Eksodu 11

11 ¹Baba wa sọ fún Mose pé, “Ìyọnu kan síi ni èmi yóò mú wá sórí Farao àti sórí Ejipti. Lẹ́yìn náà, òun yóò rán yín jáde kúrò níhìn-ín; nígbà tí ó bá ṣe bẹ́ẹ̀, òun yóò lé yín jáde pátápátá. ²Sọ fún àwọn ènìyàn pé: kí olúkúlùkù ọkùnrin béèrè lọ́wọ́ aládùúgbò rẹ̀, kí olúkúlùkù obìnrin béèrè lọ́wọ́ aládùúgbò rẹ̀, fún ohun èlò fàdákà àti wúrà.”

³Baba wa sì fún àwọn ènìyàn ní ojúrere lọ́dọ̀ àwọn ará Ejipti. Pẹ̀lúpẹ̀lù, Mose fúnra rẹ̀ pọ̀ ní títóbi gidigidi ní ilẹ̀ Ejipti, ní ojú àwọn ìránṣẹ́ Farao àti ní ojú àwọn ènìyàn.

⁴Mose wí pé, “Èyí ni ohun tí Baba wa wí: Nǹkan bí ọ̀gànjọ́ òru, èmi yóò la Ejipti kọjá,

⁵àti pé gbogbo àkọ́bí ní ilẹ̀ Ejipti yóò kú, láti àkọ́bí Farao tí ó jókòó lórí ìtẹ́ rẹ̀, títí dé àkọ́bí ọmọbìnrin ẹrú tí ó wà lẹ́yìn ọlọ, àti gbogbo àkọ́bí ẹranko. ⁶Igbe ńlá yóò kún gbogbo ilẹ̀ Ejipti, irú èyí tí kò tíì sí rí tẹ́lẹ̀, tí kì yóò sì sí mọ́ láéláé. ⁷Ṣùgbọ́n kódà ajá kan kì yóò gbó mọ́ ẹnikẹ́ni nínú àwọn ènìyàn Israẹli, ìbáà ṣe ènìyàn tàbí ẹranko, kí ẹ lè mọ̀ pé Baba wa ya Ejipti sọ́tọ̀ kúrò lọ́dọ̀ Israẹli. ⁸Gbogbo àwọn ìránṣẹ́ rẹ wọ̀nyí yóò sọ̀kalẹ̀ tọ̀ mí wá, wọn yóò tẹríba níwájú mi, wọn yóò sì wí pé, ‘Máa lọ, ìwọ àti gbogbo àwọn ènìyàn tí ń tẹ̀lé ọ.’ Lẹ́yìn náà, èmi yóò jáde lọ.” Nígbà náà, Mose fi Farao sílẹ̀ pẹ̀lú ìbínú gbígbóná.

⁹Baba wa sọ fún Mose pé, “Farao kì yóò fetí sí yín, kí àwọn iṣẹ́ ìyanu mi lè pọ̀ sí i ní ilẹ̀ Ejipti.”

¹⁰Mose àti Aaroni ṣe gbogbo àwọn iṣẹ́ ìyanu wọ̀nyí níwájú Farao, ṣùgbọ́n Baba wa sọ ọkàn Farao di líle, òun kò sì jẹ́ kí àwọn ọmọ Israẹli lọ kúrò ní ilẹ̀ rẹ̀.