Tokei Limei Che
Limei tokei che ong tokei kia. Metuphanga Ijep thükto shaang bukbü shou pendou — choba setbü thükto, laang ngümbü sambü thükto sühko — hailabü, hoba shangie akibü tegü ngüh che longlabü. Lausikei keiei ailai Israel to lulu ajungeijan; seneibü Bouei Israel si Ijep kanglanga janyinan pholabü. Mosaei aeibou angeshongko Farao thedangto himshuong leikei.
11 1Seneibü Bouei Mosa to laukei, “Ngei Farao thükto hoba Ijep thükto limei tokei che sungbalabü. Kho phaia haoei hanei ka kan litilabü; ladang haoei kan litilaje, haoei kan khümbo shian sattilabü. 2Mütshuong to lenshi: bousu wekoei hao lepbou ka, hoba yaksa wekoei hao lepbou ka, chandinam si honeibü peisilei shuong hilabü.”
3Hobaje seneibü Bouei mütshuong Ijepbü thedanga maangshikbü haptikei. Kho ong ayingko, Mosa himshuong Ijep kaodaka Faraoeibü khangenbü shuong hoba mütshuong thedanga aeibou yaangbü kikei.
4Mosaei laukei, “Seneibü Bouei hai lauda: Metuphanga aeto ngo Ijep kaodaka shoonglabü,
5“hoba Ijep kaodaka shaang bukbü shou pendou — choba setshanga setbü Faraoeibü shaang bukbü ka ngünbü laang phainei kibü sambü aaoeibü shaang bukbü shou sühko — hoba shaangla shatbüsitbü meisiau pendou hailabü. 6Ijep kaodak pendoua kaang yaangbü che kilabü, shangie kho tegü akikei, hoba tou tegü akilabü. 7Lausikei Israel shousi shuong aoyou thükto, müt yingsikei meisiau yingsikei, kei che ongkei angeklabü; hibü seneibü Bouei Israel to Ijepbü tegü ayinga yeitida dogo kanei ngelabü. 8Kaibü khangenbü shuong ho pendou kü jungto yanan louan, kü thedanga khüpetan, hoba laulabü, ‘No hoba no phai sembü mütshuong pendou hauashi.’ Kho phaia ngo longlabü.” Kheijinei Mosa aeibou khauangko Farao jungka longkei.
9Seneibü Bouei Mosa to laukei, “Faraoei ka to ngüha alekulabü, hibü ngeibü seikümseilei Ijep kaodaka haatilabü.”
10Mosa si Aronei ho seikümseilei pendou Farao thedanga kümbei, lausikei seneibü Bouei Faraoeibü maangpon kaangtikei, hoba haoei Israel shousi shuong haoeibü kaodak ka sattila ohauti.
