́n àwọn wo ni yóò lọ?”

⁹Mose wí pé, “Pẹ̀lú àwọn ọ̀dọ́ wa àti àwọn àgbà wa ni àwa yóò lọ; pẹ̀lú àwọn ọmọkùnrin wa, àwọn ọmọbìnrin wa, agbo àgùntàn wa, agbo màlúù wa—àwa yóò lọ, nítorí àjọyọ̀ ni àwa ní láti ṣe fún Baba wa.”

¹⁰Ó wí fún wọn pé, “Kí Ọlọ́run wà pẹ̀lú yín—bí ẹni pé èmi yóò jẹ́ kí ẹ̀yin àti àwọn ọmọ kékeré yín lọ! Ẹ wò ó, ẹ ní èrò búburú lọ́kàn. ¹¹Rárá! Ẹ̀yin ọkùnrin, ẹ lọ sin Ọlọ́run, nítorí èyí ni ẹ ń fẹ́.” Nígbà náà ni Farao lé wọn kúrò níwájú rẹ̀.

¹²Nígbà náà ni Baba wa sọ fún Mose pé, “Na ọwọ́ rẹ sórí ilẹ̀ Ejibiti kí eṣú lè gòkè wá sórí ilẹ̀ Ejibiti, kí wọ́n sì jẹ gbogbo ohun ọ̀gbìn ilẹ̀ náà tí yìnyín ṣẹ́kù.”

¹³Mose sì na ọ̀pá rẹ̀ sórí ilẹ̀ Ejibiti, Baba wa sì mú kí afẹ́fẹ́ ìlà oòrùn fẹ́ kọjá ilẹ̀ náà ní gbogbo ọjọ́ náà àti ní gbogbo òru náà; nígbà tí ilẹ̀ mọ́, afẹ́fẹ́ náà sì gbé àwọn eṣú wọlé. ¹⁴Àwọn eṣú sì gòkè wá sórí gbogbo ilẹ̀ Ejibiti, wọ́n sì bà sí gbogbo agbègbè rẹ̀—wọ́n pọ̀ gidigidi, kò sí irú wọn rí ṣáájú, bẹ́ẹ̀ ni kì yóò sí irú wọn mọ́ láéláé. ¹⁵Wọ́n bo ojú gbogbo ilẹ̀ náà, wọ́n sì mú un ṣókùnkùn, wọ́n sì jẹ gbogbo ohun ọ̀gbìn ilẹ̀, àti gbogbo èso igi tí yìnyín ṣẹ́kù—kò sí ewé tútù kankan tí ó ṣẹ́kù lórí igi tàbí lórí ohun ọ̀gbìn oko ní gbogbo ilẹ̀ Ejibiti. ¹⁶Nítorí náà Farao yára pe Mose àti Aaroni, ó sì wí pé, “Mo ti ṣẹ̀ sí Ọlọ́run yín àti sí yín pẹ̀lú. ¹⁷Mo bẹ̀ yín, ẹ dárí ẹ̀ṣẹ̀ mi jì mí nìkan ní ẹ̀ẹ̀kan yìí, kí ẹ sì bẹ Ọlọ́run yín kí ó lè mú ikú yìí nìkan kúrò lọ́dọ̀ mi.”

¹⁸Mose sì jáde kúrò lọ́dọ̀ Farao, ó sì bẹ Baba wa. ¹⁹Nígbà náà ni Baba wa yí afẹ́fẹ́ náà padà sí afẹ́fẹ́ ìwọ̀ oòrùn tí ó lágbára gidigidi, tí ó gbé àwọn eṣú sókè, tí ó sì gbé wọn lọ sínú Òkun Pupa; kò sí eṣú kan ṣoṣo tí ó ṣẹ́kù ní gbogbo agbègbè Ejibiti. ²⁰Ṣùgbọ́n Baba wa mú ọkàn Farao le, òun kò sì jẹ́ kí àwọn ọmọ Israẹli lọ.

Òkùnkùn Ọjọ́ Mẹ́ta

²¹Nígbà náà ni Baba wa sọ fún Mose pé, “Na ọwọ́ rẹ sí ojú ọ̀run, kí òkùnkùn lè bo ilẹ̀ Ejibiti—òkùnkùn tí ó nípọn tó bẹ́ẹ̀ tí a lè fi ọwọ́ kàn án.”

²²Mose sì na ọwọ́ rẹ̀ sí ojú ọ̀run; òkùnkùn biribiri sì bo gbogbo ilẹ̀ Ejibiti fún ọjọ́ mẹ́ta. ²³Kò sí ẹni tí ó lè rí ẹnìkejì rẹ̀, bẹ́ẹ̀ ni kò sí ẹni tí ó dìde kúrò ní ipò rẹ̀ fún ọjọ́ mẹ́ta, ṣùgbọ́n gbogbo àwọn ọmọ Israẹli ní ìmọ́lẹ̀ ní ilé wọn.

²⁴Farao sì pe Mose, ó wí pé, “Ẹ lọ, ẹ sin Ọlọ́run yín. Àwọn ọmọ yín pàápàá lè lọ—kìkì agbo àgùntàn yín àti agbo màlúù yín ni kí ẹ fi sílẹ̀.”

²⁵Mose wí pé, “Ìwọ gbọdọ̀ fún wa ní àwọn ẹbọ àti àwọn ọrẹ ẹbọ sísun pẹ̀lú, kí àwa lè rú u fún Baba wa. ²⁶Àwọn ẹran ọ̀sìn wa gbọdọ̀ bá wa lọ pẹ̀lú—pátákò ẹsẹ̀ kan kì yóò ṣẹ́kù. Àwa yóò mú lára wọn láti fi sin Baba wa; àwa kì yóò sì mọ ohun tí a nílò láti fi sìn ín títí àwa yóò fi dé ibẹ̀.”

²⁷Ṣùgbọ́n Baba wa mú ọkàn Farao le, òun kò sì fẹ́ láti jẹ́ kí wọ́n lọ. ²⁸Farao wí fún un pé, “Kúrò lọ́dọ̀ mi! Kíyèsára—má ṣe tún rí ojú mi mọ́, nítorí ọjọ́ tí ìwọ bá tún rí ojú mi, ìwọ yóò kú.”

²⁹Mose wí pé, “Ìwọ ti sọ̀rọ̀ dáradára. Èmi kì yóò tún rí ojú rẹ mọ́ láéláé.”